1. A mazwi ci aakucelula yano Paulo walembiile Aina Klistu apakwe?

“MUTAKOLANA,” avino Paulo walanzile. Mutakolana na cani? “Mutakolana na antu amu nsi mu miyele yao.” (Loma 12:2) Paulo walemvile amazwi yaa ku Ina Klistu ya kutandikilako. U mulandu ci uno wacelwilile aonsi yaa na anaci ukwaula nu kupita mu mbali aaipeezile kuli Leza nupya ali apakwe nu mupasi wa muzilo?—Loma 1:7.

2-3. Uzye Satana akaezya uli ukututalusya kuli Yeova, nomba tungacita uli pakuti tufumye imyelenganyizizye iipe iyaya wa ‘malinga akome’ mu melenganyo itu?

² Paulo wasakamile pano na Ina Klistu yamwi yaatandike ukuya ni myelenganyizizye na mano ya mu nsi ii yakwe Satana. (Efes. 4:17-19) Cii cingacitika na kuli sweswe kwene. Satana ali kateeka wa nsi ii, nupya angaomvya inzila izipusanepusane pakuti sile atutalusye kuli Yeova. Ndi cakuti tukulonda antu yatucindike nanti ukuti tulumbuke, Satana angaomvya vivyo kwene pakuti aezye ukututalusya kuli Yeova. Nupya limwi angaomvya, ni nkulilo itu, intambi, nanti amasambililo yano twakwata pakuti alenge ukuti twaelenganya kulingana na vino akulonda.

³ Uzye icangupale ukufumya ivintu iviipe ivyaya wa ‘malinga akome’ vino Satana wika mu melenganyo itu? (2 Kol.  10:4) Uvwini vino Paulo waswike, watiile: “Swemo tukaonona kwelenganya kwa ntumpu nga ni citutumusi cino cikalenga kuti muntu ali wensi atamanya Leza. Swemo tukaongola melenganyo ya antu nu kulenga kuti yayela Klistu.” (2 Kol. 10:4, 5) Ica cumi ndi cakuti Yeova watwazwa tungacimvya amelenganyo aipe. Wakwe viivi kwene vino umulembo ukalenga sumu ate ukuomba, avino ni Izwi Lyakwe Leza lingatwazwa ukonona amelenganyo aipe aya wakwe sumu amu nsi ii yakwe Satana.

4. Uzye sweingi twalondekwanga ukusenuka muli vyani lino twasambilile sile icumi?

⁴ Elenganyini pali vino mwalondekwanga ukusenuka lino mwasambilile icumi icaya umwi Izwi Lyakwe Leza nu kutandika ukuombela Yeova. Pakuti tuombele ningo Yeova, sweingi twalondekwanga ukuta ukucita iviipe. (1 Kol. 6:9-11) Tukataizya sana pali vino Yeova akatwazwa ukuta ukucita ivintu iviipe!

5. I vintu ci viili vino ilembelo lyakwe Loma 12:2 likatunena ukucita?

⁵ Nomba nanti ciye vivyo, tutalinzile ukulola ukuti vino twasenuka casila. Nanti i cakuti twata ukucita ivintu ivipiisye vino twacitanga lino tutatala twawatiziwa, tulinzile ukutwalilila ukutaluka ku ciliconsi icingalenga twalonda ukuswilila ku kucita vintu vino twacitanga. Uzye tungacita uli vivyo? Paulo waswike ati: “Mutakolana na antu amu nsi mu miyele yao, lelo lekini Leza apindulule myenzo inu kuti imyelenganyizizye inu iye ipya.” (Loma 12:2) Fwandi tulinzile ukucita ivintu viili. Ica kutandikilako, tutalinzile ‘ukukolana’ na antu ya muno nsi. Cakwe ciili, tulinzile ukuleka Leza “apindulule” imyelenganyizizye itu.

