1, 2. (a) I vilangililo ci vino Yesu walanzile uku yasambi yakwe? (Lolini icikope ca kutandikilako.) (b) I vyani vino tulinzile ukumanya apa cilangililo ca mfwele ni mbuzi?

YESU wafuma akulanda na Petulo, Andeleya, Yakobo, na Yoane, ya cuza yakwe. Ala alino yafuma yakuvwa kuno akulanda icilangililo ca muomvi mutailwe uwa mano, akazyana ikumi, alino ni cilangililo ca matalanti. Lyene pa kumalila ukulanzyanya, Yesu walanda umulumbe na uze. Walanda apa nsita ino “Mwana wa muntu” alapingula “amu nko zyonsi.” Asambi yakwe yaatemilwe sana lino yuvwile icilangililo cii! Umu cilangililo cii, Yesu walanzile pa maumba yaili, iumba lya mfwele alino ni umba lya mbuzi. Nupya walanzile api umba na lyuze ilicindame sana kulikuti “aina” ya “Mwene.”—Welengini Mateo 25:31-46.

² Icilangililo cii cikafika antu yakwe Yeova pa myenzo nupya avino cifwile ukuya, pano umu cilangililo cii, Yesu walanzile pali vino vilacitikila antu. Walanzile umulandu uno yamwi yalapokelela umi wa pe alino yauze yene foo. Pakuti tukapusuke tulinzile ukuvwikisya vino Yesu walanzile nu kuviomvya umu umi witu. Umi witu uli umu uzanzo, fwandi  tulinzile ukuyuzya ukuti: Uzye Yeova watwazwa uli ukuvwikisya cilangililo cii? U mulandu ci uno tungalandila ukuti icilangililo cii cikalanda sana pali vino umulimo wa kusimikila wacindama? Aaweni apeelwa umulimo wa kusimikila? Nupya u mulandu ci uno iicicindamila ukuti tuye acisinka uku “Mwene” nu ku “ina” yakwe?

3, 4. (a) I vyani vicindame vino tulinzile ukumanya pakuti tuvwikisye icilangililo ca mfwele ni mbuzi? (b) Uzye Lupungu lumwi ulwa mu 1881, (Zion’s Watch Tower) lwalondolwile uli icilangililo cii?

³ Pakuti tuvwikisye icilangililo ca mfwele ni mbuzi, tulinzile ukuvwikisya ivintu vitatu ivicindame ivyayamo: vino aalumbulwamo yakaimililako, insita yaupinguzi, alino nu mulandu uno yamwi yaela imfwele na yamwi imbuzi.

⁴ Umu 1881, Lupungu lumwi (Zion’s Watch Tower) lwalondolwile ukuti “Mwana wa muntu,” wino aka-amwa nu kuti “Mwene,” a Yesu. Nupya lwalondolwile ukuti “ina” ya Mwene aasi yaayo sile alaateka ukwi yulu na Yesu lelo na yonsi yano yalikala pano nsi lino yalaya amalilike. Lupungu lwalondolwile ukuti, kupaalukanya imfwele ni mbuzi kulacitika umu Myaka 1,000 Iya Kuteeka Kwakwe Yesu nu kuti yaayo akolanyanga ukutemwa kuno Leza wakwata, yalaya kulusansa lwa mfwele.

5. Uzye umu 1923, antu yakwe Yeova yuvwikisye uli icilangililo cii?

⁵ Mukuya kwa nsita, Yeova wavwilizye antu yakwe ukuvwikisya icilangililo cii. Umu 1923 Lupungu Lwa Mulinzi lwakwe Okotoba 15, lwalondolwile ukuti “Mwana wa Muntu” a Yesu. Nomba, Lupungu luu lwalondolwile ukuomvya amalembelo ukuti “ina” alumbulwa umu mulumbe yakaimililako yaayo sile aalateeka na Yesu nu kuti yalaya ukwiyulu, nupya Lupungu lwalondolwile ukuti yaayo aaya wa mfwele yakaimililako antu aalikala pano nsi ala yakuteekwa nu Wene Wakwe Yesu. Pa mulandu wakuti cilangililo cikalanda ukuti yakaavwilizya aina yakwe Klistu, ukupalukanya nanti upinguzi ulinzile ukuyako lino aina yakwe Yesu apakwe yacili pano nsi, lino Imyaka 1,000 iya Kuteeka itali itandike. Nupya icipande calondolwile ukuti imfwele ayaayo ataile muli Yesu na yano yazumile ukuti Uwene ulalenga ukuti kukaye umi usuma.

