“MWAZYUKENI! Mwazyuka uli?”

Namwe mufwile mukalamuka antu wakwe vikwene. Limwi mukayalamuka mu minwe nanti ukuyakuukula. Paya upusano umu miomvezye ya mazwi ni ntambi umu mpanga izipusane pusane, nomba imilamukile yene yakolana. Ukukanalamuka nanti ukwasuka umwi ndi walamuka kungalanga ukuti umwi ataya nu kutemwa nupya ataakwata umucinzi.

Nomba asi yonsi atemwa kulamuka yauze. Yamwi yakafilwa ukulamuka yauze pa mulandu ni nsonyi nanti ukuilola ukuti yatacindama. Yauze nayo cikayakomela ukulamuka antu afuma ku mpanga yuze, akwata intambi izipusane nanti akuti yalumbuka sana mu wikazi. Nomba nanti ciye vivyo, ukulamuka umuntu nanti apanono sile kukalenga ivintu kuzipa.

Mwayuzya mweineco muti: ‘I visuma ci ivingacitika ndi cakuti tukulamuka yauze? Nupya Baibo ikalandapo uli pa kulamukana?’

Lino umutumwa Petulo wapokelelanga Koneli aataali Umuyuda mu cilongano ca Ina Klistu walanzile ati: “Leza ataya na kasoozi pa muntu ali wensi.” (Mili. 10:34) Insita yuze Petulo walemvile ukuti Leza “akalonda kuti antu yonsi yazenzuke.” (2 Pet. 3:9) Limwi tungelenganya ukuti malembelo yaa yakaomba sile uku muntu aakusambilila icumi. Lelo Petulo wakonkomizye Aina Klistu ukuti: “Mwacindika antu onsi. Temwini aina Klistu ataila wakwe mwemwe.” (1 Pet. 2:17) Acino fwandi uzye citanga cizipe ukuti twalamuka antu ya mitundu yonsi ni nkulilo? Nga tukucita vivyo ale tukuyacindika nu kuyatemwa ale twayatemwa.

Mutumwa Paulo wakomelizye yonsi aali mu cilongano ukuti: “Mwazengelana mwensi ndi vino Klistu wamuzengile, pakuti Leza alumbanyiwe.” (Loma 15:7) Paulo walanzilepo pa ina amukomelizye sana. Nomba ndakai lyene aina itu na ya nkazi yakalondekwa ukukomeleziwa sana pano Satana akuzanza sana antu yakwe Leza.—Kolo. 4:11; Umbw. 12:12, 17.

Malyasi aalembwa muli Baibo yakalangilila ukuti ukulamuka kwacindama sana kuli yauze.

Lino insita yafisile iyakuti Yeova akuusizye umi wa Mwanakwe munda yakwe Maliya, watumile mungeli kuti akavwange nawe. Mungeli watandike na mazwi aakuti: “Kwaita wemuno Leza wakumbusuka pakalamba! Mwene ali nawe.” Maliya ‘wasakamiikwe pa mazwi yaa’ pano atamanyile umulandu uno umungeli walandiile kuli aliwe. Lino umungeli waweni ukuti wasakamala, wamunenyile ukuti: “Utoopa, Maliya, pano Leza watakukumbusuka.” Wamulondolweliile ukuti u kulonda kwakwe Leza kuti ace akwate Mesiya. Lyene lino yamulondolwela vivyo, Maliya watiile ukusakamala, nupya waswike ati: “Nene muomvi wa Mwene, kaciye ndi vino watuvwanga.”—Luka 1:26-38.

Lyali i syuko wakwe cimwi uku mungeli wiya ukuya inkombe yakwe Yeova. Nomba nanti cakuti yamutumile uku muntu aataali umumalilike atasuuzile mulimo uno yamupeezile. Watandikilepo ukumulamuka. I vyani vino tungasambilila kuli vino wacisile? Tulinzile twalamuka antu lyonsi nu kuyakomelezya. Tungalanda sile amazwi anono aakukomelezya pakuti antu yayo yauvwa ukuti nayo kwene antu yakwe Yeova.

Paulo wamanyile antu aingi mu vilongano ivyali mu Asia Minor nu mu Ulaya. Makalata yano watumiile ivilongano mwaya antu yano walamwike. Tungawelenga pa yantu yamwi yano walamwike muli Loma cipande 16. Paulo walamwike Aina Klistu yauze aingi. Walamwike “nkazi” Febi, nu kuneena aina ukuti: “Mumupokelele mwi zina lya Mwene, wakwe vino  antu yakwe Leza yalinzile kupokelelwa. Mwazwini muli vyonsi vino angalonda kwazwiwa.” Paulo walamwike Pulisila na Akwila nu kuyataizya, nupya aasi aliwe wenga uwayataizye lelo na “mauvi ya Akulukuwa” nayo kwene yayataizye. Walamwike na antu yamwi atamanyikwa sana ndakai kuli kuti ‘Epanatusi cuza wakwe’ alino na “Tulafaeni na Tulafosa, akatumikila Mwene.” Fwandi Paulo walamukanga aina na ya nkazi.—Loma 16:1-16.