6. I vyani vino tukasambilila ku mazwi yakwe Yesu aya pali Mateo 12:43-45?

⁶ Ukusenuka kuno Paulo walandangapo kwaluta pa kusenuka sile muli vino tukaloleka ukunzi. Kukalozya ku kusenuka muli vyonsi sile. (Lolini kambokosi akakuti  “ Uzye Mwasenuka Umu Cumi Nanti Foo?”) Tukalondekwa ukusenuka mu cumi alikuti ukusenula miyele itu, amelenganyo alino na vino tukalondesya ukucita. Fwandi swensi kwene tulinzile ukuyuzya sweineco tuti: ‘Uzye ukusenuka kuno nkusenuka pakuti inje Umwina Klistu u kwakuti sile yauze yalole, nanti nkusenuka ukuti inje Umwina Klistu mu cumi?’ Umu mazwi aya pali Mateo 12:43-45, Yesu walanzile vino tulinzile ukucita. (Welengini.) Amazwi yaa yakatusambilizya isambililo ilicindame: Tutalinzile sile ukucimvya amelenganyo aipe, lelo tulinzile nu kutandika ukwelenganya vino Leza akalonda.

7. Uzye tungacita uli pakuti tusenuke muli vino twaya mukasi?

⁷ Uzye cangupala ukusenuka muli vino twaya mukasi? Izwi Lyakwe Leza likaati: “Myenzo inu nga na yakampingu inu viye vipya, nupya zwalini untu upya, uno waumvilwe mu mwata wakwe Leza. Lyene mulaya aololoke nupya amuzilo.” (Efes. 4:23, 24) Fwandi tungasenuka muli vino twaya mukasi, nomba citangupala ukucita vivyo. Tulinzile ukucita na vyuze ukucila sile pa kuta ukwelenganya ivipe nu kuta ukucita ivintu iviipe. Tulinzile ukuleka “myenzo itu nga na yakampingu itu viye vipya.” Mu kucita vivyo mwaya nu kusenuka muli vino tukalonda, vino tukacita, alino nu mulandu uno tukacitila ivintu vimwi. Tukalondekwa ukuombesya.

8-9. Uzye ivyacitikile umwina umwi vikutulanga uli mulandu uno cacindamila ukusenuka muli vino twaya mukasi?

⁸ Lekini tulande pa mwina uwali umunkalwe mpiti. Pa cisila cakuta ukukoleka nu lwete, wawatiziwe, na cii calenzile apange izina lisuma mu muzi uno wikalangamo. Nomba pa cisila sile ca kuwatiziwa, amanguzi, weziwe mu nzila ino atenekelanga. Umonsi uwakolike wizile pa ng’anda paakwe nupya walondanga ukuti alwe nu mwina. Pa kutandika umwina atalondanga ukuti yalwe. Nomba lino umonsi uwalondanga ukuti yalwe wapontiile izina lyakwe Yeova, umwina wii wasosile sana i cakuti wafizilwe ukuikanya. Wafumile panzi nupya waile auma umonsi wiya. U mulandu ci uno wacitiile vivyo? Nanti i cakuti ukusambilila Baibo kwamwavwile ukuta unkalwe, wali ala atatala waleka umwenzo wakwe na kampingu wakwe ukuya ivipya. Mu mazwi yauze, wali ala atatala wasenuka muli vino wali mukasi.

⁹ Nomba nanti ciye vivyo, umwina wii atatoovwike. (Mapi. 24:16) Pa mulandu wakuti ya eluda yamwazwile, watwalilile ukulunduluka. Mu kuya kwa nsita wizile alinga nu kuya eluda. Lyene wanda umwi amanguzi, ala ali pa ng’anda ya wene na ya eluda yauze, wakweti uwezyo uliumwi na uno wakweti imyaka ya ku cisila. Umonsi umwi uwakolike walondanga ukuma eluda muze. Uzye umwina wii wacisile uli? Wateekile nu kulanzyanya mu nzila isuma nu monsi wiya uwakolike, amuteekezya nu kumutwala ku ng’anda. I cani calenzile umwina wii acite ivintu mu nzila ipusaneko umuku uu? Umwina walesile umwenzo wakwe na kampingu wakwe ukuya ivipya. Wizile aya muntu wa mutende nupya umuicefye, na cii calenzile Yeova ukulumbanyiziwa.

