1. U mulandu ci uno Yeova waumbiile ivintu?

INSITA imwi Yeova wali wenga. Nomba cico citalenganga auvwa ukuzukilwa. Yeova asilondekwa umuntu aliwensi ukumulenga ukuya ni nsansa. Nomba Leza walondanga na yauze kwene ukuya nu umi nu kuya ni nsansa. Ukutemwa kwalenzile Yeova atandike ukuumba ivintu.—Masa. 36:9; 1 Yoa. 4:19.

2. Uzye Yesu na angeli yuvwile uli lino Yeova waumvile ivintu?

² Pa kutandika, Yeova waumvile Umwanakwe, Yesu. Lyene Yeova na Yesu yaumvile “ivintu vyonsi” ukwikako sile na angeli. (Kolo. 1:16) Yesu watemilwe sana ukuombela pamwi na isi. (Mapi. 8:30) Na angeli kwene yatemilwe sana. Yalolangako lino Yeova na Ciinda wa Milimo Yesu yaumbanga iyulu ni nsi. Uzye yacisile uli? Lino Yeova waumvile insi “yatandike ukumulumbanya umu nsansa ala yakupunda,” nupya yatwalilile ukumulumbanya lino yaweni waumba ivintu vyuze ivyasyala sana sana lino waumvile antu. (Yobo 38:7, NWT; Mapi. 8:31) Vyonsi vino Yeova waumba vikalanga vino waya nu kutemwa na mano.—Masa. 104:24; Loma 1:20.

3. Ukulingana na 1 Kolinto 15:21, 22, i vyani vino imfwa yakwe Yesu yatucitila?

³ Yeova walondanga antunze ukwikala amanda pe umu nsi isuma ino wayapangiile. Nomba lino Adamu na Eva yapondokiile Isi uwaya nu kutemwa, uluyembu ni mfwa vyalenzile yene na ana yao ukuti yataikala amanda pe. (Loma  5:12) I vyani vino Yeova wacisile? Lilyo kwene sile walondolwile vino wali nu kupususya antunze. (Utan. 3:15) Yeova wali nu kutuma Umwanakwe kuti atufwile pakuti tukululwe uku luyembu ni mfwa. Lyene wali nu kuleka cila muntu ukuisoolwela ukumuombela nu kuya nu umi wa pe.—Yoa. 3:16; Loma 6:23; welengini 1 Kolinto 15:21, 22.

4. A mauzyo ci yano tumalandapo umu cipande cii?

⁴ Kwaya amauzyo aingi yano tunguzya pa ulayo uno Leza walaya pa kutuutulula afwe. Mauzyo wakwe, uzye ukutuutuluka kulaya uli? Uzye cilatwangukila ukwiusya ya lupwa itu aalatuutuluka? Uzye ukutuutuluka kulatuletela uli uluzango? Uzye ukwelenganya pa kutuutuluka kungatwazwa uli ukulataizya Yeova pali vino waya nu kutemwa, amano na vino wateekela? Lekini tulande pa mauzyo yaa lyonga na lyonga.

5. U mulandu ci uno tutalinzile ukwenekela ukuti antu yonsi yalatuutuluka pa nsita yonga?

⁵ Lino Yeova alatuutulula antu aingi cuze ukupitila umu Mwanakwe, tutalinzile ukwenekela ukuti antu yonsi yalatuutuluka pa nsita yonga. U mulandu ci? Pano nga caya vivyo cingalenga kuye icimvulunganya. Nupya Yeova asicita ivintu umu cimvulunganya. Wamanya ukuti pakuti umutende utwalilile, ivintu vilinzile ukutantikwa ningo. (1 Kol. 14:33) Yeova Leza wali na mano nu kuteekela lino yaombelanga pamwi na Yesu kupanga insi pakuti antu yakikalemo. Yesu nawe kwene alaya ni miyele ili imwi kwene umu Kuteeka Kwakwe Ukwa Myaka 1,000 lino wene na alapusuka pa Alamagedoni yalapekanya insi kuti aalatuutuluka yakize yakikale ningo.