Mutale mwelenganye vino yuvwile ningo pa kumanya ukuti Paulo waiusyanga. Cii calenzile ukutemwa kuno yatemilwe Paulo na yauze kukulileko. Nupya ukuvwa ukuti Paulo wayalamwike kwakomelizye sana na Ina Klistu yauze, nupya kwayavwile ukutwalilila ukuya nu utailo ukome. Fwandi ukulamuka ukukalanga ukuti umwi wataikwako amano nupya ukwakutaizya kukalenga ucuza ukukoma nu kulemanya aomvi yakwe Leza acisinka.

Lino Paulo wafisile umu Puteoli akatuka afika nu mu Loma, Aina Klistu izile uku kaeya umu kumukomaanya. Lino wayaweni patali yakwiza, ‘wataizye Leza nu kukomeleka.” (Mili. 28:13-15) Insita zimwi ukumwentwila sile umuntu nanti ukumubaibisya ala twamulamuka. Nupya ukucita vivyo kwene navyo vingalenga umuntu ukukomeleziwa nanti cakuti walali umusakamale.

Umusambi Yakobo walondanga ukucelulako yamwi pali vino yacitanga. Aina Klistu yamwi yatiile ukuya acisinka kuli Leza nu kutandika ukuya ya cuza na antu amu nsi. (Yako. 4:4) Nomba lolini vino Yakobo watandike ukulemba kalata wakwe:

“Kalata kufuma kuli ne Yakobo, muomvi wakwe Leza nu wa Mwene Yesu Klistu. Nkulamuka antu yakwe Leza yonsi mitundu ikumi na ili asalangana konsi mu nsi.” (Yako. 1:1) Aawelenzile kalata wii cifwile cayangukiile ukuvwila vino wayanenyile lino yaweni amazwi yakwe akutandikilako ukuti watungululwanga na Leza. Fwandi ukutandikilapo ukulamuka umuntu kungalenga ukulanzyanya pa milandu ikome kupitike ningo.

Ndi cakuti twalamuka ukufuma pansi ya mwenzo nupya twalanga ukutemwa cingalenga ivisuma ivingi ukucitika nanti icakuti twaomvya sile amazwi anono. Mu cumi ivisuma vikacitika nanti icakuti yauze yatasumvileko amano. (Mate. 22:39) Nkazi umwi uku Ireland wafisile apa Ng’anda ya Wene ala ukulongana kwasya kutandike. Lino wingile umu Ng’anda ya Wene umwina umwi wapiliukiile kuli aliwe, amumwentwila nu kumunena ukuti: “Muli uli. Natemwa ukumulola.” Nkazi wiya ataswike icili consi waile aikala sile.

Lino papisile imilungu sile inono, nkazi wii waile ku mwina nu kumunena ukuti ipapitako insita ukufuma pano watandikile ukwezya na maka ukuzizimizya intazi izyali uku ng’anda izyalenganga ukuti auvwa ulanda. Walanzile ukuti nuvwile sana uyi uwanda uwa, icakuti ntalondanga nu kwiza umu kulongana. Nsiyiusya ivingi vino twasambilile uwanda uwa nomba nkaiusya vino mwandamwike. Calenzile nuvwe ukuti nimpokelelwa. Nkumutaizya sana.”

Umwina wiya atamanyile ulamu wakwe vino wacindime sana nanti icakuti ataomvizye amazwi aingi. Walanzile ukuti: “Lino nkazi wanenyile vino uvwile lino namulamwike, natemwile ukuti nacisile viivi nupya nuvwile ningo sana.”

Solomoni walemvile ukuti: “Sumba ivyakulya vyako pa manzi, pano alala papita amanda aingi ulavizana nupya kwene.” (Kasa. 11:1, NWT.) Ukulanga ukuti twika sana amano uku kulamuka, sana sana lino tukulamuka aina na ya nkazi tukalenga yauze ukuya ni nsansa nupya naswe kwene tulaya ni nsansa. Fwandi lekini lyonsi twaika mano uku kulamuka yauze nu kulaiusya ukuti ukulamuka kwacindama.