Yakasimula wakwe cimwi ungati yamapapuka sile! Ndi cakuti ukuwelenga ilyasi muli Baibo ilya pa mfwalasi zini izya maka na akwelapo, cikauvwika kwati ukulola na kuno zikusimula! Imfwalasi ya kutandikilapo iitiswe, uwakwelapo u mwene walulumbi uwazwala ingala nanti cisote ca wene. Lyene palondelela imfwalasi iyenzu, uwakwelapo akafumya umutende pano nsi. Nupya palondelela mfwalasi yakwe citatu itifi, wino wakwelapo walema vipimilo ivikalangilila ilandwe ilipe pa kuulizya kwa vyakulya. Imfwalasi yakwe cini iiswepuluke, uwakwelapo akaimililako indwala izipisye izikalenga imfwa. Nupya na malindi, cifulo ca antu afwe, vyamulondiile apiipi ukonoona ma umi ya yantu!—Umbwilo 6:1-8.

Ya Crystal yalanzile ukuti: “Nuvwile intete umuku wa kutandikilapo lino nawelenzile pi lyasi lya yonsi aapa mfwalasi. Nuvwile kwati Uwanda wa Upinguzi wafika alino ninsi ntaipekinye, nayuvwile ukuti ntakupusuka.”

Ya Ed nayo yatiile: “Navulungine pi lyasi lya yonsi 4 aapa mfwalasi izipusane-pusane. Nomba lino nizile nuvwikisya upiliulo wa cilolwa cii, nuvwile ningo.”

Uzye namwe mukayuvwa wakwe ya Crystal vino yayuvwile pa konona kwa yonsi 4 aapa mfwalasi? Nanti mukayuvwa wakwe ya Ed? Nga mukayuvwa wakwe ya Crystal, nanti ya Ed cisi mulandu, vino aonsi yaa yakwela pa mfwalasi, i lyasi ilisuma pa malyasi amanyikwa sana umwi buku lya kusyalikizya muli Baibo ilya Umbwilo. Uzye umumanya ukuti ilyasi kwene lii lingamwazwa? U munzila ci? Leza walaya ukuti mungaya ni nsansa ndi cakuti mukuwelenga nu kusambililako uku vintu ivyalembwa umwi buku kwene lii ilya usesemo.—Umbwilo 1:1-3.

Nanti cakuti yamwi yakauvwa intete pa cilolwa cii, mwemo mutalinzile ukutiina. Cisinka i cakuti, antu aingi cuze yazana ukuti cilolwa cii cikayazwa ukukomya utailo wao nupya yakamanya ukuti ivintu vilazipa uku nkoleelo. Namwe kwene mungaya nu utailo nga muvwikisya! Mukwai welengini api lyasi lii.