6. Ukulingana ni lembelo lya Milimo 24:15, aaweni alaya pa antu aalatuutuluka?

 ⁶ Cicindamisye i cakuti, yayo aalapusuka pa Alamagedoni yalaombako umulimo wa kusakamala aalatuutuluka nu kuyasambilizya pa Wene Wakwe Leza na pali vino Yeova akalonda. U mulandu ci? Pano antu aingi aalatuutuluka yalaya pali yano Baibo ikaama ukuti “asi yalungame.” (Welengini Milimo 24:15.) Yalalondekwa ukusenuka sana pakuti yakapokelele mapaalo yano imfwa yakwe Klistu ilaleta nu kwikala manda pe. Elenganyini pali vino cilaya ukusambilizya antu aingi cuze aatamanya ivili vyonsi pali Yeova. Uzye cila muntu alakwata uwakumusambilizya wakwe vino tukatungulula masambililo ya Baibo ndakai? Uzye antu yayo yalakwata ivilongano umwakuya nu kusambiliziwa ivya kwizasambilizya aalatuutuluka pa cisila cao? Tulinzile ukulolela pakuti tukalole vino cilaya. Lelo twamanya ukuti lino Imyaka 1,000 Iya Kuteeka Kwakwe Klistu ilasila insi yonsi “ilazuula mwenemo amano akumanya [Yeova].” (Eza. 11:9) Mwandini tulakwata imilimo iingi iya kuomba lino tulaipakizya Ukuteeka Kwa Myaka 1,000!

7. U mulandu ci uno antu yakwe Leza yalayela nu luse lino yakusambilizya aalatuutuluka?

⁷ Umu Kuteeka Kwa Myaka 1,000 Kwakwe Klistu, ana yakwe Yeova yonsi apano nsi yalalondekwa ukusenuka pakuti yakamuzanzya. Fwandi yonsi yalalondekwa ukusenuka pakuti yakate ukwelenganya nu kulondesya ukucita iviipe nu kutandika ukucita vino Yeova akalonda. (1 Pet. 3:8) Ukwaula nu kutwisika yonsi aalatuutuluka yalalola ukuti antu yakwe Yeova yaicefya nupya yatwalilila ukusenuka pakuti yazanzya Yeova nupya yalalondesya ukumupepela capamwi nayo.—Filipi 2:12.

8. U mulandu ci uno tungenekela ukuti cilatwangukila ukwiusya ya lupwa itu ni vyuza aalatuutuluka?

⁸ Kwaya ivingi ivyalenga twaelenganya ukuti yayo aalapokelela alatuutuluka yalaiusya atemwikwa yao. Pa mulandu na vino Yeova watuutulwile antu yamwi mpiti, tungenekela ukuti alaumba cipya cipya antu yayo pakuti yakaloleka, ukuvwanga nu kwelenganya wakwe vino yali ala kwasyala panono ukuti yafwe. Iusyini ukuti Yesu wakolinye imfwa uku kulala utulo nu kutuutuluka uku kuzyuka. (Mate. 9:18, 24; Yoa. 11:11-13) Lino umuntu wazyuka ukufuma umu tulo, akaloleka, ukuvwika izwi nu kwelenganya wakwe vivi kwene vino alali lino atatala walala. Elenganyini pali vino vyacitiike kuli Lazalo. Wali umufwe pa manda 4, fwandi ala watandika ukuola. Nanti ciye vivyo, lino Yesu wamutuutulwile, ya kaci yakwe yamwiwisye na Lazalo kwene afwile waiwisye.—Yoa. 11:38-44; 12:1, 2.

9. U mulandu ci uno yayo aalatuutuluka yatalatuutulukila ni myelenganyizizye ni mili ivimalilike?

⁹ Yeova walaya ukuti mu Paladaise, kusi aliwensi alalanda ukuti: “Nindwala.” (Eza. 33:24, NWT; Loma 6:7) Fwandi, yayo alatuutuluka yalaumbwa cipya cipya ni miili isuma. Nomba nanti ciye vivyo yatalaya amalilike lilyo kwene. Ndi cakuti yangatuutuluka amalilike citange cangukiile ya lupwa ni vyuza ukuiusya. Cikaloleka kwati antu yalaya yakuya amalilike panono panono umu Myaka 1,000 Iya Kuteeka Kwakwe Klistu. Pa mpela ya Kuteeka Kwa Myaka 1,000 lino Yesu alaswilizya Uwene kuli Isi ali lino antu yonsi yalamalilika. Pa nsita iyo ala Uwene watiumala imilimo yonsi ukwikako sile nu mulimo wa kulenga antu yonsi  ukuya amalilike.—1 Kol. 15:24-28; Umbw. 20:1-3.

10. Uzye ukutuutuluka kulamulenga ukuvwa uli?

¹⁰ Elenganyini vino cilaya ukuzengela atemwikwa inu. Uzye uluzango luno mulakwata lulamulenga kuseka nanti ukulila? Uzye mulaya sana ni nsansa icakuti mulatandika ukwimba inyimbo zya kulumbanya Yeova? Twasininkizya ukuti tulatemwa sana Tata witu uwaya nu kutemwa pamwi nu Mwanakwe pa mulandu nu wila uno yalatupeela uwa kutuutulula afwe.

