1, 2. (a) U mulimo ci uno Yesu wacindike sana, nupya u mulandu ci? (b) I vyani vino tulinzile ukucita pakuti ‘twaombela pamwi na Leza’?

YESU KLISTU wali a kawaza nupya umuomvi wakwe Leza. (Mako 6:3; Loma 15:8) Wamanyile ningo sana imilimo yonsi yoili. Vino waombanga ni mbao, wasambilile ivya kuomvya iviombelo pa kupanga ivintu ivipusane pusane ukuomvya imbao. Vino wasambilizyanga antu ilandwe lisuma, waomvyanga ningo vino wamanyile pa Malembelo ukusambilizya antu icumi ca muli Baibo. (Mate. 7:28; Luka 24:32, 45) Lino Yesu wafisizye imyaka 30, watiile umulimo wa kuwaza pano wamanyile ukuti ukuombela Leza ali mulimo uno wacindime sana kuli aliwe. Walanzile ukuti umulimo wa kukosoola ilandwe lisuma ilya Wene Wakwe Leza ali mulandu onga uno Leza wamutumiile ukwiza pano nsi. (Mate. 20:28; Luka 3:23; 4:43) Yesu wasumvile sana mano uku mulimo wa kusimikila, nupya walondanga antu na yauze yaombako umulimo kwene uwa.—Mate. 9:35-38.

² Limwi tutanga tumanye umulimo wa kuwaza, nomba twamanya umulimo wa kukosoola ilandwe lisuma. Umulimo uu wacindama sana pano Leza aakatwazwa nupya ‘sweswe aomvi aakaombela pamwi na aliwe.’ (1 Kol. 3:9; 2 Kol. 6:4) Twamanya ukuti ‘amazwi yakwe Yeova yonsi acumi.’ (Masa. 119:159, 160) Ali mulandu kwene uno tukalondela ukuti ‘twasambilizya ningo ilandwe lya cumi cakwe Leza’ umu mulimo witu uwa kusimikila. (Welengini 2 Timoti 2:15.) Fwandi tukatwalilila  ukwezya na maka ukumanyilako ukuomvya ningo Baibo, iciombelo icacindama sana cino tukaomvya umu mulimo wa kusambilizya icumi pali Yeova, Yesu, na pa Wene. Pakuti twaomba ningo umu mulimo wa kusimikila, iuvi lyakwe Yeova lyatupekanyizizya iviombelo na vyuze vino tulinzile ukumanya ningo. Tukavyama ukuti Iviombelo Vino Tukaomvya pa Kusambilizya.

3. I cani cino tulinzile ukusumbako sana mano umu nsita ino tukweti iyatisyalako iya kusimikila, nupya ilembelo lyakwe Milimo 13:48 likatwazwa uli ukucita vivyo?

³ Limwi cingamuzungusya umulandu uno tukalandila ukuti Viombelo Vino Tukaomvya pa Kusambilizya tusiti Viombelo Vino Tukaomvya pa Kusimikila. “Ukusimikila” kukapiliula ukukosoola ilandwe, nomba “ukusambilizya” kukapiliula ukwazwa umuntu ukwiusya ivyeo nupya vilinzile ukumufika pa mwenzo pakuti angaomvya vino akusambilila. Mu nsita ino tusiile nayo iya kuomba umulimo uno Leza watupeela, tulinzile ukusumba sana mano uku kutandika ukusambilizya antu Baibo pakuti yamanye icumi. Cii calola umukuti tulinzile ukulonda antu yonsi aaya ‘nu mwenzo wakulondesya ukuya nu umi wa pe’ nu kuyazwa ukumanya icumi.—Welengini Milimo 13:44-48.

4. Uzye tungamanya uli antu ‘akalondesya ukuya nu umi wa pe,’ nupya tungayazana uli?

⁴ Uzye tungamanya uli antu ‘akalondesya ukuya nu umi wa pe’? Wakwe vino cali umu manda ya Ina Klistu akutandikilako, inzila sile yonga ino tungazanilapo antu yayo u kusimikila ilandwe lisuma. Fwandi tulinzile ukucita wakwe vino Yesu watunenyile ukuti: “Mu musumba onsi nanti umuzi uno mwingilamo, londini umuntu angamupokelela.” (Mate. 10:11) Tusienekela ukuti antu aataya na ucisinka, acilumba, nanti yayo atatemwa Leza yangasumba mano ukwi landwe lisuma. Tukalonda antu acisinka, aicefya, nupya akalondesya ukuvwa icumi. Tungakolanya vii kuli vino Yesu wacitanga lino wali a kawaza. Limwi walondanga imbao izisuma izya kupangila ivya mu ng’anda, ivisaasa, amayoko, ni vintu vyuze. Ndi wazana imbao izisuma, lyene watolanga iviombelo, aomvya vino wamanya, nu kupanga cino akasi ukuti apange. Naswe avino tulinzile ukucita, tulinzile ukwezya na maka ukuzana antu aya ni myenzo ya ufumacumi pakuti tungayapanga ukuya asambi.—Mate. 28:19, 20.

