Ivisinka vikalangilila ukuti Yesu wizile aya Simapepo Mukulu lino wabatiziwe umu 29 C.E. Twamanya uli vivyo? Lino Yesu wabatiziwe, walangilile ukuti waitemiilwe ukupeela umi wakwe pa kavuwa ka unkolanya akakaimililako “kulonda” kwakwe Leza. (Gala. 1:4; Ayeb. 10:5-10) Pa mulandu wakuti kavuwa kacindama sana umu ng’anda yakwe Leza, fwandi ng’anda yakwe Leza izile iyako lino Yesu wawatiziwe. Ing’anda ikulu iya kupepelamo yakwe Yeova ikaimililako vyonsi ivikalenga twamupepa umu nzila ino akalonda ivyemelela pa mfwa yakwe Yesu.—Mate. 3:16, 17; Ayeb. 5:4-6.

Ing’anda ikulu yakwe Leza yalondekwanga simapepo mukulu uwakuombelamo. Fwandi Yeova wapasile Yesu nu mupasi wa muzilo na maka ukuya simapepo mukulu. (Mili. 10:37, 38; Mako 1:9-11) Nomba tungasininkizya uli ukuti Yesu wasonsilwe ukuya Simapepo Mukulu lino atatala wafwa nu kutuutululwa? Ivyacitikile Aloni na ya simapepo yauze aaliko lino wene atatala waya simapepo, vimatwazwa ukwasuka iuzyo lilyo.

Isunde lino Yeova wapeezile Mose lyalandanga ukuti, simapepo mukulu sile u wali nu kwingila umwa Muzilo Ukuluta umwi tenti lya kupepelamo lyene ndi papita insita wali nu kwingila umwa Muzilo Ukuluta umu ng’anda ikulu yakwe Leza. Pakasi ka miputule ii iili isilepo insalu ya kupatukanya umwa Muzilo Ukuluta nu mwa Muzilo. Simapepo mukulu wingililanga umwa Muzilo ukuluta pa Wanda wa Kufuuta Maifyo. (Ayeb. 9:1-3, 6, 7) Aloni na ya simapepo yauze amupyanyile yapakwanga ukuya simapepo umukulu lino yatatala ingila umwa muzilo ukuluta, fwandi Yesu nawe kwene wapasilwe ukuya Simapepo Mukulu lino atatala wafwa lyene wizile aya ukwi yulu “kupitila mu cisalu ca kucinga, kuli kuti kupitila mu mwili wakwe.” (Ayeb. 10:20) Pa mulandu wakwe cii, umutumwa Paulo walanzile pali Yesu ukuti wiza “wakwe simapepo mukulu” nupya wingile umwi itaalu ilikulu nupya ilifumaluke cuze, ilitapanzilwe nu muntu alino nu kwi yulu kwene.—Ayeb. 9:11, 24.

Pataya upusano pali lino upangano upya wasininkiziwe na lino watandike ukuomba. U mulandu ci? Lino Yesu waile ukwi yulu nu kupeela umi wakwe ucindame sana pa mulandu witu, wacisile icintu ca kutandikilako pa vintu vitatu ivyali nu kulenga upangano upya ukumanyikwa. Ivintu kwene vivyo i vyacitikanga na pakuti upangano utandike ukuomba. I vintu ci vivyo kwene?

Ca kutandikilako, Yesu walolekiile kuli Yeova; cakwe ciili, Yesu wapeezile kuli Yeova umi wakwe ucindame uno watufwilile; lyene cakwe citatu, Yeova wapokeelile uwazi ucindame uno Yesu wazwisizye. Lino ivintu vii vitali vicitike, upangano upya utaombanga.

Baibo itatunena umu kulungatika lino Yeova wapokeliile impolelwa yakwe Yesu. Fwandi naswe kwene tutange tulande umu kulungatika lino upangano upya wamanyikwe na lino watandike ukuomba. Nomba twamanya ukuti Yesu waile ukwi yulu ala kwasyala amanda 10 kuti Pentekositi itandike. (Mili. 1:3) Pa nsita imwi umu manda kwene yayo, Yesu wapeezile impolelwa yakwe icindame sana kuli Yeova nupya nawe waipokeelile. (Ayeb. 9:12) Twasininkizya vii pa mulandu ni vyacitiike pa Pentekositi 33 C.E. (Mili. 2:1-4, 32, 33) Upangano upya lyene wapanzilwe nu kutandika ukuomba.

Fwandi tungati, upangano upya wali nu kumanyikwa nu kutandika ukuomba pa cisila lino Yeova wapokeliile uwazi ucindame uno Yesu wazwisizye. Upangano lyene watandike ukuomba ala na Simapepo Mukulu Yesu akuomba nga kakundanya.—Ayeb. 7:25; 8:1-3, 6; 9:13-15.