11. Ukulingana na mazwi yakwe Yesu alembwa pali Yoane 5:28, 29, i vyani vilacitikila yayo aakauvwila Leza?

¹¹ Elenganyini pali vino yayo aalatuutuluka yalaya nu luzango lino yalasenuka pakuti yakauvwila Leza. Yayo aalasenuka yalikala umu Paladaise amanda pe. Yayo alapondokela Leza yatalatwalilila ukwikala umu Paladaise nu kuvulunganya umutende.—Eza. 65:20; welengini Yoane 5:28, 29.

12. U mu nzila ci muno Yeova alapaala yonsi alaya pano nsi?

¹² Lino Uwene ulateeka, antu yakwe Leza yonsi yalalola ukuti amazwi aya api lembelo lya Mapinda 10:22 acumi, aakati: “Upolelelo wakwe [Yeova] uli uno ukalenga umuntu aye umukama, ni milimo yakwe ikome isiungilizyapo nanti conga.” Umupasi wakwe Yeova ulazwa antu yakwe ukuya wakwe Klistu nu kuya amalilike. (Yoa. 13:15-17; Efes. 4:23, 24) Cila wanda imili yao ilaya ikuyelako sile ikome nupya yalaya yakuyelako antu asuma. Ala uwo ulaya umi suma sana! (Yobo 33:25) Uzye lyene ukwelenganya pa kutuutuluka kungamwazwa uli ndakai?

13. Ukulingana na Masamu 139:1-4, uzye ukutuutuluka kulatulangilila uli vino Yeova wamanya pali sweswe?

¹³ Wakwe vino itusambilila, lino Yeova alatuutulula antu, yalaelenganya nu kuloleka wakwe vino yali lino yatatala yafwa. Elenganyini pali vino cii cikupiliula. Yeova wamutemwa sana icakuti akalola nu kwiusya vino mukaelenganya, vino mukayuvwa, vino mukavwanga na vino mukacita. Fwandi lino alamutuutulula, alamulenga mukaye vivi kwene vino mwali. Umwene Davidi wamanyile ukuti Yeova watumanya ningo swensi wenga na wenga. (Welengini Masamu 139:1-4.) Uzye tukauvwa uli nga twamanya vino Yeova watumanya ningo?

14. Uzye tukayuvwa uli nga twelenganya pali vino Yeova wamanya pali sweswe?

¹⁴ Ndi cakuti twelenganya pali vino Yeova watumanya ningo, tutalinzile ukusakamikwa. U mulandu ci? Iusyini ukuti Yeova akatusakamala sana. Akalola ukuti swensi wenga na wenga twacindama kuli aliwe. Akalola ivikatucitikila ivikalenga tuye vino twaya. Ukumanya vii kukatukomelezya! Tutalinzile ukuyuvwa ukuti twaya swenga. Cila wanda nupya cila nsita, Yeova akaya naswe nupya akatwazwa.—2 Mila. 16:9.

15. Uzye ukutuutuluka kukalenga tusininkizye uli ukuti Yeova waya na mano?

¹⁵ Ndi cakuti yamwi yakutiina ukufwa, alwani yao yangayapatikizya ukucita vino yatalinzile ukucita nga yayanena ukuti yamayakoma. Antu aakatungululwa na Satana yakapatikizya antu ukupondokela ya cuza yao nanti ukucita vino yatalinzile ukucita. Nomba swemo yatange yatupatikizye  ukucita vivyo. Twamanya ukuti ndi cakuti alwani itu yatukoma, Yeova alatutuutulula. (Umbw. 2:10) Twasininkizya ukuti pasi icili consi cino yangacita icingatulesya ukuombela Yeova. (Loma 8:35-39) Yeova watulenga tusininkizye ukuti waya na mano muli vino akatupeela upalilo wakuti kulaya ukutuutuluka. Pa mulandu na cii, tusitiina ndi cakuti antu yakwe Satana yatutiinya ukuti yamatukoma nga tutacisile vino yatunena nupya cikatulenga ukuti tuye asipe nu kutwalilila ukuya acisinka kuli Yeova.