5. I vyani vino tulinzile ukumanya pa Viombelo Vino Tukaomvya pa Kusambilizya? Langililini. (Lolini cikope ca kutandikilako.)

⁵ Wakwe vino caya uku viombelo vyonsi, cila ciombelo cakwata umulimo uno cikaomba. Elenganyini pa viombelo vya kuomvya pa kuwaza, wakwe vino Yesu waomvyanga. * Walondekwanga iviombelo pakuti apime imbao, ukuputula, ukutulula, nu kuzipala ukulingana na vino akulonda zyaloleka alino nu kuzilinganya, ukupima ukulola ndi imbao izyololoka, nu kulemenkanya imbao pamwi. Vikwene avino caya nu ku viombelo vino tukaomvya pa Kusambilizya. Vyakwata imilimo ipusanepusane. Fwandi lekini tulole pa viombelo vino twakwata pakuti tungamanya ivya kuviomvya.

6, 7. (a) Uzye mukaomvya uli tumakadi twakwe jw.org? (b) I vintu ci viili vino kapepala ka kwamilako antu mu kulongana kakaomba?

⁶ Tumakadi twakwe jw.org. Tuombelo tuu u tunono nomba tungatuomvya ukukuimanyisya nu kutungulula antu kuli webusaiti itu, kuno yangasambilila ivingi pali sweswe nu kuleenga ukusambilila Baibo. Ukufika ndakai, antu ukucila pali 400,000 yalenga ukusambilila Baibo pa jw.org, nupya cila wanda antu aingi yakalenga ukuti yasambilila! Fwandi mungaasendako tumakadi twakwe jw.org pakuti mungaasimikila antu lino mukuomba imilimo yakwe cila wanda.

⁷ Twakwamilapo antu. Akapepala kano tukaama ukuti akakwamilako antu umu kulongana kakaomba ivintu viili. Kakati: “Tukumulaalika kuti mwasambilila Baibo ni Nte Zyakwe Yeova.” Lyene  kakalanda na vino umwi angasoololapo ukucita, kulikuti “pa kulongana kwitu kwa yantu yonsi” “nanti ukukwata uwa kumusambilizya.” Fwandi akaombelo kaa kasitumanyisya sile lelo kakalaalika na antu yano ‘yakalondekwa vyakwe Leza’ ukuti yangasambilila Baibo naswe. (Mate. 5:3) Ukuya kwene, antu yangiza yazanwe uku kulongana kwitu asi mulandu yakasambilila Baibo nanti foo. Ndi cakuti yazanwa umu kulongana, yalailolela nu kuvwa vino tukasambilizya ivya cumi ivyaya muli Baibo.