6. Uzye umu 1995, u kwaluka ci ukwaliko muli vino twamanyile icilangililo ca mfwele ni mbuzi?

⁶ Apa myaka iingi twelenganyanga ukuti antu yakapingwilwa apa mulimo wakusimikila uno tukaomba umu manda yaa akusyalikizya. Ndi cakuti yazumila ilandwe lisuma, ala yaaya uku lusansa lwa mfwele, nupya ndi yakaana ilandwe lisuma ala yaaya uku lusansa lwa mbuzi. Nomba umu 1995 kwali ukwaluka muli vino twamanyile umulumbe uu. Lupungu Lwa Mulinzi lwakolinye amazwi aaya pali Mateo 24:29-31 (welengini) na pali Mateo 25:31, 32. (welengini), nu kulondolola ukuti, Yesu alapingula antu umu nsita ya ucuzi ukulu cuze lino Umwana wa muntu “aliiza mu lulumbi lwakwe.” *

7. Uzye lyene tuvwikisya uli icilangililo?

⁷ Ndakai, tuvwikisya icilangililo ca mfwele ni mbuzi. Kulozya kuli yaayo alumbulwamo vino yakaimilako, twamanya  ukuti “Mwana wa muntu,” a Yesu Umwene. Aaka-amwa ukuti “ina” yakwe Klistu, a onsi na anaci apakwe yano yalateeka na Yesu kwiyulu. (Loma. 8:16, 17) “Mfwele” ni “imbuzi,” zikaimililako antu amunko zyonsi. Yaa yene yasipakwa nu mupasi wa muzilo. I nsita ci lino kulaya upinguzi? Upinguzi uu ulayako uku kusila kwa ucuzi ukulu cuze uli uku nkoleelo. Nupya, u mulandu ci uno antu yalapingulwa ukuya imfwele nanti imbuzi? Upinguzi ulayako kulingana na vino yaombanga na ina yakwe Klistu apakwe aali pano nsi. Lino tukulolela impelekezyo ya nsi iyatipalamisya, tukataizya sana ukuti Yeova watwazwa ukuvwikisya nu kutulondolwela ningo ivilangililo ivyalembwa muli Mateo ivipande 24 na 25!

8, 9. U mulandu ci uno yaayo aakola imfwele yalondololwa ukuti ‘aololoke’?

⁸ Umu cilangililo ca mfwele ni mbuzi, Yesu atalumbwilemo umulimo wa kusimikila. Uzye lyene, u mulandu ci uno tungalandila ukuti icilangililo cii cikatusambilizya ukuti umulimo wa kusimikila wacindama?

⁹ Cakutandikilapo, iusyini ukuti Yesu akutusambilizya ukuomvya icilangililo. Ukwaula nu kutwisika, asikulanda apa kupalukanya imfwele ni mbuzi izya cumicumi. Nalino walanzile ukuti antu ali wa mfwele yalinzile ukupela ivyakulya, kuzwika, kusakamala, nanti kutandalila aina yakwe umu cifungo, atalandanga pa vintu vya cumicumi. Lelo, walangililanga imiyele ino imfwele zya unkolanya zilinzile ukulangizya uku ina yakwe. Walondolwile yaayo aakola imfwele ukuti ‘aololoke’ pano yaamanya ukuti Klistu wakwata iumba lya ina apakwe acili pano nsi, nupya yakaombela pamwi nayo umu manda yaa akusyalikizya aatale.—Mate.10:40-42; 25:40, 46; 2 Tim. 3:1-5.

