1. I vyani vino swensi tulinzile ukucita?

UZYE mungalonda ukusimula ulwilo lwa kucimvyanya luno mumanyile ukuti ulutale, sana sana ndi cakuti imulwala nanti imutonta? Mutange mutemwe. Nomba umutumwa Paulo walanzile ukuti Aina Klistu ya cumi yonsi yakasimula ulwilo lwa kucimvyanya. (Ayeb. 12:1) Nupya swensi, ance nanti aikolo, akome nanti atonte tulinzile ukuzizimizya ukufika nu kumpela ndi cakuti tukulonda tukapokelele icilambu cino Yeova walaya ukutupeela.—Mate. 24:13.

2. Wakwe vino ilembelo lyakwe 2 Timoti 4:7, 8 likalanda, u mulandu ci uno Paulo wakwatiile untungwa wa kuvwanga?

² Paulo wali nu untungwa wa kuvwanga pano wene wakwanisye kusimula “ulwilo ukufika nu ku mpela.” (Welengini 2 Timoti 4:7, 8.) Nomba u lwilo ci luno Paulo walandangapo?

3. U lwilo ci ulwa kucimvyanya luno Paulo walandangapo?

³ Insita zimwi Paulo walembanga pa vintu ivyacitikanga umu vyangalo vino yateyanga mpiti umu Gilisi nga kulonda ukusambilizya pa masambililo acindame. (1 Kol. 9:25-27; 2 Tim. 2:5) Pa miku iingi, wakolinye imikalile ya Wina Klistu uku kusimula ulwilo lwa kucimvyanya. (1 Kol. 9:24; Gala. 2:2; Filipi 2:16) Umuntu akatandika ukusimula ulwilo luu nga waipeela kuli Yeova nu kuwatiziwa. (1 Pet. 3:21) Akacimvya ulwilo ndi cakuti Yeova wamupeela icilambu ca umi wa pe.—Mate. 25:31-34, 46; 2 Tim. 4:8.

4. I vyani vino tumasambililapo umu cipande cii?

⁴ U kukolana ci ukwaya pa lwilo lwa kusimula intamfu iitali na pa mikalile iya Wina Klistu? Kwaya ivintu ivingi ivyalenga vikolane. Lekini tulande pa vintu vitatu. Ca kutandikilapo, tulinzile ukulondela inzila ilungame, cakwe ciili, tulinzile ukwika  mano uku kumalila ulwilo luu ukufika nu kumpela, na cakwe citatu, tulinzile ukuzizimizya na lino itukwata intazi.

5. Iinzila ci ino tulinzile ukulondela, nupya u mulandu ci?

⁵ Pa kuti aakusimula ulwilo yapokelele icilambu, yalinzile ukulondela inzila ilungame ino apekanyanga ukucimvyanya kuu yapanzile. Vivyo kwene avino caya nu ku mikalile ya Wina Klistu, ndi cakuti tukulonda ukupokelela icilambu ca umi wa pe tulinzile ukulondela inzila ilungame iya mikalile ya Wina Klistu. (Mili. 20:24; 1 Pet. 2:21) Nomba Satana na yonsi aakamulondela yasilonda tulondele inzila ya mikalile ya Wina Klistu lelo yakalonda tutwalilile ukusimula pamwi nayo. (1 Pet. 4:4) Yakasaalula imikalile itu nu kulanda ukuti imikalile yao ali nzila isuma iikalenga antu ukuya nu untungwa. Nomba vino yakalanda i vya ufi.—2 Pet. 2:19.

6. I vyani vino mukusambilila kuli ya Brian?

⁶ Yonsi aakaikala wakwe vino aakatungululwa ni nsi yakwe Satana yakaikala yasya yakamanye ukuti vino yakacita visilenga yaye antungwa lelo vikalenga yateekwe uzya kuli Satana ni vilondwa vyao ivya mwili. (Loma 6:16) Elenganyini pali vino vyacitikiile ya Brian. Avyazi yao yayakomelezyanga ukwikala imikalile ya Wina Klistu. Lino yafisizye imyaka ya ulumendo, ya Brian yatandike ukutwisika ndi cakuti imikalile iyo ingalenga yaye ni nsansa. Ya Brian yasoolwilepo ukulondela imiyele ya antu aatungululwanga na Satana. Yalanzile ukuti: “Ntamanyile ukuti untungwa uno nalondesyanga wali nu kulenga inteekwe uzya uku viyelezyo iviipe. Patalengile, natandike ukuomvya imilembo iikavulunganya uwongo nu kumwa sana uwengwa nupya nacitanga nu upulumusi. Pa myaka iingi natwalilile ukuomvya sana imilembo iipe iikavulunganya uwongo nu kuteekwa uzya uku vintu ivingi wakwe vii . . . Natandika ukukazya imilembo iikavulunganya uwongo pakuti naisakamala.” Lino papisile insita, ya Brian yapingwilepo ukutandika kulondela masunde yakwe Yeova. Yasenwike nu kuwatiziwa umu 2001. Ndakai yaya sana ni nsansa pano yakalondela imikalile ya umi wa Ina Klistu. *

