Cipande cafumako, icitulangilila ukuti likwene sile Leza ali nu kufumyapo ivintu iviipe vyonsi ivyaya umu nsi ii ni ntazi zyonsi zikacuzya antu. Tungasininkizya ukuti vii vilacitika. U mulandu ci? Pano Izwi lyakwe Leza, Baibo lyatulaya ukuti:

“Insi ikupita.” —1 Yoani 2:17.

Tungasininkizya ukuti kulaya aalapusuka pa mulandu nu ulayo uli pi lembo ilili papela:

“Aakacita vino Leza akalonda, akaikalilila manda pe.”

Fwandi ndi cakuti tukulonda ukupusuka, tulinzile ukulacita ukulonda kwakwe Leza. Pakuti tumanye vino Leza akalonda, inkoleelo tulinzile ukumumanya.

Yesu watiile: “Aalaya nu umi wa pe yafwile ukumanya wewe, we Leza wa cumi wenga sile.” (Yoani 17:3) Pakuti tukapusuke nu kwikala amanda pe, tulinzile ukumanya Leza. Cii cikupiliula ukuti tutalinzile sile ukumanya ukuti Leza akuno waya nanti ukumanya sile ivisinka ivinono pali aliwe. Tulinzile ukuya ya cuza yakwe. Nga tukulonda ucuza witu ukome, tulinzile ukupaatulako insita ya kuya pamwi na ya cuza itu. Vikwene avino tulinzile ukucita na kuli Leza. Lolini vimwi vino tukasambilila muli Baibo ivikatwazwa ukuzifyako ucuza witu na Leza nu kutwalilila ukuya ya cuza yakwe.

Tukalya ivyakulya lyonsi pakuti tuye nu umi. Lelo Yesu watiile: “Umuntu atange aye nu umi uku cakulya citupu, suka nu ku mazwi yonsi aakafuma mu kanwa kakwe Yeova.”—Mateo 4:4.

Ndakai, tukazana izwi lyakwe Yeova muli Baibo. Lino mukusambilila umwi buku lii ilya muzilo, mulasambilila pali vino Leza wacisile uku cisila, vino akucita ndakai na vino alacita uku nkoleelo.

Mungacita uli ndi cakuti mukulonda ukuvwila Leza, lelo cikumutalila ukuta ukucita ivintu vino akalola ukuti i viipe? Ndi cakuti avino cili, icingamwazwa u kumanya ningo Leza.

Uvwini ivyacitikiile umwanaci wino tumaama ukuti Sakura uwacitanga sana uzelele. Lino watandike ukusambilila Baibo, wasambilile apisunde lyakwe Leza ilikalanda pa kuutuka “uku uzelele.” (1 Kolinto 6:18) Sakura wapefile kuli Yeova ukuti amukomye nupya watiile ukucita iviipe vino wacitanga. Nomba wali nu kutwalilila ukulwisyanya ni tunko lya kulonda ukucita vivyo. Watiile: “Nga natandika ukwelenganya pa viipe, nkapepa kuli Yeova, pano ale imanya ukuti ntanga ncimvye iviipe vivyo uku maka yane. Ipepo lyalenga mpalame kuli Yeova.” Wakwe vino cali kuli Sakura, antu aingi ndakai yakulondesya ukumanya Leza. Akuyapeela amaka yano yakalondekwa pakauti yasenuke nu kutandika ukucita ivikamuzanzya.—Filipi 4:13.

Nga mwamanya ningo Leza, nawe alamumanya ningo wakwe cuza musuma. (Galatiya 4:9; Masamu 25:14) Lyene mulaya pa antu alapusuka nu kwingila umu nsi ipya yakwe Leza. Nomba uzye insi ipya kwene ilaya uli? Cipande icalondelelapo cimalondolola.