DAVIDI uwaliko mpiti umu Izlaeli u wavwanzile amazwi ali papela akulumbanya lino wakomenkinye umwanaci umwi. Izina lyakwe a Abigelo. I cani calenzile Davidi ukuvwanga amazwi yayo akulumbanya, nupya i vyani vino tungasambililako kuli Abigelo?

Davidi wakomenkinye umwanaci wii pa nsita ino utukanga Umwene Saulo. Abigelo wali umuci wakwe Nabali, umonsi uwakweti ivyuma vingi papo pali ni mfwele izingi cuze izyali umu lwanga lwa ku kaeya ka musumba wa Yuda. Davidi na onsi yakwe ‘yacingililanga’ ya kacema yakwe Nabali pamwi nu ufyo lino yali mu mpanga. Lino papisile insita, Davidi watumile aomvi yakwe ukuya kuli Nabali ku kulengako kali ‘konsi kano wakweti’ mu musango wa vyakulya. (1 Sam. 25:8, 15, 16) Vino Davidi walenzile kuli Nabali vyali ivinono sana ndi twavilinganya kuli vino wene na aomvi yakwe yacingilile ivintu vyakwe Nabali.

Nomba Nabali, wino izina lyakwe lyapiliulanga “Ciwelewele” nanti “Mutumpe,” wacitanga vintu kulingana nu piliulo wi zina lyakwe. Pa kwasuka wakalipe nu kulanda mazwi aipe, nu kukana ukupeela Davidi vino walenzile. Fwandi Davidi wapanzile ukufulula Nabali pa myasukile yakwe iipe. Nabali na mu ng’anda yakwe yali nu kulipila pa kutumpa kwakwe Nabali.—1 Sam. 25:2-13, 21, 22.

Abigelo wilwike ukuti vino Davidi wapanganga ukucita vyali nu kulenga akwate umulandu wa wazi, fwandi wasifile nu kuvulunganya mapange yayo. Abigelo waile kuli Davidi mucinzi mucinzi pa mulandu na ucuza uno Davidi wakweti na Yeova. Nupya wapeezile ivyakulya ivingi kuli Davidi uwali nu kuya umwene uwakonkapo, alino nu ku yaomvi yakwe. Davidi nawe wilwike ukuti Yeova uwaomvizye Abigelo ukumulesya ukucita ivintu ivyali nu kulenga ukuti aye uwa mulandu kuli aliwe. Davidi wanenyile Abigelo ukuti: “Si angala kawala pa mano yaa yano wampanda. Pano awewe wandesya api lelo ukukana koma antu.”—1 Sam. 25:18, 19, 23-35.

Icanguke ukulola ukuti tutange tuye wakwe Nabali, ukukanataizya ndi yamwi yatucitila ivisuma. Nupya, ndi cakuti twalola ukuti kuli ivipe vimwi ivikucitika, tulinzile ukumanya vino tungacita pakuti tutaluke ku vipe vivyo. Ndi twacita vivyo tulalanda nga vino kalemba wa masamu wanenyile Leza ukuti: “Umpeele ukumanya na mano.”—Masa. 119:66.

Yamwi yangalola amano yano mukweti, nanti vino mukupingulapo ningo pa vintu, muli vyonsi vino mukucita. Fwandi yaminene nanti foo, yakauvwa wakwe vino Davidi uvwile lino wanenyile Abigelo ukuti: “Si angala kawala pa mano yaa yano wampanda.”