7. Ukulingana ni lembelo lyakwe Mateo 7:13, 14, Iinzila ci ziili izyayako?

⁷ Icicindama sana ukusoolola ukulondela inzila ilungame! Satana akalonda swensi tute ukusimula umu nzila ifyenkane iyakwingilila “ku umi” nu kulondela inzila iisalale ino antu aingi aya umu nsi ii yasoolola. Inzila iyo yamanyikwa sana nupya yangupala ukupitamo. Nomba ikatungulula uku “ononesi.” (Welengini  Mateo 7:13, 14.) Pakuti tutwalilile ukupita umu nzila ilungame nu kukanapumvyaniziwa na antu asipita umu nzila ii, tulinzile ukutaila Yeova nu kumuvwila.

8. Ndi cakuti wino akusimula wapona, i vyani vino akacita?

⁸ Aakaya umu lwilo lwa kucimvyanya ulwa ntamfu iitali yakatwalilile ukulolekesya pano yakulyata pakuti yatapumika. Nomba nanti ciye vivyo, insita zimwi yangapumana na yano yakusimula nayo nanti ukupumika umu ciwina. Ndi cakuti yapona, yakakatuka nu kutwalilila ukusimula. Yasiika amano kuli cino cali cayalenga ukupumika, lelo yakaika amano uku kucimvya nu ku cilambu cino yakwenekela ukukwata.

9. Ndi cakuti twapumika i vyani vino tulinzile ukucita?

⁹ Umu lwilo lwitu, tukapumika imiku iingi, tukaluvyanya muli vino tukavwanga nu kucita. Nanti limwi yano tukasimula nayo umu lwilo luu yangacita ivintu ivingatusosya. Ndi cakuti ca musango uwo cacicitika, tutalinzile ukuzunguka. Swensi kwene tutamalilika, nupya swensi tukasimula umu nzila yonga ifyenkane iikatungulula uku umi. Fwandi insita zimwi tungasosyanya na ina itu na ya nkazi. Paulo wamanyile ukuti insita zimwi ‘umwi angailizyanya apa muze.’ (Kolo. 3:13) Nomba ukucila ukwika mano ku vintu ivyativilenga tupumike, lekini twaika mano uku cilambu icili uku nkoleelo. Ndi cakuti twapumika, lekini twakatuka nu kutwalilila ukusimula nupya. Nga twasoka nu kuya nu lupato nu kukana ukutandika ukuombela Yeova nupya, tutalacimvya umu lwilo luu nupya tutalapoka icilambu. Nupya nga twacita vivyo tulalenga citalile yauze aakasimula umu nzila ii ifyenkane ukutwalilila.

10. Tungacita uli pakuti yauze yatapumika?

¹⁰ Na vyuze vino tungacita pakuti aina na ya nkazi yatapumika u kuyaleka yacita vino yakulonda nga calondekwa ukucila ukuleka lyonsi yacita vino tukulonda. (Loma 14:13, 19-21; 1 Kol. 8:9, 13) Nga twacita vivyo tutalaya wakwe ya kasimula aakasimula ulwilo lwa cumi cumi ulwa kucimvyanya. Yakacimvyanya na ya kasimula yauze, nupya cila muntu akaezya na maka pakuti aliwe apoke icilambu. Ya kasimula yayo yakaelenganya sile pali vino vingayazwa  pakuti yacimvye ulwilo lulo. Fwandi yangezya ukusunka ya kasimula yauze pakuti aliyo yaye apa nkoleelo. Nomba umu lwilo lwitu lwene tusicimvyanya. (Gala. 5:26; 6:4) Uyo witu u wakwazwa antu aingi ukwizapusuka nu kwingila umu nsi ipya yakwe Leza nu kuya nu umi wa pe. Fwandi tukaezya na maka ukulondela ukusunda kwakwe Paulo ukwakuti tutalinzile ukucita ‘ivingatuzipila swenga sile lelo twacita ivingazipila na [anji] kwene.’—Filipi 2:4.

11. I vyani vino kasimula akaikako sana mano, nupya u mulandu ci?

¹¹ Ukucila sile ukwika mano pano yakulyata aakasimula umu lwilo lwa cumi cumi yakaika na mano uku kucimvya. Nanti icakuti pa nsita iyo yatange yalole icilambu na manso yao, yangelenganya ukuti yacimvya yapoka ni cilambu. Yakakomeleziwa ukutwalilila ukusimula ndi cakuti yakwelenganya pa cilambu.

