Usesemo 2. ICIPOWE

“Kulaya ni vipowe.”​—MAKO 13:8.

● Umonsi waya ku muzi wa Quaratadji ku Niger, kuti apusuke ku nzala. Avyala ya monsi kwene wiyo, atowakwe alumendo na akazyana nayo kwene iza kufuma ku muzi pa mulandu wa kupuka inzala. Nomba monsi wiyo watalala sile wenga pa citala pansi. U mulandu ci uno ayelile wenga? Mwene muzi uwi zina lyakuti Sidi walanzile ati: “A pa mulandu wakuti umonsi wii atanga akwanisye ukusakamala [ulupwa lwakwe] nupya atanga atwalilile sile ukuyalolekesya vivyo kwene.”

UZYE IVISINKA VIKALANGILILA CANI? Umu nsi yonsi, apiipi nu muntu wenga pa yantu 7 asikwata ivyakulya ivikumanile cila wanda. Ivipendo vyacila napo ukuvula ku kayeya ka lwanga lwa Sahara umu Africa, kuno umuntu wenga pa yantu yatatu asikwata ivyakulya ivikumanile pa manda aingi. Pakuti muvwikisye vivyo, elenganyini pa lupwa umwaya isi, nyina nu mwana. Ndi cakuti pali sile ivyakulya ivingakumana antu yaili, uzye a weni alinzile ukwikala ni nzala? Uzye a isi? nyina? nanti umwana? Ulupwa u lufwile ukupingulapo alinzile ukwikala ni nzala pa wanda onga na onga.

I VYANI VINO ANTU AINGI YAKALANDA? Yakati insi ikamezya ivyakulya ivyakuti antu yonsi yangakwana visyale nako. Ivyakulya umu nsi vilinzile ukwankanyiziwa sile ningo.

UZYE VIKWENE VINO YAKALANDA I VYA CUMI? I cacumi alimi yakalima ivyakulya ivingi sana nu kuvitwala kuno vikulondekwa ukucila vino cali mpiti. Amauteeko yangankanya ningo ivyakulya uku yantu pakuti intazi ya nzala isile. Lelo nanti yezya ukucita vivyo pa myaka iingi yafilwa kumala inzala.

UZYE MUKWELENGANYAPO ULI? Uzye ilembelo lyakwe Mako 13:8 likufikiliziwa? Nanti icakuti antu yalunduluka umu vya kupangapanga ndakai, uzye intazi ya nzala icili ikacuzya antu umu nsi yonsi?

Ivilundumusi ni cipowe vikalenga kuye intazi na yuze iyaaya pa vimanyililo vya manda ya kusyalikizya.

[Amazwi umu vilembo vikulu]

“Umupiipi na afu wa cipendo ca yana umu nsi yonsi akafwa pa mulandu nu ulwale wakwe pneumonia, umunda alino na malwale yauze nga yataafwa iyakwata ivyakulya ivikumanile.”​—YA ANN M. VENEMAN, AALIPO YA EXECUTIVE DIRECTOR UMU UN CHILDREN’S FUND.

[Kutaizya Atuzumilizye Ukuomvya Icikope]

© Paul Lowe/Panos Vikope