Baibo ikatunena ukuti lino impelelekezyo iliza kulaya ukononwa, ikaati: “Kulaya macuzi aipisye ukuluta, yano atatazile yayeko kufuma lino insi yaumvilwe kufika na ndakai. Lelo Leza ndi atacefizye amanda yalya, kusi nanti umwi angatuulwa.” (Mateo 24:21, 22) Nomba, Leza watulaya ukuti aingi yalapusuka, walanda ati: “Caleka insi ii . . ikupita, . . . , lelo muntu wino akacita kulonda kwakwe Leza akaikalilila manda pe.”—1 Yoane 2:17.

Uzye ndi mukulonda ukuti muce mupusuke nu ‘kwikalilila manda pe,’ mulinzile ukucita uli? Uzye mufwile ukutandika ukusunga ivyakulya nanti ukuipekanya pakuti mutaca mucule lino insi ilaononeka? Awe foo. Baibo ikatukonkomezya vino tufwile ukucita. Ikaati: Lyene vino “vintu vii vilasunguluka mu musango kwene uu, uzye mwemo mulinzile ukuya antu ya musango ci? Umi winu ulinzile kuya wa muzilo nupya muipeelesye ku kutumikila Leza, lino mucili lolela Wanda wa Mwene.” (2 Petulo 3:10-12) Amazwi yakuti “Vintu vii” imiteekele ya untunze alino na antu yonsi aakatungilila miteekele kwene ii ukucila ukutungilila imiteekele yakwe Leza. Fwandi nanti tungasunga ivyakulya, vitanga vize vitucingilile lino kulaya uononesi.

Acino, ndi tukulonda tuce tupusuke uononesi, tulinzile ukuombela Yeova nu mwenzo onsi, nupya tulinzile ukuya ni miyele iikamuzanzya. (Zefaniya 2:3) Lekini swensi lino tucili “lolela Wanda wa Mwene,” tutaakolanya antu amu nsi yano yataasumba amano uku vintu vikalanga ukuti tuli mu manda akusyalikizya. Ya Nte Yakwe Yeova yangamulanga muli Baibo vino mungacita pakuti muce mupusuke uononesi.