Ivintu Ivisuma Vyasya Vicitike Likwene!

“Kwasyala sile akasita kanono umwipe atalaya penepo . . . Lelo yao aicefya yalapyana impanga nu kusyukila ulongo ulumalilike.”—MASAMU 37:10, 11.

Uzye mungatemwa kulola kuno usesemo uli mwi lembelo ilili papela ukufikiliziwa? Ukwaula nu kutwisika, mungatemwa. Kwaya imilandu ya mpomvu ikatwazwa ukuzumila ukuti likwene wasya ufikiliziwe.

Mausesemo ya muli Baibo yano itulandapo umu vipande ivyafumako yakalangilila ningo sana ukuti tukwikala umu “manda akusyalikizya.” (2 Timoti 3:1-5) Leza wapeezile ya kalemba yakwe Baibo umupasi wa muzilo ukuti yasoowele ivintu vivyo pakuti tungaya nu upaalilo. (Loma 15:4) Ukufikiliziwa kwa mausesemo yaa kukalangilila ukuti intazi zino tukakwata ndakai zyasya zisile likwene.

I vyani ivilacitika pa cisila ca manda ya kusyalikizya? Uwene wakwe Leza ulaateeka antu yonsi (Mateo 6:9) Lolini vino Baibo ikalanda pali vino ivintu vilaya pano nsi pa nsita iiya:

● Inzala ilafumiziwapo. ‘Ivyakulya umu nsi vilavula ni viseekwa vilavula nu mu myamba kwene.’—Masamu 72:16.

● Indwala zilafumiziwapo. “Patalaya nanti wenga alailizyanya apakulwala.”—Ezaya 33:24.

● Insi ilazifiwa. “Ulwanga lulazanga, na maluwa yalawalula umu mpanga ilangoke.”—Ezaya 35:1.

Yaa a masesemo anono sile pa masesemo aya muli Baibo aakutukomelezya yano yasya yafikiliziwe. Uzye mutanga mutemwe ukuuzya ya Nte Yakwe Yeova pakuti yakamulange umulandu uno yazumilila ukuti ivintu ivisuma vyasya vicitike likwene?