LYASI LYAKUTANDIKILAKO | VILOLWA IVIKALANDA PA VIUMBWA IVYAYAUKWI YULU
Vino Antu Yamanya pa Viumbwa Vya Mipasi
Uzye mwatala mwelenganya apa cifulo ca mipasi na yano iikalako? Ndi cakuti avino cili ale mutaaya mwenga. Apa myaka iivule cuze, antu yakalanda ivipusane-pusane api lyasi lii. Yamwi yazumila ukuti cifulo ca mipasi kwaya vikolwe vino tufwile ukucindika. Yauze nayo yakaelenganya ukuti cifulo cico icisuma sana ukwaya mutende cino yakaati iyulu, kwikala angeli aingi alino na antu asuma yano yafwa. Nupya yauze yene yakaelenganya ukuti ku cifulo ciico, u kwikala tu leza imintapendwa ni mintapendwa.
Antu aingi yakakana vii vyonsi, yene yakaati tutanga tumanye cili consi pa cifulo ca mipasi pano kutaaya nanti awenga uwikalako aangatulondolwela ningo. Nomba ukwelenganya kwa musango uu, kutaaya ningo. Lino Yesu Klistu atali aize pano nsi wali iciumbwa ca mupasi ukwi yulu. Nupya umwineco wailandile uku ntunguluzi zya mapepo ati: “Nika kufuma kwi yulu asi kwiza cita kulonda kwane, lelo kulonda kwakwe wino uwantuma.” Acino wanenyile na atumwa yakwe ati: “Mu ng’anda yakwe Tata muli miputule iingi.”—Yoane 6:38; 14:2.
Isi wakwe Yesu, kulikuti Leza wino wakwata izina lyakuti Yeova, capamwi ni “ng’anda” yakwe, vyaya ukwi yulu. (Masamu 83:18) Fwandi, Yeova Leza na Yesu Klistu aangatulondolwela ningo vino cifulo ca mipasi caya. Yatulondolwela ivintu viingi ivikatwavwa ukumanya ningo cifulo ca mipasi.
Icipande icilondeliilepo cikulanda pa viputulwa vimwi ivya muli Baibo ivikalondolola apa vilolwa vimwi vino aonsi yamwi yaweni. Lino mukuwelenga pa vilolwa viivyo, mwaiusya ukuti ciumbwa ca mupasi aasi cintu cino tungalola nanti kulema. Fwandi Leza walondolola viumbwa vya mipasi umu nzila yangupale ingatwavwa ukumanya ningo viumbwa vivyo. Nupya ivilolwa kwene i vimatwavwa ukumanya aaya umu cifulo ca mipasi umwaya “miputule iingi.”
