Mausesemo yamwi atiyalandwapo muli cati yakulondolola ivyacitikanga pa nsita yonga. Mausesemo yaa yonsi yakalangilila ukuti tuli “uku nsita ya mpela ya nsi.”—Dan. 12:4.

• Malembelo Umbw. 11:7; 12:13, 17; 13:1-8, 12

  Usesemo “Cilyanyi” cateesile antu pano nsi pa myaka iingi. Mu manda aku mpela, umutwe uwalenga cinimbali waciswa. Lino papita insita, umutwe uwo wapola nupya “antu yonsi amu nsi” yalondela icilyanyi. Satana waomvya icilyanyi “ukulwa na antu yakwe Leza.”

  Kufikiliziwa kwa usesemo Pa cisila cakwe Mulamba Mukalamba, mauteeko aali alwani yakwe Leza yatandike ukucuzya antu yakwe Yeova. Lino papisille imyaka, lino kwali inkondo ya nsi yonsi ya kutandikilapo uteeko wa Britain wizile iucepelwa amaka. Wizile iukwata amaka nupya lino yalemenkine nu uteeko wa United States. Sana sana mu manda ya kusyalikizya, Satana akaomvya mauteeko ya pano nsi ukucuzya antu yakwe Leza.

• Malembelo Dan. 11:25-45

  Usesemo Mu manda ya kusyalikizya, umwene wa ku katutu nu mwene wa ku kaeya yakalwisyanya.

  Kufikiliziwa kwa usesemo Uteeko wa Germany nu uteeko wa United States yalwisyanyanga. Umu 1945 uteeko wa Soviet na yano yautungililanga izile iyaya umwene wa ku katutu. Umu 1991, uteeko wa Soviet Union watiile ukuteeka, lyene lino papisile insita uteeko wa Russia na akautungilila iizile iyaya umwene wa ku katutu.

• Malembelo Eza. 61:1; Malaki 3:1; Luka 4:18

  Usesemo Yeova watumile “inkombe” iyakuteyanya “umwa kupita” lino Uwene wa Umesiya utatala wapangwa. Inkombe iyo yatandike kusimikila “ilandwe lisuma ku apina.”

  Kufikiliziwa kwa usesemo Kufuma umu 1870, Umwina C. T. Russell na ina yauze yatandike ukusambilila sana Baibo pakuti yamanye ningo vino ikasambilizya. Mu 1881, ilwike ukuti icicindama sana ku aomvi yakwe Leza kulasimikila. Yatandike ukulemba ivipande wakwe “Ya Kasimikila 1,000 Yakulondekwa” ni cakuti “Twapakwa Pakuti Twasimikila.”

• Malembelo Mate. 13:24-30, 36-43

  Usesemo Mulwani wakomela kalolo mu calo ca ngano, lyene kalolo wakulila pamwi ni ngano nu kufisa ingano kufikila insita ya uzombozi; pa cisila kalolo wapaatulwa uku ngano.

  Kufikiliziwa kwa usesemo Ukutandika umu 1870 upusano pa Ina Klistu ya cumi na Ina Klistu ya ufi watandike ukuloleka sana. Mu manda ya kusyalikizya, Aina Klistu ya cumi yalonganikwa nu kupaatulwa ukufuma ku Ina Klistu ya ufi.

• Malembelo Dan. 2:31-33, 41-43

  Usesemo Ingazo zya cela ni ivu izya cinkolanya icapangilwa ni vyela ivipusanepusane.

  Kufikiliziwa kwa usesemo Ivu likaimililako antu asuulwe ateekwanga nu uteeko wa Britain na United States uwapondokiile mauteeko yauze. Pa mulandu na antu yayo, uteeko usiomvya amaka yonsi yano wakwata.

• Malembelo Mate. 13:30; 24:14, 45; 28:19, 20

  Usesemo “Ingano” zyalonganikwa umu “nkoma” nupya ‘muomvi mutailwe uwa mano’ wasontwa ukwangalila “aomvi.” Ilandwe lisuma ilya wene lyatandike ukusimikilwa “umu nsi yonsi.”

  Kufikiliziwa kwa usesemo Mu 1919 umuomvi mutailwe uwa mano wasonsilwe ukutungulula antu yakwe Leza. Kufuma lili kwene, asambi ya Baibo yatandike ukusimikila sana. Ndakai ya Nte Yakwe Yeova yakasimikila umu mpanga ukucila pali 200 nupya yakalemba impapulo izikalanda pali Baibo umu ndimi ukucila pali 1,000.