10. I vyani vino tulinzile ukucita pakuti tusenuke muli vino twaya mukasi?

¹⁰ Ukusenuka kuu kusiiza sile papo kwene, nanti ukuicitikila sile ukwaula ukuti umwi aombesye. Limwi tungalondekwa ukuombesya pa myaka iingi. (2 Pet. 1:5) Ukusenuka kuu kutalacitika sile pa mulandu wakuti twaombela Yeova pa myaka iingi. Tulinzile ukwezya na maka itu yonsi ukusenuka muli vino twaya mukasi. Kwaya vingi ivingatwazwa ukusenuka. Lekini tulande pali vimwi.

11. Uzye ipepo lingatwazwa uli ukuleka imyenzo itu na ya kampingu itu ukuya ivipya?

¹¹ Ica kutandikilapo icicindame sana cino tulinzile ukucita u kupepa. Tulinzile ukupepa wakwe vino kalemba wa masamu wapefile, uwatiile: “We Leza, mpeko umwenzo wa kuyela uwike munondi umwenzo upya uposye.” (Masa. 51:10) Tulinzile ukunena Yeova ukuti tukulonda ukusenuka mu myelenganyizizye itu nupya tulinzile ukumulenga ukuti atwazwe. Uzye tungasininkizya uli ukuti Yeova amatwazwa ukusenuka? Tungakomeleziwa kuli vino Yeova walavile ukucita ku ina Izlaeli ali akome imyenzo mu manda yakwe Ezekelo ati: “Ndayapeela umwenzo upya, nga ndiika umi upya munoyali . . . nu kuyapeela umwenzo utonte wa munyefu.” (Ezek. 11:19) Yeova waitemilwe ukwazwa aina Izlaeli yaya ukusenuka, nupya naswe kwene waitemelwa ukutwazwa.

12-13. (a) Ukulingana na amazwi aya pali Masamu 119:59, i vyani vino tulinzile ukwelenganyapo? (b) A mauzyo ci yano tulinzile ukuyuzya sweineco?

¹² Icintu cakwe ciili icicindame icingatwazwa u kwelenganya. Lino tukuwelenga Izwi Lyakwe Leza cila wanda, tulinzile ukukwata insita ya kwelenganya sana pali vino tukuwelenga alino na vino vingatwazwa ukusenuka. (Welengini Masamu 119:59; Ayeb. 4:12; Yako. 1:25) Tulinzile ukulola ndi cakuti tuli na melenganyo nanti amano ya muno nsi. Tulinzile ukumanya ningo muno twatonta nupya tulinzile ukuombesya pakuti tucimvye intazi iyo.

¹³ Mwatala imuyuzya mweineco muti: ‘Uzye nakwata uzuwa mu mwenzo?’ (1 Pet. 2:1) ‘Uzye nkaelenganya ukuti nacindama ukuluta yauze pa mulandu na kuno nafuma, masambililo yano nakwata, nanti impiya zino nakwata?’ (Mapi. 16:5) Uzye nkaelenganya ukuti naluta antu aatakwata ivintu vino nemo nakwata nanti yano twapusana nayo inkanda?’ (Yako. 2:2-4) ‘Uzye natemwa ivintu vino Satana waleta umu nsi ii?’ (1 Yoa. 2:15-17) ‘Uzye nkaipakizya ukucitako nanti ukutamba ivya kuizanzya umwaya imiyele iipe nu unkalwe?’ (Masa. 97:10; 101:3; Amo. 5:15) Ndi cakuti mwasuka amauzyo yaa, limwi mumazana ukuti pali muno mulinzile ukuombela. Ndi cakuti twacimvya ivintu vii ivyaya wa ‘malinga akome’ mu myenzo itu, tulalenga Tata witu wa kwi yulu ukulumbanyiziwa.—Masa. 19:14.

