Antu yonsi yakalonda sana ukuya amutende, acisinka nupya acikuuku. Nomba fwandi, u mulandu ci uno antu yamwi yaela ankalwe, nupya yakafyenga antu yauze? Alino amalyasi aipe yano yakasimika yavula sana. Uzye ale kwaya umwi akalenga ukuti antu yaacita iviipe?—Welengini 1 Yoane 5:19.

Uzye ale Leza waumvile antu ukuti yaacita iviipe? Awe, Yeova waumvile antu umu cata cakwe, nupya walondanga ukuti yaakolanya ukutemwa kuno wakwata. (Utandiko 1:27; Yobo 34:10) Lelo antu yapeelwa na amaka yakuisolwela ukucita icisuma nanti foo. Acino lino avyazi itu akutandikilako yasolwile ukucita iviipe, yaakanyile ukukolanya Leza. Avino yatiile ukuya amaliilike. Fwandi twapyana ukukana malilika kwao.—Welengini Malango 32:4, 5.

Leza akalonda ukuti tutaacita iviipe. (Mapinda 27:11) Fwandi acino akatusambilizya ivingatwavwa ukutaaluka uku viipe, alino ni vyakucita pakuti twaya ni nsansa. Lelo, ndakai tutanga tuye nu kutemwa ukumalilike ndi vino Leza waaya.—Welengini Masamu 32:8.

Ndakai Leza waleka sile iviipe vyalukucitika, pakuti antu yasininkizye aeneco uyi uwaya umukucita iviipe. (2 Petulo 3:7-9) Lelo, likwene sile antu akauvwila Leza yalikala umu nsi isuma cuze nupya yalaya ni nsansa.—Welengini Masamu 37:9-11.