“Fwandi mwaya aiteyanye, pano mutaamanya uwanda nanti insita.”—MATEO 25:13.

“Mwaya aiteyanye, pano mutaamanya insita ino Leza wasoolola.” —MAKO 13:33.

Fwandi kutaya umuntu aliwensi pano nsi uwamanya lino insi ii ilononwa. Nomba, Leza wimika “wanda uuwa ni nsita”, lino insi ilononwa. (Mateo 24:36) Uzye cii cikupiliula ukuti kusi ivili vyonsi vino tungamanyilako ukuti uwanda uwa mpelelekezyo iupalama? Awe foo. Yesu wanenyile asambi yakwe ukwika mano uku vintu ivingi ivyali nu kulangilila ukuti impelelekezyo yatipalama.

Yesu walanzile pali vimwi ivyali nu kulangilila ukuti “mpelelekezyo ya nsi” yatipalama. Watiile: “Uluko lulakatukila uluko luze nu wene ulakatukila uwene uze, nupya kulaya ivipowe ni vilundumusi umu ncende zimwi zimwi.” (Mateo 24:3, 7) Walanzile nu kuti kulaya “vikuko” ni ndwala izingi. (Luka 21:11) Uzye vino Yesu wasoowile mukulola vikucitika?

Ndakai antu yakacuula pa mulandu ni nkondo, ivipowe, ivilundumusi alino ni ndwala izingi. Wakwe umu 2004, pa Indian Ocean papisile icilundumusi icakatwisye amaimbi nu kukoma antu ukufika kuli 225,000. Ukucila pa mwaka onga ulwale wakwe COVID-19 wakomile antu ukufika na kuli 2.6 million. Yesu walanzile ukuti ivintu vya musango uu vilalangilila ukuti impelelekezyo yatipalama.

Baibo ikalondolola amanda yaa yano tulimo ukuti “amanda ya kusyalikizya.” (2 Petulo 3:3, 4) Ukulingana na vino 2 Timoti 3:1-5 ikalanda, umu manda ya kusyalikizya antu yatalaya ni miyele isuma. (Lolini kambokosi kakuti “ Lino Insi Itatala Yononwa.”) Uzye ndakai mukalola antu aya na ukaitemwe, icilumba, unkalwe, nupya asilanga ukutemwa uku antu yauze? Vyonsi vii vikalanga ukuti tukwikala umu manda ya kusyalikizya aa nsi ii.

Uzye manda ya kusyalikizya yalatwalilila ukufika lilaci? Baibo ikalanda ukuti kwasyala sile “insita inono.” Lyene Leza alonona “aakaonona insi.”—Kusokolola 11:15-18, 12:12.

Leza wimika mpiti uwanda ni nsita lino alonona insi ii iipe. (Mateo 24:36) Nomba ilyasi lisuma i lyakuti Leza “asilonda umuntu ali wensi akononwe.” (2 Petulo 3:9) Watupeela insita iyakuti tusambilile pali vino akalonda ukutucitila nu kulamuvwila. U mulandu ci? A pa mulandu wakuti akalonda tukapusuke impelelekezyo ya nsi ii nu kwingila umu nsi ipya, lino insi ilaya paladaise.

Leza wateyanya ukuti kuye umulimo wa kusambilizya antu aingi pakuti yamanye vino yangacita pa kuya umu nsi ipya ilateekwa nu Wene wakwe. Yesu walanzile ukuti ilyasi lisuma lii ilya Wene lilasimikilwa “umu nsi yonsi.” (Mateo 24:14) Umu 2019 ya Nte Yakwe Yeova umu nsi yonsi yaomvile amaawazi ukufika kuli 2 bilyoni ukusimikila nu kusambilizya antu api lyasi ilyaya muli Baibo ilya kuyapeela upaalilo. Yesu walanzile ukuti umulimo uu uwa kusimikila ulaombwa umu nsi yonsi lino impelelekezyo itatala iza.

Imiteekele ya antunze ili nu kufumiziwapo likwene sile. Nomba ilyasi lisuma i lyakuti mungaca mupusuke impelelekezyo ya nsi ii nu kwingila umu Paladaise ino Leza watulaya. Icipande icimalondelelapo cimalanda pali vino mungacita pakuti mukikale umu nsi ipya.