12. I vyani vino Yeova watulaya?

¹² Umu lwilo luno tukasimula, Yeova watulaya ukutupeela icilambu ndi cakuti twacimvya ulwilo luu, kuli kuti umi wa pe ukwi yulu nanti mu paladaise pano nsi. Baibo ikalondolola ningo vino cilambu cico caya pakuti twaelenganya vino umi witu ulazipa uku nkoleelo. Ndi cakuti twatwalilila ukwelenganya pali vino Yeova watulaya uku nkoleelo, tulalondesya ukuzizimizya asi mulandu ni ntazi zino tungakwata.

13. I vyani vino twakwata vino ya kasimula yatakwata?

¹³ Aasimulanga umu vyangalo vya ya Giliki, yalondekwanga ukucimvya intazi izili wa kutonta nu kuwaikwa. Nomba yonsi yasintililanga pa kusambilila kuno yasambililanga lino insita ya cangalo cico itali ifike na pa maka yao. Twaya wakwe ya kasimula yayo pano naswe tukasambilila ivya kucita pa kusimula umu lwilo luno tukasimula. Nomba swemo twalutako ya kasimula yaa amu lwilo lwa cumi cumi. Yeova angatupeela amaka nupya amaka yayo yatakwata apa kupeelela. Ndi cakuti twataila Yeova, watulaya ukuti atalatusambilizya sile lelo alatulenga nu kuti tuye akome!—1 Pet. 5:10.

14. Uzye ilembelo lyakwe 2 Kolinto 12:9, 10 likatwazwa uli ukuzizimizya intazi?

¹⁴ Paulo wakweti intazi izingi. Ukulunda pa kumutuka nu kumucuzya, insita zimwi uvwanga ukutonta nupya wazizimizyanga ni ntazi ino watangi wakwata “munga mu mwili.” (2 Kol. 12:7) Ukucila ukulenga intazi zizyo zimulesye ukuombela Yeova, waweni ukuti ali nsita ya kutaila sana Yeova. (Welengini 2 Kolinto 12:9, 10.) Pa mulandu wakuti Paulo welenganyanga vii, Yeova wamwazwilizye ukucimvya intazi zii zyonsi.

15. I vyani vilatucitikila ndi cakuti tukukolanya Paulo?

¹⁵ Naswe kwene yangatutuka nu kutucuzya pa mulandu nu tailo witu. Nupya limwi tungalondekwa nu kuzizimizya intazi wakwe ukulwalilila nanti ukutonta. Nomba nga tukukolanya Paulo intazi zyonsi zii zingaya i syuko lya kulolelamo ukuti Yeova waya nu kutemwa nupya akatutungilila.

16. Nanti cakuti mutakwata umi usuma i vyani vino mungacita?

¹⁶ Uzye mwalwala icakuti musikatuka nanti limwi mukaomvya kajinga ka yalemale? Uzye mukauvwa amakulu ukuwaya nanti limwi musilola ningo? Ndi cakuti avino cili, uzye mungaombela Yeova pamwi na yayo acili ance nupya aumi usuma? Icumi kwene mungaomba! Akoloci aingi na yayo yonsi alemale yakasimula ulwilo lwa ku umi. Yatange yaombe umulimo uu uku maka yao. Lelo yakapalama sana kuli Yeova pakuti ayakomya lino yakukutika uku kulongana pa foni nu kutamba ukulongana ukuomvya intaneti. Yakaombako nu mulimo wa kupanga asambi lino yakusimikila kuli ya dokota, ya nasi na ya lupwa.

17. Uzye Yeova akauvwa uli pali yayo aakalwalilila?

 ¹⁷ Ndi cakuti mukafilwa ukuomba vyonsi vino mukalonda ukuombela Yeova mutatoovoka nu kutandika ukwelenganya ukuti mutange muzizimizye ukufika nu mpela ya nsi ii. Yeova wamutemwa pa mulandu nu utailo uno mwakwata na pali vyonsi vino mwamuombela pa myaka yonsi ino mwaomba. Iikwene ali nsita ino mukulondekwa sana uwazwilizyo ukufuma kuli Yeova nupya atalatala amusye. (Masa. 9:10) Lelo alapalama sana kuli mwemwe. Uvwini vino nkazi aakalwalilila walanzile, watiile: “Pa mulandu wakuti nkalwalilila sana, nsikwata sana insita ya kusimikila yauze. Nomba namanya ukuti nanti sile naomba panono Yeova akazanga, na cico cikalenga inje ni nsansa.” Ndi cakuti mwatoovoka, mwaiusya ukuti Yeova ali namwe. Elenganyini pali vino Paulo wacisile nu kwiusya amazwi akukomelezya yano walemvile akuti: “Nemo ndi nu luzango lwa kuya nu utonte, . . . pano lino ndi mu utonte, ale lyene nene mukome.”—2 Kol. 12:10.

