Vino Baibo Ikalanda pa Cisuma ni Ciipe Vingamwazwa
Baibo yaazwa antu aingi umu vintu 4 ivyalondelelapo.
1. Cupo
Antu yakaelenganya ivipusane pusane pa cupo na pali vino yangacita pakuti yaye ni nsansa umu cupo.
BAIBO IKATI: “Cila muntu alinzile ukutemwa umuci wakwe wakwe vino waitemwa; umuci nawe alinzile ukucindika sana iya.”—Efeso 5:33.
VINO CIKAPILIULA: Yeova uwatandike icupo, fwandi wamanya vino atwalane yalinzile ukucita pakuti yaye ni nsansa. (Mako 10:6-9) Atwalane yangaya ni nsansa ndi cakuti cila muntu akwika amano uku muze. Iya uwaya nu kutemwa uku muci akalanga ukuti waya nu kutemwa ukupitila muli vino akacita. Umuci nawe akalanga ukuti waya nu mucinzi kuli iya ukupitila muli vino akalanda nu kucita.
UKUSUNDA KWA MULI BAIBO KUKAAZWA: Ya Quang na ya Thi, akaikala uku Vietnam, yalolanga kwati yatalatala yakwate insansa umu cupo cao. Ya Quang ilingi yatalanganga icikuuku. Yatile: “Vino na citanga vyalenganga ya Thi yauvwa uyi nu kuyuvwa ukuti yatacindama.” Cii calenzile ya Thi yalonda ukutana. Yatiile: “Nalolanga ukuti ntali nu kutwalilila ukutaila nu kucindika ya wane.”
Nomba ya Quang na ya Thi yasambilile vino Baibo ikalanda pa cupo na vino yangaomvya ilembo lyakwe Efeso 5:33 umu cupo cao. Ya Quang yatiile: “Ilembo lii lyangazwile ukuya ni cikuuku, cii calenzile mamane atandike ukulola vino namutemwa nupya natandike ukumusakamala muli vino akulondekwa. Lino natandike ukucita vii, mamane wizile antemwa nu kutandika ukuncindika nupya.” Ya Thi nayo yatiile, “ukuomvya ivyaya pali Efeso 5:33 alino nu kucindika ya wane, kwalenzile yantemwe sana, kuncingilila nupya umu cupo citu mwali umutende.”
Pakuti mumanyilepo na vyuze pi lyasi lii, belengini zyukini! Na. 2 2018, iyakwata umutwe wakuti “Ivintu 12 Ivingaavwa Indupwa Ukuya Ni Nsansa” pa jw.org.
2. Kulanga Ukutemwa Kuli Yauze
Yamwi yasilanga ukutemwa kuli yauze pa mulandu ni nkanda, kuno yafuma, kuno yakapepa, nanti pa mulandu wakuti aonsi nanti anaci.
BAIBO IKATI: “Mwacindika antu amisango yonsi.”—1 Petulo 2:17.
VINO CIKAPILIULA: Baibo isilanda ukuti tulinzile ukupata antu ankanda ipusane, afuma uku mpanga zyuze nanti aonsi akalaala na aonsi yauze nanti anaci akalaala na anaci yauze. Lelo, ikatukomelezya ukuti tulinzile uku cindika antu yonsi, asi mulandu ni nkanda, kuno yafuma, nupya asi mulandu akankala nanti apiina. (Milimo 10:34) Nanti cakuti tusicita vino yauze yakacita, tulinzile ukuya ni cikuuku nu mucinzi kuli yauze.—Mateo 7:12.
UKUSUNDA KWA MULI BAIBO KUKAAZWA: Ya Daniel ya yasambilizye ukulalola antu afumanga uku Asia ukuti yali antu aipe. Ya Daniel izile yapata antu akulila uku Asia nupya yatukanga antu yaa. Yatiile: “Nalolanga kwati natungililanga impanga yane. Ntelenganyapo nu kuti vino nacitanga vyali iviipe”
Ya Daniel izile yasambilila vino Baibo ikalanda. Yatiile: “Nalondekwanga ukusenuka muli vino nelenganyanga, nu kutandika ukulalola antu yonsi wakwe vino Yeova akayalola ukuti sweswe yali yamwi asi mulandu na kuno twafuma.” Ya Daniel yalondolwile vino yakayuvwa ndi cakuti yazana antu. Yatiile: “Ilingi nsielenganya na pali kuno yafuma. Natemwa antu amisango yonsi nupya nakwata ya cuza umu nsi yonsi.”
Pakuti mumanyilepo na vyuze pi lyasi lii, belengini Zyukini! Na. 3 2020, uwakweti umutwe uwakuti “Uzye kwaya Icingafumyapo Kapatulula?” pa jw.org.
