1. Uzye antu aingi yakwezya uli na maka ukuombesya umu mulimo wakwe Yeova?

TUKWETI milimo ingi lino impela ya nsi ii ikuya ikupalama. (Mate. 24:14; Luka 10:2; 1 Pet. 5:2) Swensi kwene tukalondesya ukuombela Yeova ukufika pano tungapezya. Aingi yakuombesya umu mulimo wa kusimikila. Yamwi nayo yakalonda ukuombako upainiya. Yamwi yakalonda ukuombelako pa Betele nanti ukuombako umulimo wa kukuula ivikuulwa ivikaomviwa umu mulimo wakwe Yeova. Nupya aina aingi yakaombesya pakuti yalinge ukuya aomvi akatumikila nanti ya eluda. (1 Tim. 3:1, 8) Yeova akaya sana ni nsansa ndi cakuti walola vino antu yakuipeelesya ukumuombela.—Masa. 110:3; Eza. 6:8.

2. Tungacita uli ndi cakuti tutafisilepo ukuomba imilimo imwi umu mulimo wakwe Yeova?

² Tungatandika ukutoovoka ndi cakuti tutafisilepo ukuomba imilimo ino twalondesyanga. Nupya limwi tungatoovoka pa mulandu wakuti tutange tufikepo ukuomba imilimo imwi mulandu nu kukota nanti vintu vyuze ivikatucitikila umu umi. (Mapi. 13:12) Vikwene i vyacitikiile ya Melissa. * Ya Melissa yalondesyanga ukuombela pa Betele nanti ukuya ukwi Sukulu Lyakwe ya Kakosoola ya Wene, lelo yalanzila iyati: “Nacizile pa myaka ikalondekwa pakuti umwi apeelwe imilimo ii. Insita zimwi nkatoovoka.”

3. I vyani vino yamwi yalinzile ukucita pakuti yafikepo ukuombako imilimo imwi umu mulimo wakwe Yeova?

³ Acance yamwi aya nu umi usuma, yakalondekwa ukukwata imiyele isuma iingi lino yatatala yapeelwa imilimo. Wakwe,  yamwi yangaya acenjele, kupingula ningo pa vintu nu kuitemelwa ukuomba. Nomba yangalondekwa ukusambilila ukuya ateekele, ukuomba ningo imilimo alino nu kucindika sana yauze. Ndi cakuti mukwika mano uku kuya ni miyele isuma, aina yangamupeela imilimo na lino musikwenekela. Elenganyini pali vino vyacitikiile umwina Nick. Lino wali ni myaka 20, wasosile sana pa mulandu wakuti yakanyile ukumusonta ukuya umuomvi aakatumikila. Watiile: “Nayuvwanga kwati pali vino naluvyanyizye.” Nomba umwina Nick atatoovwike. Watwalilile ukuombesya umu cilongano nu mu mulimo wa kusimikila. Ndakai waya muli Komiti ya Musambo.

4. I vyani vino tumasambilila umu cipande cii?

⁴ Uzye mwatoovoka pa mulandu wakuti mutatala mwafikapo ukuomba umulimo umwi umu mulimo wakwe Yeova? Nga avino cili, mwapepa kuli Yeova nu kumunena vino mukuyuvwa. (Masa. 37:5-7) Nupya munguzyako aina aakaomba ningo muli vyakwe Leza pakuti yamwazwe ukumanya vino mungacita pakuti mwaomba ningo umu mulimo wakwe Leza nu kwezya ukucita vino yamunena. Nga mwacita vii, mungakwanisya ukufikilizya uyo winu. Nomba wakwe vino cali kuli ya Melissa yano itulandapo mpiti, limwi ndakai mutange mukwanisye ukuomba umulimo uno mukulondesya mu mulimo wakwe Yeova. Nomba mungacita uli pakuti mukwanisye ukuya nu luzango? Pa kwasuka iuzyo lii, icipande cii cimalanda pali (1) ivingalenga muye nu luzango, (2) vino mungacita pakuti mwaya sana nu luzango, na (3) mauyo yano mungimika pakuti muye nu luzango.

5. I vyani vino tulinzile ukwikako mano pakuti tuye nu luzango? (Kasambilizya 6:9)

⁵ Ilembo lyakwe Kasambilizya 6:9 likalondolola ningo ningo icingatwazwa ukuya nu luzango. (Belengini.) Umuntu aakaikuta vino akweti, akaika mano kuli vino vikumucitikila pa nsita kwene iyo. Lelo umuntu aakatwalilila ukulonda ivintu vino atange akwate asiteeka umwenzo kuli vino akweti. Uzye lyene i vyani vino tukusambililako? Pakuti tuye ni nsansa, tulinzile ukwika mano ku vintu vino tukweti asi kwika mano uku vintu vino tutange tukwate.