18. Iintazi ci itale sana ino yamwi yakakwata?

¹⁸ Yamwi aakasimula ulwilo lwa ku umi, yakakwata intazi na yuze. Yakazizimizya intazi zino yauze yatange yalole nupya yatazimanya. Limwi yakazizimizya intazi ya kuya ni cikonko nanti limwi yakasakamala sana. U mulandu ci uno intazi ino aomvi yaa yakwe Yeova yakwata yatalila sana? A pa mulandu wakuti ndi cakuti umwi waputuka ikasa nanti watandika ukuomvya kajinga ka yalemale, antu yonsi yamalolanga intazi ino akweti nupya yalalondesya ukumwazwa. Nomba yayo aakazizimizya ni ntazi ya kucuziwa nu mwenzo nanti kuvulunganiziwa yangaloleka kwati pasi icili consi icaticiluwana. Intazi ino yakapitamo yaya itale wakwe vivi kwene vino cikaya na kuli wino wataputuka ikasa nanti ikulu, nomba pa mulandu wakuti yene pasi aangalola ukuti yakucuula antu yatange yayalange ukutemwa nanti ukuyasakamala wakwe vino yakulondekwa.

19. I vyani vino tukusambilila kuli vino Mefibosyeti wacisile?

¹⁹ Ndi cakuti mwakwata intazi imwi ino yauze yatange yuvwikisye, mungakomeleziwa kuli vino vyacitikiile Mefibosyeti. (2 Sam. 4:4) Walemiile nupya Umwene Davidi wamufyenzile. Pasi iviipe ivili vyonsi vino Mefibosyeti wacisile pakuti vyonsi vii vimucitikile. Nomba atalesile ivintu vii vilenge asoke lelo watwalilile sile ukutaizya pa vintu ivisuma ivyamucitiikile umu umi wakwe. Wataizye pa cikuuku cino Davidi wamulanzile uku cisila. (2 Sam. 9:6-10) Fwandi lino Davidi wamufyenzile, Mefibosyeti wezizye na maka ukwelenganya pa vintu vyonsi ivyamucitiikile. Atalenzile vino Davidi waluvyanyizye ukumulenga asoke. Nupya atapeezile Yeova umulandu pali vino Davidi wacisile. Mefibosyeti wisile amano  pali vino angacita pakuti atungilile umwene wino Yeova wasoolwile. (2 Sam. 16:1-4; 19:24-30) Yeova walenzile ivisuma vino Mefibosyeti wacisile vilembwe umwi Izwi lyakwe pakuti tusambilileko.—Loma 15:4.

20. Uzye ukusakamikwa kungalenga yamwi ukuya uli, nomba i vyani vino yangasininkizya?

²⁰ Pa mulandu nu kusakamikwa sana, aina yamwi na ya nkazi yakauvwa sana intete ni nsonyi nga yali pamwi na antu yauze. Limwi cikayatalila sana ukuya kuno kuli antu aingi, nomba yakatwalilila ukuzanwa umu kulongana kwa pa cilongano nu ku maukongano. Cikayatalalila ukulanda na antu yano yatamanya, nomba yakalanda na yauze lino yali umu mulimo wa kusimikila. Ndi cakuti avino caya kuli mwemwe, manyini ukuti asi mwemwe mwenga. Aingi yakayuvwa wakwe vino mukayuvwa. Iusyini ukuti Yeova akazanga sana pali vino mukaombesya nu mwenzo onsi. Vino mutatoovoka uusininkizyo wakuti akamupaala nupya akamupeela na maka ya kuzizimizya yano mukalondekwa. * (Filipi 4:6, 7; 1 Pet. 5:7) Ndi cakuti mukaombela Yeova asi mulandu ni ntazi zino mukakwata, mungasininkizya ukuti mukazanzya Yeova.

21. I vyani vino swensi tulacita pa mulandu wakuti Yeova akatwazwa?

²¹ Icazipako i cakuti paya upusano pa lwilo lwa kucimvyanya ulwa cumi cumi nu lwilo luno Paulo walandangapo. Umu lwilo lwa kucimvyanya ulwayangako lino ivyalumbulwa muli Baibo vyacitikanga, umuntu sile wenga u wapokanga icilambu. Nomba umu lwilo lwa ku umi lwene, wensi uwazizimizya ukufika nu kumpela alapokelela icilambu ca umi wa pe. (Yoa. 3:16) Nupya umu lwilo lwa kucimvyanya, yonsi aakasimula yalinzile ukuya nu umi usuma, nga asi vivyo yatange yacimvye. Nomba umu lwilo lwa ku umi sweingi tutakwata umi usuma, lelo tukatwalilila ukuzizimizya. (2 Kol. 4:16) Pa mulandu wakuti Yeova akatwazwa, swensi tulasimula ulwilo luu ulwa kucimvyanya ukufika nu kumpeela!