“Lelo aombesya, aiombela umwineco, pakuti angakwata ivya kupeelako yauze aakulondekwa uwavwilizyo.” —EFESO 4:28.

Kaumba witu akalonda ukuti twatemwa incito ino tukaomba. U mulandu ci? Pano umuntu aakaombesya akaya ni nsansa pa mulandu wakuti akukwanisya ukuisakamala nu kusakamala ulupwa. Nupya angakwanisya nu kwazwa akulondekwa uwazwilizyo. Na amwingizya incito yangamucindika. Fwandi umuntu aakaomba ningo, ilingi akatwalilila pa ncito. Nupya Malembo yakalondolola ivisuma ivikafuma umu kuombesya ukuti “uwila wakwe Leza.”—Kasambilizya 3:13.

“Twasininkizya ukuti twaya na kampingu musuma, pano tukalonda ukuya aacisinka umu vintu vyonsi.” —AEBELE 13:18.

Ndi cakuti tuli acisinka tulayuvwa acilumba, kuya nu mutende umu melenganyo, alino nu kulaala ningo. Kulunda pali vii, antu yauze yalatutaila nu kutucindika. Antu aataya ni cisinka yasikwata ivintu visuma. Nupya kampingu yao ikayacuzya sana, alino yakasakamikwa ukuti wanda umwi vino yakacita vilamanyikwa.

“Lekini uwikazi winu utaya uwa kutemwa impiya, lelo mwateeka umwenzo kuli vino mukweti.”—AEBELE 13:5.

Tukalondekwa impiya izya kukalila ivyakulya alino nu kuomvya kuli vyuze vino tukalondekwa. Lelo umu “kutemwa impiya” mwaya uzanzo. Kulondesya impiya kungalenga umuntu asumba insita ikulu na maka uku kulonda impya izingi. Nupya ukulondesya impiya izingi kungalenga iya ataaika mano uku muci, kukanakwata insita ikulu iya kuzanwa pamwi na ana, nupya limwi angalwala nu kulwala. (1 Timoti 6:9, 10) Ni cicizilepo icakuti, umuntu uwatemwisya impiya angatunkwa ukukanaya na ucisinka. Umonsi wa mano walanzile ukuti: “Umuntu mutailwe alapolelelwa apakalamba. Lelo wiyo akakalauka umukulonka ivyuma yalamupezya.”—Mapinda 28:20.

“Uwaika umwenzo uku mano nu ku kucenjela.”—MAPINDA 3:21.

Masambililo asuma yakatwazwa ukuya antu akutailwa nanti avyazi asuma. Lelo masambililo ya mu nsi sile asi aliwo yangatulenga ukukwata vyonsi vino tukulondekwa nanti ukulenga tuye ni nsansa. Nga tukulonda ukuti twaomba ningo muli vyonsi tulinzile ukusambiliziwa na Leza. Malembo yakalanda ukuti umuntu aakakutika kuli Leza: “Vyonsi vino akacita asiposiwa.”—Masamu 1:1-3.