8. U mulandu ci uno cacindamila ukuti antu iiza umu kulongana kwitu nanti sile umuku onga? Landini ivyacitiike.

⁸ Cacindama sana ukutwalilila ukwama antu ukwiza longana naswe nanti sile umuku onga. U mulandu ci? Pano alino yangailolela aineco vino ukupepa Leza umu nzila isuma kwazipa pa kulongana kwitu, ukupusanako na vino caya muli Babiloni Mukalamba. (Eza. 65:13) Ya Ray na ya Linda, atwalana aku United States yailolile vii pa myaka ya ku cisila. Yapingwile ukuti yalinzile ukutandika ukuya uku calici. Yazumiile muli Leza nupya yalondanga vyakwe Leza, fwandi yatandike ukuya uku macalici yonsi aali umu musumba uno ikalangamo. Kwali amacalici aingi. Ukufuma sile pano yatandikiile, atwalane yaa yapingwilepo ukuti yaalinzile ukuzana icalici umwali ivintu viili vino yalondanga. Cakutandikilako, yaalinzile ukusambilila vimwi kwi calici lino yaya mu kupepako, cakwe cili, antu amwi calici lilyo yaalinzile ukuloleka ukuti yakaimililako Leza. Lino papisile imyaka, yaile uku macalici yonsi aali umwi tauni lino ikalangamo, nomba pasi kuno yatemilwe. Pasi vino yasambiliile, nupya amu macalici yataalolekanga kwati aakapepa. Wanda umwi lino yafumile umwi calici lya kusyalikizya pali yano yalemvile pipepala, ya Linda yaile uku ncito lyene ya Ray nayo yatandike ukuya uku ng’anda. Lino ya Ray yaali umu nzila ala yakuya uku ng’anda, yapitiile pa Ng’anda ya Wene nupya yelenginye yati, “U mulandu ci uno ntanga ningililemo nu kulola ivikucitika?” Vino yazanyile vyayazanzizye sana ukucila konsi kuno yailepo! Yonsi apa Ng’anda ya Wene yaali ni nsansa na ucuza nupya imizwalile yao yaali ningo sana. Ya Ray ikazile apa cilimba ca ku nkoleelo nupya yatemilwe vino yasambiliile! Cali wakwe vino umutumwa Paulo walanzile pa muntu uwiza umu cilongano umu kulongana pa muku wa kutandikilako nu kulanda ati: “Cumi kwene Leza ali pakasi kinu.” (1 Kol. 14:23-25) Ya Ray yatandike ukuzanwa umu kulongana lyonsi pa Mulungu, nupya yatandike nu kuzanwa mu kulongana kwa mukasi ka mulungu. Ya Linda nayo yatandike ukulongana, nupya lino yonsi yoili yaali ni myaka uku ma 70, yatandike ukusambilila Baibo nupya izile yawatiziwa.

9, 10. (a) U mulandu ci uno utupepala twi landwe twangupalila ukuomvya? (b) Londololini ivya kuomvya akapepala ki landwe akakuti, Uzye Uwene Wakwe Leza I Cani?

⁹ Tupepala twi landwe. Twakwata utupepala twi landwe 8 utwangupala ukuomvya utwakutandikilako ukulanzyanya na antu. Ukufuma pano utupepala tuu utwi landwe twatandikile ukufuma umu 2013, yatupulinta ukufika na kuli 5 bilyoni! Usuma wa tuombelo tuu u wakuti ndi mwamanya ivya kuomvya konga, ala mungaomvya tonsi kwene pano twapangwa umu nzila ikolane. Uzye mungaomvya uli akapepala ki landwe pakuti mutandike ukulanzyanya nu muntu?

¹⁰ Limwi mungasoolola ukuomvya ka pepala ki landwe akakuti Uzye Uwene Wakwe Leza I Cani? Langini umuntu icuzyo icili apifwa lya kutandikilako lino mukuuzya ukuti: “Uzye mukaelenganya ukuti uwene wakwe Leza i cani? Uzye mungati a . . . ?” Lyene muzyini icasuko cino angasoolola pali vitatu. Ukwaula ukwasuka ukuti icasuko cakwe cili sile ningo nani foo, yulini pano pakati “Vino Baibo Ikasambilizya” umukasi. Nupya lanzyanyini pa Malembelo alipo, Danieli 2:44 na Ezaya 9:6. Ndi cingacitika twalililini ukulanzyanya. Icakusyalikizya, uzyini iuzyo lino muliza mutandikileko api ifwa lya kusyalikizyako apali ka  mutwe kakuti “Ivya Kwelenganyapo”: “Uzye umi ulaya uli lino Uwene Wakwe Leza ulateeka?” Cii cilalenga ukuti mukakwate apakuyatandikila lino mwaswilila uku muntu wiyo. Ndi mwakomaana nupya, mungaya umu Cipande 7 umu kabuku kakuti Ilyasi Lisuma Lino Leza Akutunena!, akaya pa viombelo ivya kutwazwa ukutandika masambililo ya Baibo.

11. U mulandu ci uno yakalembela ya magazini, nomba i vyani vino tulinzile ukumanya pali ya magazini kwene yayo?

¹¹ Ya Magazini. Lupungu na Zyukini! ali mpapulo zino zikalembwa sana nu kusenulwa umu nsi yonsi! Vino impapulo zii zikakwata ivyeo ivingaomviwa konsi umu nsi, inkupo zikapangwa umu nzila yakuti antu konsi yangatemwa vino yalola. Tulinzile ukuomvya iviombelo vii pakuti tungakomelezya antu ukulondesya ukuvwa ivintu ivicindame sana umu umi. Pakuti twapeela antu yano tulinzile ukupeela ya magazini yaa, tulinzile ukumanya antu yano ulupapulo lulo lwalembelwa.

12. (a) Uzye Zyukini! ikalembelwa antu ya musango ci, nupya u mulimo ci uno ikaomba? (b) Uzye iciombelo cii camwazwa uli?