16. A mauzyo ci yano mulinzile ukuyuzya, nupya amasuko yangamwazwa uli ukumanya vino mwataila Yeova?

¹⁶ Ndi cakuti alwani yakwe Yeova yamunena ukuti yamamukoma, uzye mulataila ukuti alamutuutulula? Uzye mungamanya uli ukuti mulamutaila pa nsita iyo nga yamutiinya? Inzila yonga ino mungacitilamo vivyo u kuyuzya mweineco muti, ‘Uzye vino nkapingulapo pa tuntu utunono cila wanda vikalanga uli ukuti nataila muli Yeova?’ (Luka 16:10) Iuzyo na lyuze lino mungayuzya i lyakuti, ‘Uzye vino nkaomvya insita ni mpiya vikalanga ukuti nataila ulayo uno Yeova walaya uwakuti alansakamala ndi cakuti nkukoleezya Uwene? (Mate. 6:31-33) Ndi cakuti mwasuka ukuti ee uku mauzyo yaa, lyene mulamanya ukuti mwataila Yeova nupya mulacimvya ndi cakuti yamutiinya uku nkoleelo.—Mapi. 3:5, 6.

17. (a) Uzye ukutuutuluka kukalanga uli ukuti Yeova wateekela? (b) Tungalanga uli ukuti tukataizya pali vino Yeova wateekela?

¹⁷ Yeova wika mpiti uwanda ni nsita lino alonona insi ii iipe. (Mate. 24:36) Atalasenula mano nu kucita vivyo lino uwanda uno wapekanya utatala wafika. Akalondesya ukutuutulula afwe nomba wateekela. (Yobo 14:14, 15) Akaloleela uwanda uwo ni nsita vikafike, alino alayatuutulula. (Yoa. 5:28) Kwaya ivingi vyalenga twataizya Yeova pali vino wateekela. Elenganyini pali cii: Pa mulandu wakuti Yeova wateekela antu aingi ukwikako naswe kwene, twakwata insita ikulu iya kulapila. (2 Pet. 3:9) Yeova akalonda antu aingi yakikale amanda pe. Fwandi lekini twalanga ukuti tukataizya pali vino wateekela. Tungalanga uli vivyo? Tungacita vivyo nga tukuombesya ukulonda yayo aya “nu mwenzo wa kulondesya ukuya nu umi wa pe” nu kuyazwa ukutemwa Yeova nu kumuombela. (Mili. 13: 48, NWT) Nayo kwene yalapaalwa pa mulandu na vino Yeova wateekela wakwe vino caya kuli sweswe.

18. U mulandu ci uno tulinzile ukuteekelela yauze?

¹⁸ Yeova alalolela ukuti Ukuteeka Kwa Myaka 1,000 kukasile alino tukaye amalilike. Lino insita iyo itatala yafika, Yeova alatwalilila ukutwelela. Fwandi tulinzile ukumukolanya nu kwika mano pa miyele isuma ino yauze yakwata nu kuyateekelela. Elenganyini pali nkazi umwi wino ya iya yatandike ukucula na masakamika nupya aatile ukulongana. Watiile: “Cantalile sana. Ivintu vyasenwike ukwaula ukwenekela nupya twatandike ukuvilwa ukucita vyonsi vino twalondanga ukucita.” Nomba nkazi wii uwaya nu kutemwa watwalilile ukuteekelela ya iya. Wataile Yeova nupya atatoovwike. Watwalilile ukwika mano pa visuma vino ya iya yacitanga wakwe vivi kwene vino Yeova akacita. Walanzile ati: “Ya wane yakwata imiyele isuma nupya yakwezya na maka ukuta ukusakamikwa panono panono.” Icicindama sana ukuteekelela ya lupwa itu nanti amu cilongano aakwezya ukucimvya intazi zino yakakwata.

19. I vyani vino tulinzile ukulondesya ukucita?

¹⁹ Yesu na angeli yali sana nu luzango lino insi yapanzilwe. Nomba elenganyini vino yalaya ni nsansa lino yalalola insi yazulamo antu amalilike aatemwa Yeova nupya aakamuombela. Elenganyini pali vino yayo aalaya ukwi yulu yalaya ni nsansa lino yalalola antu yakuipakizya ivisuma ivilacitika pa mulandu nu kuombesya kwao. (Umbw. 4:4, 9-11; 5:9, 10) Nupya elenganyini vino cilaya ukwikala umu nsi umutalaya ukulosya, ukuwaika, ukulwala, ukucula ni mfwa. (Umbw. 21:4) Twalililini ukukolanya Tata winu ukuya nu kutemwa, amano nu kuteekela ukufika lino insita iyo ilafika. Nga mwacita vivyo mulaya nu luzango asi mulandu ni ntazi zino mulakwata. (Yako. 1:2-4) Ala tukataizya sana pa ulayo uno Yeova watulaya uwakuti “kulaya ukutuutuluka”!—Mili. 24:15.