6. U mulumbe ci uno tumasambililapo, nupya i vyani vino tumasambilila uku mulumbe kwene uwo?

⁶ Uzye cingacitika ukuteeka umwenzo uku vintu vino twakwata mpiti? Antu aingi yakaelenganya ukuti citange cicitike pa mulandu wakuti twatemwa ukusambilila ivintu ivipya. Nomba ukulanda sile icisinka, cingacitika. Tungateeka umwenzo uku vintu vino twakwata. Tungacita uli vivyo? Pakuti tumanye vino tungacita, lekini tusambilile pa mulumbe wakwe Yesu wa matalanti uwaya pali Mateo 25:14-30. Tumasambilila pali vino tungacita pakuti tuye nu luzango na vino tungacita pakuti twaya sana nu luzango asi mulandu ni vingatucitikila.

7. Londololini panono umulumbe wakwe Yesu uukalanda pa matalanti.

⁷ Umu mulumbe uu, umonsi wali nu kuya uku mpanga ya kutali. Lino atatala wapita, wamile aomvi yakwe nu kuyapeela cila muntu matalanti yano yali nu kucitilamo uculuzi. * Umonsi wii wamanyile ukuti aomvi yakwe yapusiine amaka, uwa kutandikilapo wamupeezile matalanti 5, wakwe ciili yaili na wakwe citatu lyonga. Aomvi ya kutandikilapo yaili yaombiisye pakuti yapange impiya izingi. Wakwe citatu atacisile ivili vyonsi umu lupiya luno yamupeezile, fwandi umusambazi wakwe wamuzinzile.

8. U mulandu ci uno umuomvi wa kutandikilapo umu mulumbe uu wayeliile sana nu luzango?

 ⁸ Umuomvi wa kutandikilako watemilwe sana pali vino umusambazi wakwe wamupeezile matalanti 5. Zyali impiya izingi sana, nupya calangilile ukuti umusambazi wakwe wamutaile. Ngu muomvi wakwe ciili? Atemwa nga watoovwike pa mulandu wakuti atapokeliile matalanti aingi wakwe vino umuomvi wa kutandikilapo wapokeliile. Nomba i vyani vino wacisile?

9. I vyani vino Yesu atalanzile pa muomvi wakwe ciili? (Mateo 25:22, 23)

⁹ Belengini Mateo 25:22, 23. Yesu atalanzile ukuti umuomvi wakwe ciili wasosile pa mulandu wakuti wapokeliile matalanti yaili. Nupya Yesu atalanzile ukuti muomvi wiya wailizyanyizye nu kulanda ukuti: ‘U mulandu ci uno musambazi wampeelela matalanti anono? Pano nani kwene nkaombesya wakwe vino umuomvi uwatapeelwa matalanti 5 akaomba. Ndi cakuti umusambazi wane akwelenganya ukuti nsiomba ningo, limwi mfwile ukuziika impiya zii nu kulaiombela nemwineco ukucila ukumuombela.’

10. Uzye umuomvi wakwe ciili waomvizye uli matalanti yano wapeezilwe?

¹⁰ Wakwe vino cali uku muomvi wa kutandikilako, muomvi wakwe ciili nawe kwene waweni ukuti umulimo uno umusambazi wakwe wamupeezile wali ucindame nupya waombisye pakuti aombele umusambazi wakwe. Na cii calenzile azanilepo matalanti na yauze yaili. Musambazi walambwile umuomvi wakwe pali vino waombisye. Musambazi watemilwe sana nu kumupeela imilimo na yuze.

