Usesemo 6. Umulimo wa Kusimikila Umu Nsi Yonsi

“Lyasi lisuma lii ilya Wene lilasimikilwa umu nsi yonsi.”​—MATEO 24:14.

● Ya Vaiatea yakaikala pa cilila icayela ukutali pali yemba wa Pacific umu Tuamotu Archipelago. Nanti cakuti Tuamotu yakwata ivilila mupiipi na 80 ivyasalangana pa ncende iyakula ukufika kuli 802,900 sq km, antu akaikalapo yaya sile 16,000. Lelo, ya Vaiatea na ainamupalamano yao yaasimikilwapo kuli ya Nte Yakwe Yeova. U mulandu ci? Pano ya Nte yakalonda ukusimikila antu yonsi ilyasi lisuma pa Wene wakwe Leza, asi mulandu na kuno yakaikala.

UZYE IVISINKA VIKALANGILILA CANI? Ilyasi pa Wene lyasalangana umu nsi yonsi. Umu 2010 mutupu, ya Nte Yakwe Yeova yaomvile amaawazi 1.6 bilyoni ala yakusimikila ilyasi lisuma umu mpanga 236. Kulikuti Nte wenga wasimikilanga mamineti 30 cila wanda. Umu myaka 10 iyapitapo, yapanga nu kusalanganya impapulo izikalanda pali Baibo ukucila pali 20 bilyoni.

I VYANI VINO ANTU YAKALANDA ILINGI? Ilyasi lya muli Baibo lyasimikilwa pa myaka iingi sana.

UZYE VIKWENE VINO YAKALANDA I VYA CUMI? I cacumi antu aingi yasimikilapo api lyasi ilya muli Baibo. Nomba aingi yaomba umulimo uu pa nsita sile inono nupya pa ncende inono. Ukupusanako, ya Nte Yakwe Yeova yene yakasimikila umu nzila ipekanyiziwe ningo, kukaaya makampeni akusimikila umu nsi yonsi akalenga antu aingi sana yasimikilwe. Ya Nte yazizimizya umu mulimo wao uwa kusimikila asi mulandu nu kukaanya ukukafuma uku tuungwe utwa maka sana nupya ututaaya nu luse utukayako pa nsita izipusanepusane. (Mako 13:13) Nupya ya Nte Yakwe Yeova yasilipilwa lino yakusimikila. Lelo yakaomvya insita yao, nu kupeela antu impapulo zyao uwila sile. Umulimo wao ukatungililwa ni misangulo ya kuitemelwa.

Pakuti mumanyilepo na vyuze, tambini mavidyo yatatu, iyakuti “Faithful Under Trials,” ni yakuti “Purple Triangles,” alino ni yakuti “Jehovah’s Witnesses Stand Firm Against Nazi Assault,” aapangwa na ya Nte Yakwe Yeova.

UZYE MUKWELENGANYAPO ULI? Uzye “ilyasi ilisuma ilya wene” likasimikilwa umu nsi yonsi? Uzye ukufikiliziwa kwa usesemo uu kukalangilila ukuti kuli icintu cimwi icisuma icasya cicitike likwene uku nkoleelo?

[Amazwi umu vilembo vikulu]

“Lyonsi lino Yeova alatwalilila ukuzumilizya mulimo uu, tulatwalilila ukuya acincile lino tukusimikila ilyasi lisuma ilya Wene ukuomvya inzila ili yonsi ino tungaomvya pakuti sile tusimikile antu.”​—IBUKU LYA PA MWAKA LYAKWE YA NTE YAKWE YEOVA ILYA MU 2010.