LYASI LYAKUTANDIKILAKO | UZYE YESU WATUKULULA KULI VYANI?
Umulandu Uno Tulinzile Ukukululwa
“Umuntu wensi uwala wavyalwa ku mwanaci, umi wakwe pano nsi utaya utantalile. Lelo umi kwene uo, wavulisya amalanda. Waya wi luwa ilikasapatuka nu kuonza, nga liwela linyala nu kuuma. Waya wa cinzingwa, icisiikalila pano cili.”—Yobo 14:1, 2.
Ukufuma sile na mpiti, antu yakaelenganya pali vino cingazipa ndi cakuti yangaikala amanda pe ukwaula ukukota, ala yali nu umi usuma. Nomba icaulanda icakuti, swensi tukafwa. Amazwi yakwe Yobo aali papela, aavwanzilwe ukucila pa myaka 3,000 iyapitapo, aacumi na ndakai kwene.
Antu umu nsi yonsi yakalonda kuti yaikala ukwaula ukufwa. Baibo ikatunena ukuti Leza wika umu myenzo itu ukulondesya ukwakwikala amanda pe nu kulondesya ukumanya ivintu. (Kasambilizya 3:11) Lyene vino caya vivyo, uzye mukwelenganya ukuti cingaya sile ningo Leza ukwika umu yantu ivintu ivitanga vifikiliziwe? Ndi cakuti mwasuka ukuti awe, mwasuka ningo sana. Baibo ikati imfwa u mulwani nupya ili nu “kucimviwa.”—1 Kolinto 15:26.
Tutanga tutwisike ukuti imfwa umulwani. Kutaaya umuntu aakaelenganya sile ningo uwatemwa imfwa. Ndi twalola ukuti uzanzo ukwiza, tukapuuka, ukufisama, nanti ukuutuka. Ndi twalwala, tukalonda inzila zya kupolelamo. Tukaezya na maka ukusenka uku vintu ivingalenga kuti tufwe.
Uzye kwaya icingalenga tuzumile ukuti umulwani kwene wii uwa mpiti alafumiziwapo? Ee, akuno caya. Yeova, Kaumba, ataumvile antu kuti yaikala sile imyaka inono nu kufwa. Pa kutandika Yeova ataalondanga kuti antunze yafwa. Walondanga kuti antunze yaikala amanda pe pano nsi, nupya twamanya ukuti Leza alafikilizya vino akaalonda ukucita.—Ezaya 55:11.
Uzye lyene cilaya uli pakuti imfwa ikafumiziwepo? Ukufuma sile na mpiti, antu yakaalonda ukufumyapo imfwa, nomba yaafilwa. Na ndakai kwene antu yakalondesya ukusisyapo imfwa. Aasambilila vyakwe sayansi yaapanga imilembo imwi iyaleenga kuti antu yataalwala indwala zimwi. Yakaomvya vimasyini ukulola vino antunze yaapangwa. Umu ncende izingi, antu yakaikala imyaka ingi ukucila vino cali mpiti. Nomba antu yataaleka ukufwa. Wakwe vino Baibo ikaalanda, antu ni vinyama vyonsi kwene “vikaya uku ncende ili yonga, ku lukungu.”—Kasambilizya 3:20.
Ilyasi lisuma i lyakuti tutalinzile ukutaila ukuti antunze acenjela aliyo yalasisyapo intazi kwene ii iyatandike mpiti sana. Yeova wapekanya mpiti vino ali nu kutupususya nanti ukutukulula uku mfwa, nupya Yesu aliwe alafikilizya amapekanyo kwene yaa.