11. Tungacita uli pakuti tuye sana nu luzango?

 ¹¹ Naswe kwene tungaya sana nu luzango nga tukwezya na maka ukuomba papezile maka itu lino tukuomba umulimo uli onsi uno twapeelwa umu mulimo wakwe Yeova. Mwaomvya insita inu umu mulimo wa kusimikila nu kuombesya umu cilongano. (Mili. 18:5; Aeb. 10:24, 25) Mwapekanya ningo ukulongana pakuti mwaasuka ivyasuko ivisuma ivingakomelezya yauze. Mwalola malyasi yonsi ayasambi yano mwapeelwa umu kulongana kwa mukasi ka mulungu ukuti yacindama. Ndi cakuti mwapeelwa umulimo umwi umu cilongano, mwasunga insita nu kuya akutailwa. Mutaelenganya ukuti umulimo uno umupeelwa utacindime nu kuti mutalinzile ukonona insita inu pa mulimo kwene uwo. Mwaezya na maka ukwikako mano lino mukuomba umulimo uno mwapeelwa. (Mapi. 22:29) Ndi cakuti mukuombesya lino mukuombela Yeova, mulaya cuza wakwe musuma nupya mulaya sana nu luzango. (Gala. 6:4) Nupya cilamwangukila ukuya ni nsansa ndi cakuti yauze yapeelwa umulimo umwi uno mwalondanga.—Loma 12:15; Gala. 5:26.

12. I vyani vyazwilizye ya Melissa na ya Nick ukuya sana nu luzango?

¹² Uzye mukwiusya ya Melissa yano itwalandapo umu palaglafu 2 aalondanga ukuya ku Betele nanti ukuzanwa ukwi Sukulu Lyakwe ya Kakosoola ya Wene? Nanti cakuti vino yalondanga vyakanyile ukuomba, yatiile: “Nkaombesya umu mulimo wa upainiya nu kwezya inzila izipusanepusane izya kusimikililamo. Na cii calenga inje sana nu luzango.” Nupya uzye ya Nick yazizimizye uli lino yatasonsilwe ukuya umuomvi aakatumikila? Yalanzile ukuti: “Nisile mano pali vino nakwanisyanga ukucita pa nsita kwene iya wakwe ukuombako umulimo wa kusimikila nu kwasukapo pa kulongana. Nalenzileko nu kuombelako pa Betele nupya umwaka uwalondeliilepo yangamile.”

13. I vyani vilacitika ndi cakuti mukuombesya umu milimo ino mwapeelwa ndakai? (Kasambilizya 2:24)

¹³ Ndi cakuti mukuombesya umu milimo ino mwapeelwa ndakai, uzye mulapeelwa imilimo na yuze uku nkoleelo? Ee cingacitika wakwe vino cali kuli ya Nick. Nomba ndi cakuti mutapeezilwe imilimo iyo, mungaya sana nu luzango wakwe vino cali kuli ya Melissa, nupya ukumanya ukuti mukuombela Yeova kulalenga muye ni nsansa. (Belengini Kasambilizya 2:24.) Nupya mulaya sana nu luzango ukumanya ukuti mukuzanzya Umwene witu Yesu Klistu.

14. I vyani vino tulinzile ukwiusya ndi cakuti twelenganya pa mauyo yano tukaimika lino tukuombela Yeova?

¹⁴ Ndi cakuti ndakai tukuombesya umu mulimo wakwe Yeova, uzye cikupiliula ukuti tutalinzile ukwezya na maka ukuombako imilimo yuze? Awe. Tulinzile ukwimika mauyo aangalenga tuye ya kasimikila na ya kasambilizya yasuma nu kwazwa ina itu na ya nkazi. Tungafikilizya mauyo yaa ndi cakuti tukuomba ningo nu kuicefya lino tukwika mano uku kuombela yauze ukucila sweineco.—Mapi. 11:2; Mili. 20:35.

15. A mauyo ci yamwi angalenga muye sana nu luzango?

¹⁵ A mauyo ci yano mungimika? Mwalenga Yeova ukuti amazwe ukumanya mauyo yano mungakwanisya ukufikilizya. (Mapi. 16:3; Yako. 1:5) Uzye mungimikako uyo onga pa mauyo yano itulandapo umu palaglafu 1 umu cipande cii, wakwe, ukuombako upainiya wa nsita inono nanti upainiya wa nsita yonsi, ukuombelako pa Betele nanti ukuombako umulimo wa makuule? Mungasambilila ululimi luze nanti sile ukuya umu kusimikila uku cifulo cuze. Mungasambilila ivingi pa mauyo yaa nga mwabelenga icipande 10 umwi buku lyakuti Organized to Do Jehovah’s Will nu kulanda na  ya eluda umu cilongano cinu. * Lino mukwezya na maka ukufikilizya mauyo yaa, yauze yalalola ukuti mukulunduluka nupya mulaya sana nu luzango.

16. I vyani vino mungacita ndi cakuti ndakai mwafilwa ukufikilizya uyo umwi?

¹⁶ Nomba mungacita uli ndi cakuti mutatala mwafikilizyapo uyo uli onsi pa mauyo yano itulandapo umu cipande cii? Mungimika uyo uze uno mungakwanisya ukufikilizya. Lekini tulande pali vimwi ivingamwazwa.

