Uzye Tulinzile Ukupepa Kuli Weni?
UZYE mapepo yonsi yakaya ukuli kumwi, usi mulandu na wino tukupepako? Ndakai caseka sana ukwelenganya vivyo kwene. Vikwene avino aingi atemwa ukupepela pamwi nupya akalonda imipepele yonsi itemwikwe usi mulandu nu kupusana muli vimwi yakaelenganya. Nomba uzye imyelenganyizizye ya musango uwo i ya cumi?
Baibo ikasambilizya ukuti antu aingi yasipepa kuli Leza. Lino Baibo yalembwanga, caseesile sana uku yantu ukupepa ivilubi. Lelo pa miku iingi Leza wacelulanga antu aacitanga vivyo. Pali Masamu 115:4-6 pakalanda pa tulubi ukuti: “Amatwi . . . twakwata, lelo tusiuvwa foo.” Icisinka icuvwike. Fwandi cisi ca mano ukupepa kuli Leza atanga akuvwe.
Ilyasi limwi ilya muli Baibo likalangilila ningo icisinka cii. Kasesema wa cumi Eliya wanenyile ya kasesema yakwe Baali ukupepa kuli Leza wao, alino pa cisila nawe apepa kuli Leza wakwe. Eliya walanzile ati Leza wa cumi amaasuka lelo leza wa ufi asikwasuka. Ya kasesema yakwe Baali yapefile sana pa nsita itali, nu kupunda sana, lelo kusi icacitike. Baibo ikati: “Yakonkinye ukuzamboka pa nsita ntali ukwaula kuti Baali wiyo ayaasuke.” (1 Yamwene 18:29) Nomba i vyani ivyacitike lino Eliya wapefile?
Lino Eliya wapefile, Leza waswike lilyo kwene, watumile umoto ukufuma ukwi yulu uwosile ilambo lino Eliya wapekinye. Upusano ci uwalipo? Kwaya icintu conga icicindame icingatwazwa ukumanya, icaya umwi pepo lyakwe Eliya, ilyalembwa pali 1 Yamwene 18:36, 37. Ipepo lii i liipi sana nupya lyakwata sile mazwi mupiipi na 30 umu Ciebele ca kutandikilapo. Lelo umu mazwi kwene yayo anono, Eliya walumbula izina lyakwe Leza ilyakuti Yeova imiku itatu.
Baali, icikapiliula ukuti “umwineco” nanti “umusambazi,” wali a leza wa ina Kenani nupya kwali ya leza aingi amusango uu. Lelo izina lyakuti Yeova, lyaiyela, likalozya sile kuli aliwe wenga uwakulisya umu uumbo onsi. Leza kwene wii uwanenyile antu yakwe ati: ‘Nene indi Yeova, lilyo lili zina lyane. Ntalapa ululumbi lwane kuli wiyo ali wensi.’—Ezaya 42:8.
Uzye ipepo lyakwe Eliya na mapepo yakwe ya kasesema yakwe Baali yaile ukuli kumwi? Ukupepa Baali kwalenzile antu yacita uzelele alino nu kupeela malambo ya yantu. Lelo ukupepa Yeova kwalenzile antu yakwe, kuli kuti aina Izlaeli ukutaluka uku vintu vya musango uwo. Fwandi elenganyini pali cii: Ndi cakuti mwalembiile cuza winu wino mwacindika sana kalata, uzye mungenekela ukuti imaya uku muntu muze uwaya ni miyele iipe iyapusana sana ni miyele isuma ino cuza winu wakwata? Kwene citanga cicitike!
Nga mukupepa kuli Yeova, ala mukupepa kuli Kaumba, Isi wa yantu yonsi. * Kasesema Ezaya wapefile ati: ‘We Yeova, wewe uli Tata.’ (Ezaya 63:16) Wikwene ali wino Yesu Klistu walanzilepo lino wanenyile alondezi yakwe ati: “Nkuya kuli Tata nupya Tata winu, na kuli Leza wane nupya Leza winu.” (Yoani 20:17) Yeova a Isi wakwe Yesu. A Leza wino Yesu wapepanga nupya wasambilizye alondezi yakwe ukuti awino yapepa.—Mateo 6:9.
Uzye Baibo ikatunena ukuti twapepa kuli Yesu, kuli Maliya, ku yatakatifu nanti kuli ya malaika? Awe, a kuli Yeova sile. Lolini imilandu iili ino cayela vivyo. Ica kutandikilako, ipepo i nzila ya kupepelamo Leza, nupya Baibo ikati tulinzile ukupepa sile kuli Yeova. (Kufuma 20:5) Cakwe ciili, Baibo ikamulondolola ukuti, ‘aakuvwa wa mapepo.’ (Masamu 65:2) Nanti icakuti Yeova akapeela imilimo iingi kuli yauze, umulimo uu wene aatatala wapeelapo ali wensi. Watulaya ukuti wakulauvwa mapepo itu cila muntu.
Fwandi nga mukulonda Leza auvwa mapepo inu, mwaiusya amazwi yaa aya muli Baibo, aakuti: “Wensi aakaama api zina lyakwe Yeova alapusuka.” (Milimo 2:21) Nomba uzye Yeova akauvwa amapepo yonsi sile? Nanti uzye kwaya na vyuze vino tulinzile ukumanya ndi cakuti tukulonda Yeova auvwa amapepo itu?
^ pala. 9 Imipepele imwi ikalanda ukuti citaya ningo ukulumbula izina lyakwe Leza nanti sile u mwi pepo. Lelo izina lilyo likazanwa umupiipi ni miku 7,000 muli Baibo umu ndimi zino yalembiilwemo pa kutandika, insita izingi likazanwa umu mapepo nu mu malumbo ya yaomvi ya cumi yakwe Yeova.