“Tutazumilizyanya ndi cakuti Leza wakwata izina nanti foo, nupya ndi cakuti wakwata, ale i zina ci?”—Professor David Cunningham, Theological Studies.

Leza walanzile ati: ‘Nene indi Yeova, lilyo lili zina lyane.’ (Ezaya 42:8) Yeova i zina lya Ciebele ilikapiliula ukuti “Akalenga Icili Consi Ukuya Vino Akulonda.”—Utandiko 2:4, futunoti NWT.

Yeova akalonda twaomvya izina lyakwe. Baibo ikalanda ukuti “Mwaama pi zina lyakwe. Mwamanyisya antu pali vino wacita. Mwalanda ukuti izina lyakwe lyacindamikwa.”—Ezaya 12:4, NWT.

Yesu waomvyanga izina lyakwe Leza. Yesu wanenyile Yeova umwi pepo ati: “Imanyisya antu yaa [asambi yakwe Yesu] izina lyako nupya ndatwalilila ukulimanyisya.” U mulandu ci uno Yesu wamanyisizye izina lyakwe Leza uku yasambi yakwe? Watwalilile ukulanda ati: “Pakuti nayo yaatemwa antu yauze wakwe vino wantemwa na pakuti inje muli aliyo.”—Yoani 17:26.

Walter Lowrie uwasambilila pa vya mapepo walanzile ati: “Umuntu aatamanya izina lyakwe Leza ala atamumanya nupya atanga amutemwe.”

Umonsi uwi zina lyakuti Victor wayanga ku calici cila mulungu, nomba wayuvwanga ukuti atamanyile ningo Leza. Walanzile ati: “Lyene nizile imanya ukuti izina lyakwe Leza a Yeova, nupya cali kwati namukomenkanya pa muku wa kutandikilapo. Nuvwile kwati lyene nakomenkanya wino nuvwilepo pa miku iingi. Natandike ukumulola ukuti u wa cumi cumi nupya nizile inja cuza wakwe.”

Yeova nawe kwene akapalama uku yantu akaomvya izina lyakwe. Leza walaya ‘antu akacindika izina lyakwe’ ukuti: “Ndaya na mizu kunoyali ndi vino umukwasi akaya na mizu ku mwanakwe wino akamutumikila.” (Malaki 3:16, 17) Nupya Leza akalambula yayo akaama pi zina lyakwe. Baibo ikati “Wensi aakaama api zina lyakwe Yeova alapusuka.”—Loma 10:13.