Ukupanga uyo u kulanda pa vintu vino ukulonda ukacite, asi ukulanda sile ukuti nga cazifile icicitika. Lelo ulinzile ukupekanya, ukuitemelwa ukusenuka, ukuya ningo, alino nu kuombesya pakuti ufikilizye.

Kwaya mauyo yano ungafikilizya umu manda nanti imilungu, mu myezi nanti sile umu mwaka nu kucilapo. Nupya, insita zimwi pa kufikilizya mauyo aapa myaka ulinzile kutandikilapo ukufilikilizya aapa wanda, milungu na pa myezi.

Ukufikilizya mauyo kungalenga ukuti uitaile sana, kungalenga mwauvwana ni vyuza, nu kukwata sana insansa.

Kuitaila: Ndi cakuti wapanga mauyo anono nupya wayafikilizya, ungataila nu kuti na mauyo kwene atale, ungayakwanisya. Nupya ungayuvwa nu kuti intanzi izingakucitikila, ungacimvya, wakwe ukukanakonkelezya auzo.

Vyuza: Antu aingi yakatemwa sana ukuya na antu akafikilizya ukucita vino yalanda, antu akuti yakamanya cino yakulonda nu kuipelesya ukuombesya pakuti yacikwate. Ni cicindame sana icakuti, ucuza ukakoma ndi cakuti mukuombela pamwi ukufikilizya uyo.

Insansa: Ndi wapanga ukucita cimwi wafikilizya nu kufikilizya, kukaya ukuyuvwa uwa nsansa.

“Natemwa ukupanga mauyo. Cikalenga ukuti lyonsi nakwata ivyakucita nupya nalondesya ukuvicita. Alino ndi cakuti wafikilizya uyo umwi, cikauvwika ningo ukulanda ukuti, ‘Iyee, nakwanisya ukucita! Nafikilizya ukucita vino napanzile.’”—Christopher.

CISINTE CA MULI BAIBO: “Ndi cakuti ukulolela ukuti amakumbi yaye ningo, nanti kuti umuza uye ningo, lyene utange ukomele nanti cimwi, nupya utange uzombole nanti cimwi.”—Kasambilizya 11:4.

Ivyeo ivyalondelelapo vingakwazwa ukupanga mauyo nu kuyafikilizya.

Watantika ningo. Watantika nu kukoleezya mauyo yano ukulola ukuti ungafikilizya, wasoolola yano ukulonda kutandikilapo ukucita, alondelelapo, na yauze vivyo kwene.

Watantikila limwi. Cila uyo uno ukulonda ukucita:

• Wapanga uwanda uno ukulonda ukamalilepo.

• Watantika vino ulinzile ukucita pakuti ufikilizye.

• Waelenganyizizya limwi intazi izingayamo, na vino ungazimala.

Waombelapo. Utalolela ukutandika ukuombelapo lino wamala ukuombela pali tonsi sile. Wayuzya ukuti, ‘I cani cino ndinzile ntandikilepo ukucita pakuti ince mfikilizye uyo wane?’ Lyene alino uombelapo. Wasininkizya ukuti ukumala cino watandika nu kulola vino ukuombesya pakuti uce ufikilizye uyo onsi.

CISINTE CA MULI BAIBO: “Amapange ya muntu wino watekela yakamuletela umuzano.”—Mapinda 21:5.