Insi Ipya Yasya Iyeko Likwene!
Leza waumvile insi pakuti antu aaya na ucisinka yakikalemo amanda pe. (Masamu 37:29) Wisile atwalane ya kutandikilapo Adamu na Eva, umu calo ca Edeni nupya wayapeezile umulimo kumwi na anao uwa kulima insi nu kuisakamala.—Utandiko 1:28; 2:15.
Ndakai insi itaya Paladaise wakwe vino Leza walondanga. Nomba, ukulonda kwakwe Leza kutasenuka. Uzye Leza alalenga uli insi ukuya Paladaise? Wakwe vino ivipande ivyafumako ivilanda, Leza atalonona insi ii ino tukaikalamo. Lelo alalenga antu aaya na ucisinka ukwikalamo. Uzye ivintu umu nsi vilaya uli lino Leza alafikilizya vino walaya?
Uteeko onga sile ulateeka insi yonsi
Likwene sile lino Uwene wakwe Leza uwa kwi yulu ulateeka insi, antu yalaya ni nsansa nupya alemane nu kuomba incito izisuma. Leza wasonta Yesu Klistu ukuya kateeka wa nsi. Ukupusanako na ya kateeka ayako ndakai, Yesu wene alacitila ateekwa yakwe vino yakulonda. Ukateeka wakwe ulasintilila pa kutemwa nupya alaya ni cikuuku, uluse nu mulinganya.—Ezaya 11:4.
Antu umu nsi yonsi yalaya alemane
Umu nsi ipya mutalaya kapatulula ka nkanda nanti mpanga. Antu yonsi yalaya alemane. (Kusokolola 7:9, 10) Antu yonsi pano nsi yalatemwa Leza na antu yauze, nupya yalaombela pamwi mu mutende pa kufikilizya ulayo wakwe Leza uwa kusakamala insi.—Masamu 115:16.
Kutalaya intazi ili yonsi pa miceele
Lino Uwene wakwe Leza ulatandika ukuteeka pano nsi, Leza alatungulula imiceele nu kusininkizya ukuti ili ningo. (Masamu 24:1, 2) Lino Yesu wakalipile icimuza icipisye, walangilile ukuti waomvizye amaka yakwe Leza ukucita vivi. (Mako 4:39, 41) Lino Klistu alateeka, kusi aalatiina ukuti kumaya mazanzo ya kuiponela. Lino Uwene wakwe Leza ulateeka tulikala umu mutende ni nyama nupya tutalaonona insi.—Oseya 2:18.
Tulaya nu umi umalilike nupya tulakwata ivyakulya ivingi
Wensi alaipakizya umi umalilike. Kusi aliwensi alalwala, ukukota, nanti ukufwa. (Ezaya 35:5, 6) Antu yalaipakizya ukwikala umu ncende isuma wakwe ino atwalane ya kutandikilapo yaipakizyanga umu calo ca Edeni. Umu nsi ipya, insi ilamezya ivyakulya ivingi wakwe vivi kwene vino cali umu calo ca Edeni nupya antu yonsi yalakwata ivyakulya ivingi. (Utandiko 2:9) Wakwe vino cali uku luko lwa ina Izlaeli, antu yonsi yalakwata ivyakulya vino yakalondekwa.—Aina Levi 26:4, 5.
Umutende wa cumi cumi nu kucingililwa
Lino Uwene wakwe Leza ulateeka insi yonsi, antu yonsi yalaya nu mutende ni cikuuku uku antu yauze. Kutalaya inkondo, ukukanaomvya ningo amaka ya utunguluzi, nupya yonsi yalakwata vino yakalondekwa. Baibo yatulaya ukuti: “Umuntu ali wensi alaikalila mu mutende apakasi ka mitingi ni misamvu yakwe. Kusi nanti umwi alayoofya.”—Mika 4:3, 4.
Umuntu wensi alakwata incende isuma pa kwikala nupya alaipakizya ukuomba incito
Cila lupwa yalakwata incende apa kwikala ukwaula ukutiina ukuti yamayazinga, nupya yalaipakizya ukuomba imilimo. Wakwe vino Baibo ikalanda, yayo alaya umu nsi ipya yakwe Leza “yatalaicuzya sile ukuomba foo.”—Ezaya 65:21-23.
Ukusambiliziwa ningo
Baibo yalaya ukuti: “Impanga ilazuula mwenemo amano akumanya Yawe [Yeova].” (Ezaya 11:9) Antu aalateekwa nu Wene wakwe Leza, yalasambilila pa mano yano Kaumba wao Yeova wakwata alino ni vintu ivingi visuma vino waumba. Yatalaomvya amaka yao ukupanga ivyanzo nanti ukucisa antu yauze. (Ezaya 2:4) Lelo yalasambilila ivya kwikala umu mutende na antu yauze ni vya kusakamala insi.—Masamu 37:11.
Umi wa manda pe
Yeova waombisye pa kupanga insi pakuti twaipakizya ukwikalamo cila wanda. Akalonda antunze yakikale amanda pe pano nsi. (Masamu 37:29; Ezaya 45:18) Pakuti afikilizye ukulonda kwakwe, Leza alafumyapo “imfwa” amanda pe. (Ezaya 25:8) Baibo yalaya ukuti “kutalaya imfwa, kutalaya ukuloosya nanti ukulila nanti ukuvwa ukuwaika.” (Kusokolola 21:4) Leza alapeela antu yonsi isyuko lya kwikala amanda pe, kuli kuti yayo yonsi alapusuka lino alonona insi ii na antu imintapendwa alatutuululwa ukufuma uku afwe.—Yoani 5:28, 29; Milimo 24:15.
Na ndakai kwene, antu aingi yakuipekanya ukwizaikala umu nsi iilateekwa nu Wene wakwe Leza uwatiupalama. Nanti cakuti yatamalilika, yakwezya na maka ukuya antu yano Yeova akalonda yace yaye umu nsi ipya. Yakucita uli vivyo? Yakucita vivyo lino yakusambilila pali Yeova Leza na Yesu Klistu wino watumile.—Yoani 17:3.
Sambililini vino mungacita pakuti mukapusuke impelelekezyo ya nsii ii nu kwizaikala umu nsi ipya ino yasya iyeko likwene. Lengini ukuti yamusambilizya Baibo kuli Nte Wakwe Yeova umwi, nanti mwasambilila masambililo ya muli Baibo pa intaneti pa jw.org ukwaula ukulipila.
Limwi Mungatemwa Ukulolako na Vii
LUPUNGU LWA MULINZI
I Vyani Vino Uwene Wakwe Leza Ulacita?
Yesu wamanyile ukuti Uwene Wakwe Leza ali uteeko sile uungasisyapo intazi zyonsi zii pano nsi. I vyani vino Uwene uu wacita ivingalenga tutaile ukuti ulasisyapo iviipe vyonsi?
LUPUNGU LWA MULINZI
Uwene Wakwe Leza Uteeko Uutaaya na Mafisakanwa
Ivintu 6 vikasininkizya ukuti Uwene uu ulatwalilila ukwaula amafisakanwa.