• Malembelo Dan. 12:11; Umbw. 13:11, 14, 15

  Usesemo Icilyanyi ca mitwe iili canena antu pano nsi ukupanga unkolanya wa “cilyanyi” nupya icilyanyi ca mitwe iili capuuta “umupu uno ukapeela umi mu unkolanya wa cilyanyi.”

  Kufikiliziwa kwa usesemo Uteeko wa Maka Sana umu Nsi uwa Anglo-America wapanga kaungwe ka League of Nations. Amu nko zyuzye yatandike ukutungilila kaungwe kaa. Lyene ukufuma umu 1926 ukufika umu 1933 umwene wa ku katutu nawe kwene wingile umu kaungwe kwene kaa. Wakwe vivi kwene vino antu yazumile pa kaungwe ka League of Nations ukuti kangaleta umutende uno Uwene Wakwe Leza sile aliwo ungaleta, avino yazumile na pa kaungwe ka United Nations.

• Malembelo Dan. 8:23, 24

  Usesemo Umwene umwipisye waleta “uononesi uwipisye.”

  Kufikiliziwa kwa usesemo Uteeko wa Britain na United States wakoma antu aingi nu kunona sana ivintu. Uteeko wa United States waponyizye mabomu aipisye umu mpanga zino zituvwananga na Britain na United States. Icanzo cii cononyile sana ivintu nu kukoma sana antu ukutatazile kucitikepo.

• Malembelo Dan. 11:31; Umbw. 17:3, 7-11

  Usesemo Cilyanyi “ciyenzu” ica mpembe ikumi icifuma mu ciwina icaula impela nupya ali mwene uwalenga 8. Nupya ibuku lyakwe Danieli likaama umwene wii ukuti “cawinyi ca ononyi.”

  Kufikiliziwa kwa usesemo Kaungwe ka League of Nations katiile ukuomba lino kwali Nkondo ya Nsi Yonsi Yakwe Ciili. Pa cisila ca nkondo, kaungwe ka UN ‘kimikwe.’ Wakwe vino cali uku kaungwe ka League of Nations, kaungwe ka UN kapeezilwe ululumbi nu mucinzi ivilinzile ukupeelwa uku Wene Wakwe Leza. Kaungwe ka UN kalazanza imipepele.

• Malembelo 1 Tesa. 5:3; Umbw. 17:16

  Usesemo Amu nsi yapunda “umutende,” nupya “impembe ikumi” ni “cilyanyi” vyazanza “cizelele” nu kumonona. Pa cisila, inko zyononwa.

  Kufikiliziwa kwa usesemo Antu amu nsi yalalanda ukuti iyaleta umutende nu kucingililwa umu nsi. Lyene, inko izikatungilila kaungwe ka UN zilonona tuungwe twa mipepele ya ufi. Kuu kulaya ali kutandika kwa ucuzi ukulu cuze. Ucuzi uwo ulasila lino Yesu alonona ivintu vyonsi ivya mu nsi yakwe Satana pa nkondo ya Alamagedoni.

• Malembelo Ezek. 38:11, 14-17; Mate. 24:31

  Usesemo Gogi alazanza impanga ya antu yakwe Leza. Lyene angeli yalalonganika “asololwe yakwe.”

  Kufikiliziwa kwa usesemo Umwene wa ku katutu na mauteeko yauze amu nsi yalazanza antu yakwe Leza. Lino papita insita kufuma pano ukuzanza kuu kulatandikila, apakwe asyalapo yalalonganikwa ukuya ukwi yulu.

• Malembelo Ezek. 38:18-23; Dan. 2:34, 35, 44, 45; Umbw. 6:2; 16:14, 16; 17:14; 19:20

  Usesemo ‘Wino wakwezile’ pa “mfwalasi itiswe” wamalila ‘ukucimvya’ kwakwe lino onona Gogi na asilika yakwe. “Cilyanyi” ‘casumbiilwe icipuma muli yemba wa moto’ nupya icinkolanya naco cononyilwe.

  Kufikiliziwa kwa usesemo Yesu Kateeka wa Wene Wakwe Leza alapususya antu yakwe Leza. Wene pamwi na ya kateeka yauze ya 144,000 ni umba lya angeli, yalonona inko izyalemenkana uku kuzanza antu yakwe Leza ni miteekele yonsi yakwe Satana.