10. Uzye aaya kwati imfwele yangaazwa uli aina yakwe Yesu?

¹⁰ Cakwe ciili, lolini vino Yesu walandangapo umu mazwi yakwe. Walandanga apa cilangililo ca kulanga ukwiza kwakwe nga ni mpelelekezyo ya nsi. (Mate. 24:3) Apa kutandika umwi lyasi lyakwe, Yesu walanzile ukuti kulaya ivintu vyakuzunguka ivilalangilila ukwiza kwakwe—kulikuti, ilandwe lisuma ilya Wene linzile ‘ukukosolwa umu nsi yonsi.’ (Mate. 24:14) Nupya lino atali alande apa mfwele ni mbuzi, walanzile icilangililo ca matalanti. Wakwe vino twalanzile umu cipande cafumako, Yesu walanzile icilangililo uku yasambi yakwe apakwe, nanti “ina” yakwe, ukuti yalinzile ukuombesya umu mulimo wakusimikila. Lelo aanono sile aasyala pano nsi, nupya kuli umulimo ukulu cuze ulinzile ukuombwa. Icilangililo ca mfwele ni mbuzi cikalangilila ukuti apakwe yalinzile ukwazwiwa. Acino fwandi, inzila yonga ino aaya kwati imfwele yangalangilamo ukuti yaaya ni cikuuku uku ina yakwe Yesu, u kuombela capamwi nayo umu mulimo wa kusimikila. Nomba, i vyani ivyaya umukuombela pamwi na ina yakwe Klistu? Uzye u kusangula sile impiya izyakuomvya umu mulimo uu, nanti ukuyakomelezya sile ukuti yaasimikila?

11. I cuzyo ci cino tunguzya, nupya u mulandu ci?

¹¹ Aingi apa yalondezi yakwe Yesu 8 milyoni alipo ndakai asi apakwe. Yataapokelela amatalanti yano Yesu wapezile aomvi yakwe apakwe. (Mate. 25:14-18) Nomba icuzyo cino tunguzya i cakuti,  ‘uzye na asi apakwe kwene yalinzile ukuombako umulimo wa kusimikila?’ Lekini tulande imilandu imwi-imwi ino tungalandila ukuti avivyo kwene.

12. Tukasambililako cani uku mazwi yakwe Yesu aaya pali Mateo 28:19, 20?

¹² Yesu wanenyile alondezi yakwe yonsi ukuti yaasimikila. Lino Yesu watutulwike, wanenyile alondezi yakwe ukuti yacite antu kuya asambi, kuyasambilizya kucita “vyonsi” vino wayanenyile. Muli vino wayanenyile ukucita, mwali nu kusimikila. (Welengini Mateo 28:19, 20.) Fwandi, alondezi yakwe Yesu yonsi yalinzile ukusimikila, usi mulandu yakwata utailo wa kwikala ukwiyulu nanti pano nsi.—Mili. 10:42.

13. Uzye icilolwa cino Yoane waweni cikalangilila cani, nupya u mulandu ci?

¹³ Ibuku lya Umbwilo, likalangilila ukuti umulimo wa kusimikila wali nu kuombwa na apakwe alino na asi apakwe. Yesu wapeezile umutumwa Yoane icilolwa cakwe “nawinga,” kulikuti apakwe aaya 144,000 yano yalateeka pamwi na Yesu ukwiyulu, aakaama antu ukuti iize yamwe “manzi yano yakapela umi.” (Umbw. 14:1, 3; 22:17) Amanzi yaayo aunkolanya, yakaimililako imfwa yakwe Yesu ino wafwile pakuti akulule antu ku luyembu ni mfwa. (Mate. 20:28; Yoa. 3:16; 1 Yoa. 4:9, 10) Apakwe yakasambilizya antu apa mfwa yakwe Yesu na vino ingayazwa. (1 Kol. 1:23) Lelo umu cilolwa, Yoane waweni antu na yauze aatali umwiumba lya apakwe. Nayo kwene yayanenyile yati, ‘Izini!’ Yakauvwila, nupya yakanenako yauze ukuti ize yamwe amanzi aakapeela umi. Iumba lii lyakwe ciili lino waweni, a yaayo aakwata utailo wakwikala pano nsi. Fwandi, icilolwa cii cikulangilila ukuti yonsi yano yazumila ‘ukwiza’ yalinzile ukuomba umulimo wa kusimikila auze.