¹² Zyukini! ikapangilwa ya kawelenga yano yatamanya ivingi na yano yatamanya nanti kamwi pali Baibo. Limwi yatanga yamanye nanti kamwi pa visambilizyo vya Ina Klistu, limwi yangatwisika imipepele yonsi, nanti limwi yatanga yamanye ukuti Baibo ikaazwa antu. Umulimo ucindame uno Zyukini! ikaomba, u kwazwa akuwelenga ukusininkizya ukuti Leza akuno waya. (Loma 1:20; Ayeb. 11:6) Nupya yapangwa umu nzila yakuti ingazwa akuwelenga ukukwata utailo uwakuti Baibo a “mazwi yakwe Leza, . . . mu cumi.” (1 Tesa. 2:13) Ya magazini yatatu amu 2018 yakwata imitwe ya malyasi aapa nkupo aakuti: “Ivingamwavwa Kuya ni Nsansa,” “Ivintu 12 Ivingaavwa Indupwa Ukuya ni Nsansa,” na “Ivingavwa Ali nu Ulanda.”

13. (a) Uzye Lupungu Lwa Mulinzi ulwa yantu yonsi lwapangilwa antu ya musango ci? (b) Uzye mukaomvya uli ningo iciombelo cii?

¹³ Lupungu Lwa Mulinzi, ulwa yantu yonsi, lukalanda sana pali vyakwe Leza kuli yayo amanyako panono Leza nu kumucindika alino nu kumanyako ivya muli Baibo. Nanti icakuti yangamanyako vimwi pali Baibo, yatamanya ivya cumi pa visambilizyo ivyayamo. (Loma 10:2; 1 Tim. 2:3, 4) Ya magazini yatatu amu 2018 yakwata imitwe ya malyasi aapa nkupo aakuti: “Uzye Baibo Ingatwazwa na Ndakai Kwene?,” “I Vyani Ivilacitika Uku Nkoleelo?,” na “Uzye Leza Wamwikako Mano?”

14. (a) Uzye amavidyo 4 aaya pa Viombelo Vino Tukaomvya pa Kusambilizya, yakaomba umulimo ci? (b) I visuma ci ivyacitiike lino mwatambisyanga ma vidyo kwene yaa?

¹⁴ Mavidyo. Umu manda yakwe Yesu, ya kawaza yaomvyanga iviombelo vya ku minwe pa kuwaza. Ndakai lyene kwaya ni viombelo vya malaiti, wakwe, ivya kuputwilako imbao, ivya kutulwilako, ivya kutelefezya, ivya kuomvya pa kupampamila insunga, na vyuze ivingi. Pa mpapulo izikapulintwa ndakai, twakwata na mavidyo akutambisya antu, nupya ali 4 pali yayo yaya pa viombelo vino tukaomvya akuti: U mulandu ci Uno Mulinzile Ukusambilila Baibo?, I Vyani Vikacitika pi Sambililo Lya Baibo?, I Vyani Vikacitika pa Ng’anda ya Wene?, ni yakuti Mwamanyapo Vyani pa Nte Zyakwe Yeova? Amavidyo aatafika ku mamineti yaili ukutalimpa yakaomba ningo ukutambisya antu pa muku wa kutandikilako. Ataliko yangaomviwa pa muku uno mwaswililako uku yantu akweti insita. Iviombelo kwene vii ivisuma cuze vikacincizya antu ukutandika ukusambilila Baibo nu kutandika ukuzanwa umu kulongana.

15. Langililini vino ukutamba mavidyo itu umu ndimi zino antu yakavwanga kungalenga yacitepo vimwi.

¹⁵ Lino nkazi umwi wakomenkine nu mwanaci uwafumile uku Micronesia aakavwanga ululimi lwa Ciyapese, nkazi wamutambisizye ka vidyo kakuti U mulandu ci Uno Mulinzile Ukusambilila Baibo? umu lulimi lwakwe. Lino vidyo yatandike ukutambika,  umwanaci walanzile ati: “U lulimi lwane luu. Ntanga nzumile! Imivwangile yakwe ikuvwika ukuti wafuma uku cilila ca kumwitu. Akavwanga ululimi lwane!” Pa cisila walanzile ukuti, wali nu kuya welenga alino nu kutamba vyonsi umu lulimi lwakwe pa jw.org. (Loliniko na Milimo 2:8, 11.) Kuli na cuze icacitiike. Nkazi umwi uwa ku United States watumiile umwanasenge wakwe ka linki akakuyulilapo kavidyo akalikamwi kwene umu lulimi luno umulumendo wiyo walandanga. Wakatamvile nu kutumila nyinasenge amazwi pa intaneti akuti: “Ciputulwa icalandanga pa mwipe ukutungulula insi camfisile sana pa mwenzo. Nalemvile amazwi pa intaneti akulengelapo ukusambilila Baibo.” Akaikala umu mpanga ino yainda umulimo witu!

