INTAZI IZIKALENGA TUYE NUUPAALILO

“Umu manda akusyalikizya mulaya insita izitale sana.”​—2 TIMOTI 3:1.

UZYE muvwapo nanti ukuilolela kuno ivintu vii iviipe vikucitika?

● Indwala iipisye yakoma antu aingi.

● Antu aingi sana yafwa ku cipowe.

● Imintapendwa ya yantu yafwa ku cilundumusi nupya aingi yasyala ukwaula mang’anda.

Pa mafwa alondolilepo, mumalola vimwi ivikacitika ivyakolana na vii. Mumalola nu kuti Baibo yasoowile ukuti ivya musango uu vilacitika umu “manda akusyalikizya.”

Pakuti mumanye mulandu uno Leza walekela ukuti iviipe vyacitika, lolini icipande icikuti, “U Mulandu ci Uno Leza Ataafumizyapo Iviipe nu Kucula?”

Ivipande vii, vitaayelako uku kumusinila ukuti tukwikala umu nsi itale. Mufwile mukailolela ukuti intazi akuno zyaya. Lelo vyalemvilwe ukuti vimwazwe ukuya nu upaalilo. Vimamulanga ukuti ukufikiliziwa kwa mausesemo yaa 6 kukupiliula ukuti “manda akusyalikizya” yasya yasile. Ivipande vii ivyativikonkana vimalanda na pali vino antu aingi yakaakana usininkizyo kwene uu nupya vimalanda na pa milandu isuma ino tulinzile ukuzumilila ukuti ku nkoleelo kulacitika ivintu ivisuma.