Lino antu aingi yatandike ukusimikila, aina na ya nkazi yalondekwanga impapulo izingi. Aina pa musambo wa ku Brooklyn yapanganga magazini, nomba nga yakulonda ukupanga mabuku yaomvyanga kampani iyapulintanga mabuku. Pa myezi iingi, kampani iyapulintanga mabuku yafizilwe ukupulinta mabuku aingi ali nu kuomviwa mu mulimo wa kusimikila. Fwandi umwina Rutherford uzizye Umwina Robert Martin uwangalilanga ku fakitoli ya kupulintila impapulo ndi cakuti yangakwanisya kuipulintila mabuku.

Mwina Martin wiwisye ukuti kuu kwali u kupanda amano kusuma pano cii cali nu kulenga yaikwatile umwa kupulintila mabuku. Aina yasonkiile icikuulwa icayeliile umu 18 Concord Street uku Brooklyn nupya yalonzile na vyonsi ivyalondekwanga.

Asi yonsi aatemilwe ukumanya ukuti aina yali nu kutandika ukuipulintila mabuku. Mukalamba wakwe kampani iyatupulintilanga mabuku watandalile cikuulwa citu icipya muno twali nu kutandika ukupulintila. Watiile: “Imukwata iviombelo visuma sana ivyakupulintila mabuku, nomba pasi aliwensi pali mwemwe amanyile ivyakuviomvya. Umu myezi sile 6 vyonsi vii vilononeka.”

Mwina Martin watiile: “Vyonsi vino walanzile vyuvwikike kwati i vya cumi, nomba twamanyile ukuti Yeova wali nu kutwazwa wakwe vino wacitanga lyonsi.” Vino umwina Martin walanzile i vyacitike. Lino papisile sile insita inono, yatandike ukupulinta mabuku 2,000 cila wanda.

Ukulunda pa kuipulintila mabuku yao, antu yakwe Yeova yatandike nu kuomvya inzila ipya iyakusimikililamo ilyasi lisuma kuli kuti ukuomvya ledyo pa kusimikila. Pa Mulungu kasanya pa 26 Febuluwale, 1922 Umwina Rutherford walanzile ilyasi pa ledyo umuku wa kutandikilako. Ilyasi lino walanzile pa ledyo umu Los Angeles, California,  mu U.S.A lyakweti umutwe wakuti “Antu Alipo Ndakai Yatalatala Yafwe.”

Antu mupiipi na 25,000 yakutike ukwi lyasi lii. Yamwi yatumile makalata akutaizya Umwina Rutherford api lyasi lino walanzile. Kalata imwi yafumile kuli ya Willard Ashford, aikalanga umu Santa Ana, mu California. Yataizye Umwina Rutherford api lyasi lisuma nupya ilyakukomelezya. Yalanzile nu kuti: “Umu ng’anda umwane mwali alwale yatatu yano cali nu kutalila ukufuma pa ng’anda. Fwandi nga cayatalile ukwiza umu kukutika ukwi lyasi nanti cakuti mwali nu kulandila ilyasi mupiipi na kuno tukaikalila.”

Kwatwalilile ukuya mapuloglamu na yauze aapa ledyo umu milungu iyalondeliilepo. Lino umwaka wa 1922 wasizile, Lupungu Lwa Mulinzi lumwi lwalanzile ukuti “umupipi na antu 300,000 yakutikanga ku mapuloglamu ya pa ledyo.”

Pa mulandu ni visuma ivyacitike, Asambi ya Baibo yapingwilepo ukukuula umulabasa apa ncende iyayelile pa Cilila ca Staten, icayelile umupipi na Betele ya Brooklyn. Umu myaka iyalondeliilepo Asambi ya Baibo yatandike ukuomvya umulabasa uno yamanga ukuti WBBR uku kusimikila ilyasi lisuma ilya Wene.

Umu Lupungu Lwa Mulinzi lwakwe Juni 15, 1922 mwali cimanyisyo icakuti kwali nu kuya ukongano uwali nu kuyela umu Cedar Point, Ohio, ukufuma pa 5 ukufika pa 13 Sepetemba, 1922. Asambi ya Baibo yatemilwe sana lino yafisile umu Cedar Point.

Umwi lyasi lya kutandikilako lino Umwina Rutherford walanzile, wanenyile iumba ukuti: “Insininkizya ukuti Umwene amapaala ukongano uu nu kusininkizya ukuti unte wapeelwa pano nsi vino citatala cacitika.” Aalanzile malyasi pa ukongano uwa yakomelizye aina na ya nkazi ukulasimikila sana.

Lyene pali Cisano pa 8 Sepetemba antu mupiipi na 8,000 ingile umwayeliile ukongano ala yakulondesya ukukutika ukwi lyasi lya Mwina Rutherford. Yenekelanga ukuti amalondolola upiliulo wa vilembo ivyali pa tupepa twa kwamilapo ivyakuti “ADV.” Aingi isile mano uku cisalu  icipombwe icali uku pulatifomu. Ya Arthur Claus aizile uku ukongano aafumile uku Tulsa, uku Oklahoma, U.S.A., yazanyile pa kwikala pano yali nu kulakutika ningo malyasi. Citali canguke ukuzana apa kwikala wakwe papa pa mulandu wakuti pa ukongano uwa pataali mamaikulofoni nanti masipika.

