Natemilwe sana iviumbwa ukufuma sile lino nali umwance. Amu lupwa lwane yatemilwe ukuya umu kwizizya umu mpanga na kuli ya yemba asuma aya umupiipi ni tauni lya ku mwitu ilya Jyväskylä umu Central Finland. Nupya natemwa inyama. Lino nali umwance, nalondanga ukukumbatila nyau nanti simbwa wensi wino nalola! Lino nakulanga nasokanga sana nga nalola vino ilingi antu yacuzyanga inyama. Umu kuya kwa nsita natandike ukuomba umu kaungwe akakacingilila insambu zya nyama muno nazanyile antu aelenganyanga wakwe nene.

Twaombesyanga pakuti tucingilile inyama. Twasalanganyanga malyasi nu kuya mu kucita ivimvulunganya ku masyopu muno yakakazya ivyakuzwala ivyapangilwa na mavumbu ya nyama nu mu vikuulwa vino yezezyangamo imilembo umu nyama. Twapanzile na kaungwe akapya akakucingilila inyama. Pa mulandu wakuti vino twacitanga pa kwezya ukucingilila inyama vyacizilemo, ilingi twayanga umu uzanzo ku ya mu uteeko. Pa miku iingi yandemanga nu kuntwala ku cilye.

Ukulunda pa kwezya ukucingilila inyama, umwenzo wane waculanga pa mulandu ni ntazi na zyuze izyali umu nsi. Umu kuya kwa nsita ningile umu tuungwe utwingi kumwi sile nu mu kaungwe ka Amnesty International na kaungwe ka Greenpeace. Naomvyanga amaka yane yonsi ku kutungilila ivyacitikanga umu tuungwe tuto. Nacingililanga insambu zya yapiina, na atakweti ivyakulya alino na antu yauze aalondekwanga uwazwilizyo.

Lelo nizile niluka ukuti ntanga nsenule ivintu vya mu nsi. Nanti icakuti utuungwe tuto twaombiisye ukumala intazi zimwi izinono, intazi izikalamba zyene zyatwalilile ukwipilako sile. Cali kwati insi yonsi yatungululwanga na maka ya ciwa nupya kutaali ali wensi uwasakamalanga pa cili consi. Natoovwike.

Nuvwile uyi pa mulandu wakuti nafizilwe ukusenula ivili vyonsi, fwandi natandike ukwelenganya pali Leza na pali Baibo. Ku cisila, nasambililepo Baibo na ya Nte Yakwe Yeova. Nanti icakuti namanyile ukuti ya Nte yantemilwe nupya yandanganga icikuuku, ntaipekinye ukusenuka muli vino nacitanga. Pa nsita yii, ivintu vyasenwike.

Natozile Baibo yane nu kutandika ukubelenga. Yanteekizye sana. Nazanyile amalyasi aingi amuli Baibo akatusambilizya pa kusakamala ningo inyama. Wakwe vino pali Mapinda 12:10 pakalanda ukuti, “antu asuma yakasakamala inyama zyao.” (Good News Translation) Nupya nilwike ukuti Leza asi aliwe akalenga kuti kuye intazi izyaya umu nsi. Lelo intazi zitu zikavulilako sile pa mulandu wakuti antu aingi yasilondela masunde yakwe. Natemilwe sana lino namanyile ukuti Yeova watutemwa nupya akateeka umwenzo.—Masamu 103:8-14.

Apa nsita ili yonga kwene nazanyile apa kulengela ibuku lyakuti Uzye Baibo Ikasambilizya Ukuti Uli? nupya nalenzile ukuti yantumile ibuku lii. Pataalengile ya Nte atwalane izile ku ng’anda nu kundenga ukuti tutandike ukusambilila Baibo, nani nazumile. Natandike nu kuzanwa umu kulongana pa Ng’anda ya Wene. Ni cacitike i cakuti natandike ukutemwa sana icumi ca muli Baibo cino nasambililanga.

Pa mulandu na Baibo, nasenwike sana. Natiile ukupeepa nu kumwa sana uwengwa. Nazifizye imilolekele yane ni mivwangile yane. Nasenwile amelenganyo yane pali vino nalolanga uteeko. (Loma 13:1) Nupya natiile ukucita iviipe vino natemilwe sana ukucita.

Icantalile sana u kusenula melenganyo pali vino nalolanga utuungwe utukacingilila insambu zya nyama ni zya yantu. Citangupile kusenuka. Pa kutandika nayuvwanga ukuti nga nafuma umu tuungwe tuu ale natupondokela. Lelo nizile imanya ukuti Uwene Wakwe Leza ali uno ulazifya sile ivintu umu nsi itu. Napingwilepo ukuti naomvya maka yane yonsi uku kutungilila Uwene uwo nu kwazwa yauze kusambilila pa Wene kwene uu.—Mateo 6:33.

Vino nalwisyanga ukusenula ivintu umu wikazi, napatukanyanga antu umu maumba yaili, yamwi nayalolanga ukuti asuma, yauze nayo nayalolanga ukuti aipe nupya nacuzyanga yano nalolanga ukuti aipe. Lelo pa mulandu wa kusambilila Baibo, nata ukupata antu yauze. Lelo nkaezya ukuya nu kutemwa uku yantu yonsi. (Mateo 5:44) Vyuze vino nkacita pa kulanga ukutemwa, u kunenako yauze api lyasi lisuma ilya Wene Wakwe Leza. Nkatemwa sana ukulola kuno umulimo kwene uu ukulenga antu ukuya nu mutende ni nsansa alino nu kuya nu upaalilo.

Nizile inja nu mutende umu melenganyo lino nasiile vyonsi umu makasa yakwe Yeova. Nasininkizye ukuti Kaumba atalaleka ukuti antu yacuziwa kumwi ni nyama manda pe, nanti ukuleka ukuti insi itu iyembe iyononwe. Lelo ukupitila umu Wene, wasya ace azifye vyonsi ivyononwa. (Ezaya 11:1-9) Cikanzanzya sana ukumanya icumi cii nu kwazwa yauze ukutaila icumi kwene cii. Ndakai nsilola ukuti mfwile ukusenula ivintu muno nsi.