14. U mulandu ci uno cacindamila ukusoolola ivyuza ivisuma?

¹⁴ Ukusoolola ivyuza ivisuma nako iinzila yakwe citatu icindame sana. Twiluke nanti foo, tukaambula imisango kuli yano tukucina nayo. (Mapi. 13:20) Lino tuli ku ncito nanti ku sukulu, tukaya na antu atanga yatwazwe ukwelenganya vino Leza akalonda. Nomba nanti ciye vivyo, tungazana ivyuza ivisuma sana pa yantu yano tukalongana nayo. Ku kulongana akuno tukasambilila “kwazwana nu kutemwa kucita visuma.”—Ayeb. 10:24, 25.

15-16. Uzye Satana akaezya uli ukusenula imyelenganyizizye itu?

¹⁵ Mwaiusya ukuti Satana akalondesya ukusenula amelenganyo itu. Akaomvya ivisambilizyo ivipusanepusane pakuti aonone imyelenganyizizye ino Izwi Lyakwe Leza lyalenga tukwate.

¹⁶ Satana watwalilila ukuzya iuzyo ililimwi kwene lino uzizye Eva mu calo ca Edeni ilyakuti: “Uzye icacumi Leza wati . . . ?” (Utan. 3:1) Umu nsi ii ikatungululwa na Satana, tukauvwa aingi yakuzya amauzyo angalenga twatwisika vino twazumilamo wakwe yaa: ‘Uzye icacumi Leza atazumilizya ukulalana  kwa yonsi yatupu nanti anaci yatupu? Uzye icacumi Leza asilonda ukuti mwazevya Klisimasi na manda ya kuvyalwa? Uzye icacumi Leza winu akalonda ukuti mwakana ukumwikilamo uwazi? Uzye icacumi Leza uwaya nu kutemwa asilonda ukuti mwauvwana na aatemwikwa inu azingwa mu cilongano?’

17. Uzye tungacita uli ndi cakuti umwi watuuzya amauzyo angalenga twatwisika vino twazumilamo, nupya i vyani vino ilembelo lyakwe Kolose 2:6, 7 likatunena ukuti i vingafumamo?

¹⁷ Tulinzile ukusininkizya vino twazumilamo. Ndi cakuti tusikuzana amasuko ku mauzyo acindame yano twakwata pa vizumilo vitu, tulatandika ukutwisika ndi cakuti vino twazumilamo ivya cumi. Ukutwisika kwa musango uwo kungonona imyelenganyizizye itu nupya nu utailo ungasila. I vyani fwandi vino tulinzile ukucita? Izwi Lyakwe Leza likatunena ukuti tulinzile ukusenula imyelenganyizizye itu, pakuti tulange ukuti twaya ‘na maka akumanya kulonda kwakwe Leza, nu kumanya vintu visuma pamwi ni vikamuzanzya.’ (Loma 12:2) Ndi cakuti tukuisambilizya lyonsi, tulasininkizya ukuti vino tukusambilila muli Baibo ivya cumi. Nupya tulasininkizya ukuti amasunde yakwe Yeova asuma sana. Lyene wakwe vivi kwene vino umuti uwakwata imisisi ikome waya, tulaya “akomeleke mu utailo.”—Welengini Kolose 2:6, 7.

18. I vyani ivilamwazwa ukucimvya amelenganyo aipe amu nsi ii yakwe Satana aya wakwe sumu?

¹⁸ Kusi umuntu aangamukomezya utailo, fwandi twalililini ukulenga imyenzo inu na ya kampingu inu viye ivipya. Mwapepa lyonsi nu kupapata Yeova ukuti amwazwe nu mupasi wakwe uwa muzilo. Mwaelenganyapo sana nu kutwalilila ukwezya ukusenuka mu myelenganyizizye na muli vino mukacita. Mwasoolola ya cuza asuma aangamwazwa ukusenuka mu melenganyo. Nga mukucita vivyo, mulacimvya amelenganyo aipe amu nsi ii yakwe Satana aya wakwe sumu nupya mulacimvya nu “kwelenganya kwa ntumpu nga ni citutumusi cino cikalenga kuti muntu ali wensi atamanya Leza.”—2 Kolinto 10:4, 5.