Pakuti kutaya ivya kupumvyanya, ceyamani wamanyisizye iumba ukuti aliwensi aamacelwa atamazumiliziwa ukwingila lino Mwina Rutherford akulanda ilyasi. Pa 9:30 Mwina Rutherford watandike ilyasi na mazwi yakwe Yesu aaya pali Mateo 4:17 aakuti: “Uwene wa kwi yulu watiupalama.” Lino walanzile pali vino antu yali nu kuvwa ilyasi pa Wene watiile: “Yesu umwineco walanzile pa nsita ya kuyapo kwakwe ukuti wali nu kutungulula umulimo wa kuzombola kwa yantu yakwe lino wali nu kulonganika antu ali ni cisinka.”

Umwina Claus uwali umwi umba walanzile ati: “Twakutikisyanga vyonsi ivyalandwanga.” Nomba umu kupumikizya wizile alwala nupya wafumile umwayelile ukongano. Lino wafumanga, wafumanga panono panono pano wamanyile ukuti yatamaiza yamuzumilizye ukwingila nupya.

Lino papisile sile mamineti anono watandike ukuvwako ningo. Watiile lino wali sile umupipi nu kufumila panzi uvwile antu yatoota sana. Cii calenzile aalondesya ukumanya ivikucitika. Wapingwilepo ukukwela api paala pakuti sile amaliile ukukutika ukwi lyasi lii lisuma. Umwina Claus uwali ni myaka 23 apa nsita iya wazanyile apa kukwelela ukuya apipaala. Mawindo ya pipaala yali aayulike nupya watiile lino wapalamile watandike ukuvwa.

Nomba ya Arthur yataali yonga. Kwali na yauze kwene aali apipaala. Yonga pali yayo, ya Frank Johnson iizile kuli aliyo nu kuyuzya ndi cakuti iyakwata kamupeni.

Ya Arthur yaswike ukuti: “Ee inkwata.”

Ya Frank yatiile: “Itukupepa ukuti tuzane umwi aakweti umupeni. Uzye imucilola icisalu cii? I cisalu cino iyanyepelela uku nsunga apalemvilwe  amazwi. Muvwikisye kuli vino Kapingula * akulanda. Nga walanda wati, ‘manyisyini, manyisyini,’ muputoole intambo.

Fwandi Umwina Arthur, walemile umupeni nu kutandika ukuloleela yauze yamunene lino Umwina Rutherford amalanda amazwi aakulangilila ukuti yaputule intambo. Patalengile, Umwina Rutherford wafisile apa nsita ya kulanda amazwi ali acindamisye umwi lyasi. Umwina Rutherford wali sana ni nsansa nupya walondesyanga ukulanda amazwi yayo, fwandi afwile wapunzile pa kulanda amazwi yakuti: “Muye acisinka nupya Inte zya cumi uku Mwene. Mutwalilile ukulwisya mpaka imipepele ya ufi ice yononwe. Mwasimikila konsi sile. Amu nsi yonsi yalinzile ukumanya ukuti Yeova ali Leza nu kuti Yesu Klistu ali Mwene wa Yene. Uu ali wanda ucindame sana. Lumbanyini Umwene aakuteeka. Mwapeelwa umulimo wa kunena antu pali vii. Acino, manyisyini, manyisyini, manyisyini Umwene nu Wene wakwe.”

Umwina Arthur walondolwile ukuti wene na ina yauze yaputwile intambo zya cisalu nupya capombolwike ningo ningo. Ivilembo vyakuti “ADV,” vyalozyanga ukwi izwi lya cizungu ilyasenulwa ukuti “manyisyini” ilikapiliula ukusimikila nupya vyalemenkiine na mazwi aalemvilwe pa cisalu aakuti: “Manyisyini Umwene nu Wene.”

Ukongano uwaliko umu Cedar Point wazwilizye aina ukwika mano uku mulimo ucindame uwa kusimikila pa Wene nupya yayo aaipeelisye yali ni nsansa ukuombako umulimo uu. Kolopota umwi (wino ndakai tukaama ukuti painiya) uwa ku Oklahoma, ku U.S.A., walemvile ati: “Twasimikilanga ukwazanwanga sana antu aingi ukwikako sile nu mu mamaini alino nu mu ncende umwikalanga antu aapiina sana.” Watiile ilingi antu nga yuvwa ivyeo ivyayanga muli magazini wakuti Golden Age “yalilanga.” Nupya watiile: “Twayanga ni nsansa pano twayateekezyanga.”

Asambi ya Baibo yamanyile vino amazwi yakwe Yesu yacindime aaya pali Luka 10:2 aakuti: “Uzombozi uukulu, lelo aomvi iyacepa.” Lino umwaka wasizile, yakomeleziwe sana ukumanyisya antu pa Wene umu ncende zya kutali nu mupiipi.