3. Impiya
Antu aingi yakaelenganya ukuti yalinzile ukukwata ivyuma pakuti yaye ni nsansa nu kukwata umi usuma.
BAIBO IKATI: “Wakwe vino impiya zikacingilila. Amano yakasunga umuntu umutende. Endi, uu uli usuma wa kukwata amano.”—Kasambilizya 7:12.
VINO CIKAPILIULA: Tukalondekwa impiya, nomba zitanga zilenge umuntu aye ni nsansa nanti ukukwata umi usuma uku nkoleelo. (Mapinda 18:11; 23:4, 5) Lelo, tungaya ni nsansa zya cumi alino nu umi usuma uku nkoleelo ndi cakuti tukuomvya ukupanda mano ukukafuma kuli Leza ukwaya muli Baibo.—1 Timoti 6:17-19.
UKUSUNDA KWA MULI BAIBO KUKAAZWA: Ya Cardo, akaikala uku Indonesia, yalondesyanga ukukwata ivyuma. Yatiile: “Nakweti ivintu vyonsi vino antu aingi yakalonda, nayanga umu kutandala, ukukala ivintu vya mutengo, ya motoka, na mang’anda.” Nomba yatatwalilile ukuya ni vyuma. Yatiile: “Yanjiile impiya, nupya ivyuma vino naombelanga pa myaka yonsi iya vyaponzile pa kasita sile akanono. Naombesyanga ukukwata ivyuma pa myaka ingi, lelo pa cisila nizile ntandika ukuyuvwa uwa sile sile pano ivyuma vyonsi vyasizile.”
Ya Cardo yaomvizye ukusunda kwa muli Baibo ukukalanda pa mpiya. Ndakai yasiika amano uku kulondesya ivyuma lelo yasoololapo ukwangupazya uwikazi. Yatiile: “Ndakai nkayuvwa ukuti nakwata ivyuma vya cumi pano nakwata ucuza usuma na Leza. Nkalala ningo, nupya nakwata insansa zya cumi.”
Ndi cakuti mukulonda ukumanyilapo ivingi pali vino Baibo ikalanda pa mpiya, belengini cipande icatangi “Uzye Amasambililo ni Mpiya Vingalenga Mukaye nu Umi Usuma?” icali umu Lupungu Lwa Mulinzi Na. 3 2021, pa jw.org.
4. Uzelele
Antu yamanya ivipusane pusane pa uzelele.
BAIBO IKATI: “muye amuzilo nu kutaluka uku uzelele. Cila muntu pali mwemwe alinzile ukumanya ivya kusunga umwili wakwe, ukuya uwa muzilo nupya uwa mucinzi, asi kuya ni nsuna iyacila umu cipimo wakwe vino amu nsi aatamanya Leza yaya.”—1 Tesalonika 4:3-5.
VINO CIKAPILIULA: Baibo yatwazwa ukumanya vino tulinzile ukulalola uzelele. Umwi zwi lyakuti “uzelele” ilyaomviwa muli Baibo, mwaya ucende, ulalelale, kupanga icupo ukwa yonsi yatupu nanti ya mama yatupu, nu kulala ni nyama. (1 Kolinto 6:9, 10) Ukupanga icupo, upe uno Leza wapeela uku monsi nu mwanaci yano yatwalana.— Mapinda 5:18, 19.
UKUSUNDA KWA MULI BAIBO KUKAAZWA: Ya Kylie akaikala uku Australia yatiile: “Nelenganyanga ukuti ndi cakuti nalala nu monsi, ndatandika ukuyuvwa ukuti natemwikwa nupya nacingililwa. Nomba vii asi ali vino vyacitike. Nayuvwile ukuti ntacingilwa nupya nayuvwile uwasilesile.”
Lino papisile insita, ya Kylie yatandike ukusambilila nu kuomvya vino Baibo ikasambilizya pa uzelele. Yatiile: “Nkalola ukuti masunde ya muli Baibo yayelako uku kutucingilila nu kutwazwa ukukana uvwa uyi. Ndakai nkayuvwa ukuti nacingililwa nupya natemwikwa pano nkacita vino Yeova akalonda. Ukuomvya ukusunda ukwaya muli Baibo kwancingilila uku masakamika!”
Pakuti mumanyilepo na vyuze pi lyasi lii, belengini cipande catangi “I Vyani Vino Baibo Ikalanda pa Kwikala Pamwi Ukwaula Ukutwalana?” pa jw.org
Kaumba witu akatwazwa ukumanya icisuma ni ciipe. Nanti cakuti insita zimwi cikatala ukulondela amasunde yakwe Yeova, mukafuma ivisuma ndi cakuti twaombesya. Tungasininkizya ukuti ukulondela amasunde yakwe Yeova kungalenga tuye ni nsansa zya cumi.
