Uzye mwatala mwacuulako uku ndwala imwi apa nsita sile inono? Limwi mwapozile zuwa sana icakuti ndakai mwilila nako uku ulwale uwo. Lelo ulanda wene asi ali vino waya. Kalemba umwi, Dr. Alan Wolfelt, walemvile umwibuku lyakwe ati: “Ulanda usisila.” Lelo walanzile nu kuti: “Ulanda ungacepa uku muntu ndi cakuti kuli yamwi aakumwavwilizyako.” (Healing a Spouse’s Grieving Heart.)

Tale elenganyini vino cali kuli Abulaamu lino umuci wafwile. Baibo ikalanda ukuti: “Abulaamu aingila umu ndosya nu kulila impoma.” Muli Baibo iya cizungu pa cikomo cii yasenula ukuti “watandike” ukulila. Fwandi izwi lii ilyakuti “watandike,” likalanga ukuti papisile insita pakuti azizimizye imfwa ya muci wakwe. * Namuze uuvwile sana ulanda a Yakobo, wino yatumposile ukuti umwanakwe Yosefu iyamulya uku cilyanyi. Wali nu ulanda “pa manda aingi,” nupya ya lupwa yakwe yavizilwe ukumutekezya pa ulanda uno wakweti. Papisile imyaka ingi sana ala Yakobo acili akaelenganya pa mfwa ya mwanakwe, Yosefu.—Utandiko 23:2; 37:34, 35; 42:36; 45:28.

Na ndakai kwene ali vino cikaya ku yantu aingi ndi yafwilwa lupwa wao nanti cuza wao. Lekini tulandeko pa yantu yamwi yaili yano yafwilwapo.

• Ya Gail, aali ni myaka 60 yalanzile ukuti: “Yawane, ya Robert yafwile pa 9 Julai, 2008. Uwanda uno yafwile umu uzanzo uwa pa museo utapusine na manda yonsi yano twayanga capamwi nayo. Wakwe vino twacitanga lyonsi pa cisila cakulya ivyakulya vya katondo lino yatatala yaaya uku ncito, avino twacisile nu wanda kwene uu, twatonsoliine, kukuukulana alino nu kunena umuze amazwi akuti ‘Nakutemwa.’ Iipapita imyaka 6 ncili nkauvwa uyi pa mfwa yakwe yawane. Ntamanya ndi cakuti ndililako uku mfwa yakwe yawane.”

• Ya Etienne, aali ni myaka 84 yatiile: “Nanti cakuti ipapita imyaka 18 kufuma pano mamane wafwila, ncili nkauvwa ulanda nupya nkamuluka sana. Lyonsi ndi cakuti nalola icintu cimwi icikuloleka ningo, nkatandika ukwelenganya pali mamane nupya nsitwisika ukuti nawe kwene ngano akauvwa ningo sana ukulola ivintu vino nemo nkatemwa ndi cakuti navilola.”

I cacumi ukuti ukuvwa ulanda ukwa musango uu kwaya ukwa civyalilwa. Cila muntu akakwata ulanda uno akauvwa umwisikulu, nupya citanga ciye ningo ukupingula umuntu pali vino akauvwa ndi cakuti wafwilwa. Lelo, tutalinzile ukuipeela umulandu ndi cakuti ulanda uno tukweti wakulisya. Uzye tungacita uli ndi twafwilwa?