16. Londololini cino yapangiile akabuku konga na konga pali tuu: (a) Mwauvwila Leza Alino Mulikala Amanda Pe. (b) Ilyasi Lisuma Lino Leza Akutuneena! (c) Uzye Ndakai Aaweni Aakacita Vino Yeova Akaalonda?

¹⁶ Tumabuku. Uzye mungasambilizya uli umuntu icumi atamanyikisya ukuwelenga nanti wino impapulo zitu zitaya mu lulimi lwakwe? Twakwata iciombelo ica kuomvya alikuti kabuku kakuti, Mwauvwila Leza Alino Mulikala Amanda Pe. * Iciombelo cimwi icisuma sana a kabuku kakuti Ilyasi Lisuma Lino Leza Akutuneena! Mungalanga umuntu amalyasi 14 yano yatantika uku nkupo yakusyalikizya nu kuleka amunene ilyasi lino watemwa sana. Lyene mungatandikilapo ukumusambilizya umwi sambililo kwene lilyo. Uzye mwezyapo ukucita vikwene lino mwaswilila kuli umwi? Kabuku kakuti Uzye Ndakai Aaweni Aakacita Vino Yeova Akaalonda? ali kabuku kakwe citatu pa viombelo. Kalembwa pakuti katungulula antu ukwi uvi litu. Pakuti mumanye ivya kukaomvya api sambililo ilililyonsi, lolini kabuku kakuti Swe Ina Klistu nu Mulimo Witu​—Kabuku Kakuomvya pa Kulongana kakwe Maaci 2017.

17. (a) U mulimo ci uno mabuku yano tukaomvya pa kusambilizya antu Baibo yakwata? (b) I cani icikalondekwa kuli yonsi akalunduluka nu kuwatiziwa, nupya u mulandu ci?

¹⁷ Mabuku. Pa cisila ca kutandika ukusambilila nu muntu umu kabuku, pa nsita iliyonsi sile mungatandika ukusambilila nawe umwi buku lyakuti Uzye Baibo Ikatusambilizya Vyani? Iciombelo cii cilazwa musambi ukumanya ivingi pa visambilizyo ivyaya muli Baibo. Pa cisila ca kumalilila ukusambilila ibuku lii nupya ndi cakuti umusambi akulunduluka muli vyakwe Leza, mulinzile ukutwalilila ukusambilila umwi buku lyakuti Vino Tungikala mu Kutemwa Kwakwe Leza. Iciombelo cii cilasambilizya umusambi ivya kuomvya ivisinte vya muli Baibo muli vino akacita cila wanda. Mwaiusya ukuti, na pa cisila cakuti apya yawatiziwa, yalinzile ukutwalilila ukusambilila ukufikila lino yamala amabuku yonsi yoili. Cii cilayazwa ukulemasya sana icumi.—Welengini Kolose 2:6, 7.

18. (a) Uzye amazwi aaya pali 1 Timoti 4:16 yakatukomelezya ukucita vyani swemuno tukasambilizya antu icumi, nupya i vyani ivingafumamo? (b) Uuyo ci uno tulinzile ukukwata lino tukuomvya Viombelo Vino Tukaomvya pa Kusambilizya?

¹⁸ Swe ya Nte Yakwe Yeova, twapeelwa ‘ilandwe lisuma ilya cumi,’ ilingatungulula antu uku umi wa pe. (Kolo. 1:5; welengini 1 Timoti 4:16.) Fwandi twapeelwa Viombelo Vino Tukaomvya pa Kusambilizya apaya vyonsi ivikalondekwa. (Lolini akambokosi kakuti “ Viombelo Vino Tukaomvya pa Kusambilizya.”) Si lekini twaomvya ningo iviombelo vii apapezile amaka itu. Kasimikila wenga na wenga angapingulapo ulupapulo lwa kuomvya uku muntu akulonda ukusambilila apa nsita iliinge. Nomba tutalinzile ukupeela antu impapulo icipeelepeele, tutalinzile ukupeela antu impapulo zitu asilonda ukuvwa vino tukuyasimikila. Uyo witu u wa kupanga asambi pa yantu yano yaya na ucisinka, aicefya, nupya akalonda vyakwe Leza, kulikuti antu ‘aakalondesya ukwizaya nu umi wa pe.’—Mili. 13:48; Mate. 28:19, 20.