Nanti icakuti Aina Klistu yalinzile ukuicingilila, yalinzile ukulondela ivisinte vya muli Baibo lino yakwezya ukucita vivyo. Ivisinte vivyo vikatukanya ukuomvya ivyanzo, wa mfuti zino yakaama ukuti andigani, laifo, nanti imfuti zyuze, pakuti tuicingilile uku yantu yauze. Elenganyini pali vii ivili apisika ivingatwazwa ukupingulapo ningo:

Yeova akalola ukuti umi wacindama, sana sana umi wa muntu. Kalemba wa masamu Davidi wamanyile ukuti Yeova ali ‘ntulo ya umi.’ (Masa. 36:9) Fwandi ndi cakuti Umwina Kistu akulonda ukuicingilila nanti ukucingilila ivikwatwa vyakwe, alinzile ukwezya na maka ukuti atakoma umuntu pakuti ataya nu mulandu wa wazi.—Malan. 22:8; Masa. 51:14.

Nanti icakuti ukuomvya ivintu ivipusane pusane kungalenga umwi aye nu mulandu wa wazi, cikaangupala sana ukukoma umuntu ndi cakuti umwi ali ni mfuti. Nupya umwi angacita vivyo ukwaula ukwenekela nanti uku mufulo sile. * Nupya ndi cakuti akukuzanza umusoke mpiti nupya walola ukuti uli ni mfuti, ivintu vingipilako nupya limwi angakukoma nu kukukoma.

Lino Yesu wanenyile alondezi yakwe ukuti yasende malupanga pa wanda uno wafwile usiku, atelenganyanga pa kuicingilila. (Luka 22:36, 38) Lelo Yesu walondanga ukuyasambilizya isambililo ilicindame sana ilyakuti yatalinzile  ukuya nu unkalwe, nanti sile lino yazanzwa ukwi umba lya yantu ali ni vyanzo. (Luka 22:52) Lino Petulo wacenkwile ikutwi lya muzya wakwe simapepo mukalamba ukuomvya ulupanga, Yesu wamunenyile ukuti: “Swilizya lupanga lwako mu cipata.” Lyene Yesu walanzile icisinka cimwi icicindame, kuli kuti icisinte icikatungulula alondezi yakwe ndakai icakuti: “Yonsi akalema lupanga yene yalafwila ku lupanga.”—Mate. 26:51, 52.

Ukulingana na Mika 4:3, antu yakwe Leza ‘yakasula malupanga yao kuti yaye amase, nga na masumo yao kuti yaye mipeni yakutungwilila’ imiti. Ivyeo kwene vii ivikamanyisya Aina Klistu ya cumi vikauvwana na mazwi ya kukomelezya yano umutumwa Paulo walanzile akuti: “Umwi ndi wamucitila ciipe, namwe mutamucitila ciipe. . . . Citini vyonsi vingacitwa pakuti mwikale mu mutende na antu onsi.” (Loma 12:17, 18) Asi mulandu ni ntazi zino Paulo wapitangamo, ukwikako sile nu ‘uzanzo wa vipondo,’ lyonsi walondelanga ivisinte vya muli Baibo. (2 Kol. 11:26) Nupya wataile sana Yeova ni vyaya muli Baibo pano “amano yazipa ukuluta ivyanzo vya nkondo.”—Kasa. 9:18.

Aina Klistu yakalola ukuti umi wacindama sana ukuluta ivyuma. “Umi wa muntu utaya mu wingi wa vintu vino wakwata.” (Luka 12:15) Fwandi ndi cakuti amazwi ya mutembo yafilwa ukulesya ivipondo ukuzanza Umwina Klistu, angalondela amazwi yano Yesu walanzile aakuti: “mutacita cilanduzi ku muntu mwipe.” Limwi cingalondekwa ukumuta atoole vyonsi vino akulonda. (Mate. 5:39, 40; Luka 6:29) * Lelo icacindama sana u kuicingilila lino tutali tuzanzwe. Ndi cakuti ‘tusikuitumika ku vyamu nsi,’ nupya aina mupalamano yatumanya ukuti sweswe ya Nte Yakwe Yeova aatemwa umutende, limwi ivipondo vitanga vituzanze.—1 Yoa. 2:16; Mapi. 18:10.

Aina Klistu yakacindika ya kampingu ya yantu yauze. (Loma 14:21) Ndi cakuti camanyikwa ukuti umwi umu cilongano wakwata imfuti iya kuicingilililako uku yantu, aina na ya nkazi yamwi umu cilongano yangazunguka sana, nanti sile ukutoovoka. Ukutemwa kukalenga twalondesya ukuti ivintu vyaziipila yauze, tulinzile ukucita vivyo na lino tukweti insambu zino uteeko wapeela aikala mpanga.—1 Kol. 10:32, 33; 13:4, 5.

Aina Klistu yakalonda ukuti yauze yayakolanya. (2 Kol. 4:2; 1 Pet. 5:2, 3) Lino Umwina Klistu umwi wino ya eluda yazwa ukuomvya Malembelo watwalilila ukusunga imfuti pakuti aicingilila uku yantu yauze, umuntu wa musango uwo ala asi ni miyele isuma ino yauze yangakolanya. Fwandi atanga alinge ukupeelwa imilimo iiyele nanti amasyuko yauze umu cilongano. Vikwene avino cilinzile ukuya nu ku Mwina Klistu aakasenda imfuti pa mulandu ni ncito ino akaomba. Fwandi cingazipa ukulonda incito yuze! *

Umwina Klistu angaisoolwela umwineco ivya kuicingilila, ukucingilila ulupwa lwakwe, nanti ivikwatwa, ukwikako sile ni ncito ino angatemwa ukwingila. Nomba lino akupingulapo pali vyonsi vivyo, alinzile ukuomvya ivisinte vya muli Baibo. Leza witu uwaya na mano watupeela ivisinte vivyo pa mulandu wakuti watutemwa sana. Acino Aina Klistu aatemwa sana Yeova yakasoololapo ukukana kwata imfuti pakuti yaicingilila uku yantu yauze. Yamanya ukuti ndi yataila Leza nu kulondela ivisinte vya muli Baibo, yalacingililwa amanda pe.—Masa. 97:10; Mapi. 1:33; 2:6, 7.