14. Tungalanga uli ukuti tukauvwila “masunde yakwe Klistu”?

 ¹⁴ Yonsi ‘aakaayela masunde yakwe Klistu’ yalinzile ukusimikila. (Gala. 6:2) Yeova akalonda yonsi ukuvwila amasunde ali yonga. Aali vino waneenyile na ina Izlaeli ukuti: “Malamulo ali onga kwene yaa yalinzile kulondelwa ku ina Izlaeli nga na inamasi yano aikala pakasi kinu.” (Kufu. 12:49; Levi. 24:22) Ukuya kwene, ndakai asi masunde yonsi yano tukalondela aapezilwe uku ina Izlaeli. Lelo fwensi, usi mulandu fwefwe apakwe nanti foo, tulinzile ukuvwila “masunde yakwe Klistu.” Umu masunde yakwe Klistu mwaaya na vyonsi vino Yesu wasambilizyanga. Icicindame sana apa vintu vino Yesu wasambilizye i cakuti, tulinzile ukutemwana. (Yoa. 13:35; Yako. 2:8) Inzila yonga ino tungalangilamo ukuti twatemwa Leza, Yesu na antu yanji, u kusimikila ilandwe lisuma apa Wene.—Yoa. 15:10; Mili. 1:8.

15. U mulandu ci uno tungalandila ukuti Yesu wanenanga alondezi yakwe Yonsi ukusimikila?

¹⁵ Amazwi yano Yesu walanzile ukwiumba ilinono pa nsita imwi yangalozya ukwiumba ilikalamba. Yesu wapangine na atumwa sile 11 ukuti yalateeka nawe umu Wene wakwe, lelo walozyanga uku yantu 144,000 ukuti aaliyo alateeka nawe. (Luka 22:29, 30; Umbw. 5:10; 7:4-8) Avino caali na lino watuutulwike, wanenyile alondezi yakwe anono sile, ukuti yakaakosoola ilandwe lisuma. (Mili. 10:40-42; 1 Kol. 15:6) Lelo atumwa yakwe acisinka akutandikilako yamanyile ukuti nayo kwene yafwile ukusimikila, nanti icakuti yatuvwileko kuno Yesu akulanda. (Mili. 8:4; 1 Pet. 1:8) Nafwe kwene ndakai, twamanya ukuti tufwile ukusimikila, nanti icakuti tutuvwapo kuno Yesu akutunena ukuti twaomba umulimo uu. Alino, ndakai twafika na 8 milyoni fwemuno tukaomba umulimo wa kusimikila. Twamanya ukuti ndi tukusimikila, aali lino tukalanda ukuti icumicumi twaaya nu utailo muli Yesu.—Yako. 2:18.

16-18. Uzye alapingulwa ukuya imfwele yangaazwa uli apakwe, nupya u mulandu ci uno yalinzile ukucitila vivyo ndakai?

¹⁶ Satana akulwisya sana alondezi yakwe Yesu apakwe yano yacili pano nsi, nupya alacilapo ukuyalwisya lino “nsita inono” ino asiile nayo ikuya umu kusila. (Umbw. 12:9, 12, 17) Nanti icakuti apakwe yakuzizimizya amezyo yano Satana akuyaleetela, yakutwalilila ukulundulula umulimo wakusimikila nupya antu aingi sana yakuuvwa ilandwe lisuma. Tutanga tutwisike ukuti, Yesu akwazwilizya apakwe, nupya akuyatungulula.—Mate. 28:20.

¹⁷ Antu aingi aaya kwati imfwele yano yakuvulilako, yakalola ukuti i syuko ukutungilila aina yakwe Klistu, asi sile umu mulimo wa kusimikila lelo na muli vyuze. Yakatungilila aina yakwe Yesu ukupitila mukupeela imisangulo nu kwazwilizya ukukuula ama Ng’anda ya Wene, Ivikuulwa Ivikalamba Ivya Kulonganilamo, maofesi yakwe ya Nte, nupya yakauvwila yaayo akatungulula yano “muomvi mutailwe uwa mano” wasoonta.—Mate. 24:45-47; Ayeb. 13:17.

¹⁸ Likwene sile apakwe acili pano nsi yasya yace yapokelele icimanyililo cakusyalikizya. Lyene, angeli yalatako uku miza ini kulikuti ucuzi ukulu cuze, ale watandika. (Umbw. 7:1-3) Lino Alamagedoni itali itandike, Yesu alasenda apakwe alaya pano nsi ukwiyulu. (Mate. 13:41-43) Acino fwandi, ikwene ili nsita yakuti aalapingulwa ukuya imfwele yaombela pamwi na ina yakwe Klistu.