UKWAULA nu kutwisika mufwile mwalola vino amu mipepele iingi yakaika sana mano ku kukuula ningo ivikuulwa vya kupepelamo na vino yakaika masunde pa nsita iya kupepelapo amapepo. Uzye Baibo yalanda ivifulo ni nsita zino tulinzile ukupepelapo?

Baibo ikalanda ukuti kwaya insita izisuma izya kupepa. Lino Yesu atatala watandika ukulya na alondezi yakwe, wataizye Leza umwi pepo. (Luka 22:17) Nupya lino asambi yakwe yakolongine pamwi uku kupepa, yapepiile pamwi ipepo. Fwandi yatwalilile ukulondela ulutambi ulwacitikanga mpiti umu masunagogi ya Yayuda alino nu mwi tempele ilyali umu Yelusalemu. Leza walondanga ukuti itempele liye “ing’anda ya mapepo iya yantu yonsi.”—Mako 11:17.

Lino aomvi yakwe Leza yakolongana nu kupepela pamwi, amapepo yao yangasukwa. Leza akatemwa ndi cakuti iumba ililemana umu melenganyo, nupya vino likupepelapo vikuvwana ni visinte ivya mu malembo. Nupya ipepo lingalenga ukuti acite vino atalali nu kucita. (Aebele 13:18, 19) Ya Nte Yakwe Yeova yakapepa lyonsi pa kulongana. Tukumwama ukuti mukize ku Ng’anda ya Wene iyayela mupiipi na kuno mukaikala pakuti mukayuvwile vino yakapepa.

Lelo Baibo isilanda ukuti tulinzile ukupepa pa nsita imwi nanti ukupepela pa cifulo cimwi. Muli Baibo tukabelenga pa yaomvi yakwe Leza apepanga pa nsita izipusanepusane ni vifulo ivipusanepusane. Yesu watiile: “Lelo wemo lino ukupepa, ingila umu muputule wako nu kuyalako icisaasa, alino upepe kuli Tata wako aasiloleka. Lyene Tata wako aakalola ivya mu nkama alakupeela icilambu.”—Mateo 6:6.

Uzye luu asi ulwamo ulukalanga ukuti Yeova waya nu kutemwa? Mungapepa kuli Leza wa papelapela pa nsita ili yonsi lino muli mwenga, nu kutaila ukuti amamuvwa. Ali cino ilingi Yesu watemilwe ukuya wenga lino akupepa! Pa nsita imwi Yesu wapefile usiku onsi kuli Leza ala akulenga utunguluzi pa kupingula pa cintu cimwi icicindame sana.—Luka 6:12, 13.

Aonsi na anaci yamwi alembwa muli Baibo yapefile lino yapingulanga pa vintu vimwi ivitale nanti lino yali ni ntazi izipiisye. Insita zimwi yapepanga ala ni zwi likuvwika nanti ukupepela umu mwenzo; yapepanga umu maumba nanti lino yali yonga. Icacindime i cakuti yapepanga. Na ndakai kwene Leza akanena aomvi yakwe ukuti: “Mwapepa lyonsi.” (1 Tesalonika 5:17) Lyonsi akaitemelwa ukuvwa ku mapepo ya yantu aakacita ukulonda kwakwe. Uzye ulwamo luu lusilanga ukuti Yeova waya nu kutemwa?

Umu nsi yii umwaya ukaitemwe antu aingi yakatwisika ndi cakuti ipepo lyacindama. Limwi munguzya muti, ‘Uzye ipepo lingangazwa?’