“Ndi cakuti ya kacita ya viipe yafwa, yakaya mu moto wa pe, muno yakacululuka manda pe.” (Catechism of the Catholic Church) Intunguluzi zya mapepo zimwi zikalanda ukuti aaya ku cifulo ca yafwe yaataluka sana kuli Leza.

“Umuntu akaifya aliwe alafwa.” (Ezekelo 18:4) Afwe “yatamanya nanti acimwi.” (Kasambilizya 9:5) Ndi cakuti umuntu akafwa nupya asimanya icili consi, uzye angacuziwa uli uku “moto wa pe” nanti sile ukuvwa uyi pa mulandu wa kutaaluka kuli Leza?

Muli Baibo, izwi lya Ciebele ni Cigiliki lino aingi yasenula ukuti “umoto wa pe” likalozya ku cifulo ca unkolanya ukwaya afwe. Lino Yobo wacuzile sana ku ulwale uwipisye, wapefile ati: “Fwandi cangecizipe umfisa kuko kwene ukwaya afwe.” (Yobo 14:13) Yobo atalondanga ukupuuzila umu cifulo ca kucuziwilwamo nanti ukutaluka kuli Leza, lelo walondanga ukupuuzila umwi lindi.

Cisambilizyo cakuti Leza umunkalwe cikalenga tufilwe ukupalama kuli aliwe. Rocío aakaikala ku Mexico walanzile ukuti: “Ukufuma ku wance yansambilizye ukuti kwaya umoto wa pe. Nuvwile sana intete icakuti nelenganyanga ukuti Leza ataya ni miyele isuma. Nelenganyanga ukuti wakalipa nupya a kaitemwe.”

Vino Baibo ikasambilizya pa upinguzi wakwe Leza na pali vino afwe yaya vyalenzile Rocío ukusenuka pali vino welenganyanga pali Leza. Walanzile ukuti: “Nayuvwile umuntungwa, cali kwati yangisizya icisendo icinyome cino nali naco. Nataile ukuti Leza akalonda ivintu vyatuzipila, watutemwa nupya nani ndinzile ukumutemwa. Waya wakwe isi uwatalema ana yakwe pa makasa nupya akulonda ivintu viyazipile.”—Ezaya 41:13.

Antu aingi yakaezya na maka ukuombela Leza pa mulandu wa kutiina umoto wa pe, lelo Leza asilonda ukuti mwamuombela pa mulandu wa kumutiina. Lelo Yesu walanzile ukuti: “Uwatemwa Yeova Leza wako.” (Mako 12:29, 30) Nupya ndi cakuti twiluka ukuti Leza ataya nu lufyengo, tulataila ukuti nu ku nkoleelo kwene atalapingula nu lufyengo. Naswe kwene tungalanda nu kusipa wakwe Elihu cuza wakwe Yobo uwalanzile ukuti: “Leza asicita icintu iciipe, awe. Wamaka yonsi asifyenga umuntu foo.”—Yobo 34:10.