17. Ukulingana na 1 Timoti 4:13, 15, uzye umwina angacita uli pakuti aye kasambilizya musuma?

¹⁷ Belengini 1 Timoti 4:13, 15. Ndi cakuti mwemwe ina abatiziwe, mungezyako ukuya ya kalanda nanti ya kasambilizya yasuma. U mulandu ci? Ndi cakuti mukwezya na maka ukuya ya kabelenga, ya kalanda nupya ya kasambilizya yasuma mulaazwa sana yonsi aakukutika kuli mwemwe. Mwaezya ukwimika uyo wa kubelenga nu kuomvya vino mwabelenga umwi sambililo lyonga na lyonga umu kabuku kakuti Mwaombesya Pakuti Mwawelenga nu Kusambilizya Ningo. Mwabelenga sile isambililo lyonga, imwezya ukucita vivyo kwene vino mwabelenga lino muli uku ng’anda nupya mwaezya ukucita vivyo kwene vino mwasambilila pa kulanda ilyasi. Mwauzyako kasunda muiyele vino mungacita nanti ya eluda yauze “aakaombesya ukulanda nu kusambilizya.” * (1 Tim. 5:17) Mutaika sile mano uku kuomvya ivyeo vino mwasambilila umu kabuku kaa, lelo mwaazwa na ya kakutika inu ukukomya utailo wao nu kuyakomelezya ukuti yaomvya vino yakusambilila. Nga mwacita vii, mulaya sana nu  luzango pamwi na yonsi akukutika kuli mwemwe.

18. I vyani vingatwazwa ukufikilizya mauyo itu umu mulimo wa kusimikila?

¹⁸ Swensi kwene twapeelwa umulimo wa kusimikila nu kupanga asambi. (Mate. 28:19, 20; Loma 10:14) Uzye mungatemwa ukuzifyako imiombele inu umu mulimo uu ucindame? Mwabelenga kabuku kakuti Mwasambilizya nu kwimika mauyo angamwazwa ukucita vino mukusambilila. Mungasambilila ivya kucita umu Kabuku Kakuomvya pa Kulongana kakuti Swe Ina Klistu nu Mulimo Witu alino na mavidyo yano tukatamba pa kulongana kwa mukasi ka mulungu aakutulangilila ivya kucita. Mwaezya inzila izipusanepusane pakuti mulole ingaomba ningo. Nga mwacita vii, mulaya ya kasambilizya yasuma nupya mulaya sana nu luzango.—2 Tim. 4:5.

19. Mungacita uli pakuti muye ni miyele ino aina Klistu yalinzile ukukwata?

¹⁹ Mutalinzile ukwilila ukuti uyo ucindame sana uno mungimika u wakuya ni miyele isuma iikazanzya Leza. (Gala. 5:22, 23; Kolo. 3:12; 2 Pet. 1:5-8) Mungacita uli pakuti mufikilizye uyo uwo? Limwi mukulonda ukuya nu utailo ukome. Mungabelenga ivipande ivyaya umu mpapulo zitu ivingamwazwa ukumanya ivya kucita pakuti muye nu utailo ukome. Ukutamba iviputulwa ivikaya muli JW Broadcasting^® ivikalangilila vino aina na ya nkazi yakalanga utailo uiyele asi mulandu ni ntazi zino yakweti vingamwazwa sana. Lyene mwalola inzila zino mungakolanyizizyamo utailo wao.

20. Tungacita uli pakuti tuye sana nu luzango nu kucefyako ukuvwa uyi ndi cakuti vimwi vyakana ukuombeka ningo?

²⁰ Ukwaula nu kutwisika, swensi kwene tukalonda ukuombesya umu mulimo wakwe Yeova ukucila vino tukaomba ndakai. Umu nsi ipya tulaombesya lino tukuombela Yeova ukwaula ivya kutupumvyanya. Lino tukuloleela insita iyo, twaezya na maka ukuomba pano tungapezya ndakai. Nga twacita vivyo, tulaya sana nu luzango nu kucefyako ukuvwa uyi ndi cakuti vimwi vitaombike ningo. Ni cicindamisye i cakuti tulalenga umucinzi nu lulumbi viye kuli Yeova, “Leza wa nsansa.” (1 Tim. 1:11) Fwandi lekini twazangila umu milimo ino twapeelwa.