YESU wasowile ukuti alondezi yakwe yalaaomba ni nsansa mulimo wa uzombozi mu manda yaa aakusyalikizya. (Mate. 9:37; 24:14) Lekini tulande pali vino mazwi yaa yakufikiliziwa mu nzila iiyele mu cifulo ca Transcarpathia mu mpanga ya Ukraine. Mu misumba sile itatu iya mu cifulo cii, mwaya ivilongano 50 umwaya ya kasimikila ukucila pali 5,400. * Fwandi nga tuminkanya icipendo ca yantu yonsi aaya umu misumba yii itatu ala wenga pa yantu 4 aa Nte Wakwe Yeova.

Uzye antu aya umu ncende ino yakasimikilamo yaya uli? Umwina Vasile aakaikala uku ncende kwene ii walanzile ati: “Antu kuno yacindika Baibo, yatemwa umulinganya, nupya yalemana umu ndupwa, alino yakalondesya ukwazwana. Kwene aasi lyonsi lino yakazumila vino twazumilamo. Nomba ndi cakuti wayalanga vimwi muli Baibo yakaikako sana amano.”

Ukuya kwene aina itu na ya nkazi yakakwata intazi zimwi lino yakusimikila mu ncende umwaya ya kasimikila aingi sana. Mu cilongano cimwi mwaya ya kasimikila 134 nomba mwaya sile mang’anda 50 akusimikilamo. Uzye ya kasimikila yakakwanisya uli ukusimikila mu cifulo ca musango uu?

Aina na ya nkazi aingi yakaipeelesya sana pakuti yaye mu kuombela kuno ya kasimikila yacepa. Umwina Yonash uwa myaka 90, walanzile ukuti: “Mu cifulo cino tukasimikilamo cila kasimikila alinzile ukusimikila pa mang’anda sile yaili. Lino ntatala natandika ukulwalilila, napitanga makilomita 160 ukuya mu kusimikila ku ncende iyayela ukutali. Naomvyanga lulimi lwa Cihungarian pa kusimikila. Nomba ndakai vino nkalwalilila nkasimikila mu muzi kwene. Ya kasimikila yalinzile ukuombesya pakuti yavwilizye antu aya mu ncende izyaya mutali. Uzye aina yakacita uli pakuti yaombesya vivyo? Umwina Yonash walanzile ukuti: “Nakatukanga 4 koloko yakatondo inja nkwela isitima nupya nasimikilanga mpaka 6 koloko wa manguzi lino isitima lyaswililangamo. Nacitanga vivyo kwene amanda yaili nanti yatatu mu mulungu.” Uzye umwina wi walolanga ukuti vino waombesyanga wasumbanga sile insita? Walanzile ukuti: “Nayanga sana nu luzango lino nkusimikila. Nupya nakweti isyuko lyakwazwa amu lupwa lumwi ulwatenzi kutali ukusambilila icumi.”

Ukuya kwene asi yonsi amu vilongano ivyaya umu ncende ii angaya mu kusimikila ku ncende zya kutali. Nomba yonsi kwene ukwikako na ya kasimikila akoloci, yakaezya na maka ukuombesya kusimikila ku yantu yonsi mu cifulo cao. Ni cacitike i cakuti antu azanyilwe ku Ciusyo mu 2017 mu misumba yonsi yotatu yavuzile sana. Tungati yavuzile mupipi ni miku iili ngu kulinganya uku cipendo cakwe ya kasimikila nanti tuti ukufika pali citika wa yantu aya mu misumba yii. Fwandi, ukulikonsi kuno tungaaombela, tulinzile ukuombesya ‘lyonsi lino tukutumikila Umwene.’—1 Kol. 15:58.