Antu aingi yaomvya sana visinte ivyativilondololwa mu vipande ivifumileko nupya vyayazwa ukuta ukuya na kapatulula mu myenzo yao. Kwene, kulanda sile icisinka, tutanga tumale kapatulula konsi ku maka itu. Uzye cii cikupiliula ukuti kapatulula katalatala kasile?

Mauteeko ya untunze yafilwa ukufumyapo kapatulula. Nomba uzye cii cikasenula ukuti kutaya uteeko ungafumyapo kapatulula?

Pakuti uteeko ufumyepo kapatulula ulinzile kucita ivili apisika

1. 1. Ulinzile ukwazwa antu kusenuka muli vino yakaelenganya na vino yakayuvwa pa yantu yauze.

2. 2. Ulinzile ukwazwa antu kuleka ukucita ivilivyonsi ivikalenga cayatalila ukucitila yauze ivisuma.

3. 3. Ulinzile ukukwata intunguluzi izisuma izitaya na kapatulula

4. 4. Ulinzile kulenga antu amu nko zyonsi ukuya alemane.

Baibo yatwavwa ukusininkizya ukuti Leza wimika uteeko kwene uwo. Ukaamwa ukuti “Wene wakwe Leza.”—Luka 4:43.

Lolini vino uteeko uu ulacita.

“Yonsi yalamanya ulungami vino waya.”—EZAYA 26:9.

“Mu mpanga mulaya ulongo ni cituku, pano umuntu wensi alacita ivilungame.”—EZAYA 32:17.

Uzye vii vikusenula cani? Uteeko wakwe Leza ulasambilizya antu visuma. Ndi cakuti antu yasambilila kupalula visuma ni viipe nupya yasambilila ivyakuya nu mulinganya, vino yakaelenganya pa yantu yauze vikasenuka. Yonsi yalamanya ukuti i cintu icampomvu cino yalinzile ukucita ukutemwa antu a mitundu yonsi.

“Wene alayakumbula minsozi yonsi. Kutalaya imfwa nupya. Kutalaya kulosya nanti kulila, nanti kuvwa kuwaika. Vintu vyampiti vyati vipita.”—UMBWILO 21:4.

Uzye vii vikusenula cani? Uwene wakwe Leza ulafumyapo vyonsi ivikalenga antu yacula pa mulandu nu lufyengo. Kutalaya icintu iciliconsi icilalenga antu alayako apa nsita iyo yaye nu lufyengo.

“Atalaputula umulandu pa mulandu nu kulondelela ukuloleka kwa vintu, nanti ukuuvwilila sile uku matwi. Lelo umololoke wene alaputula imilandu ya antu aulilwa, nga nu kupingwila alanda amu nsi umu ulungami.”—EZAYA 11:3, 4.

Uzye vii vikusenula cani? Yesu Klistu umwene wa Wene Wakwe Leza, alateeka antu pano insi nu mulinganya nupya ukwaula kapatulula. Yesu atalasakamala sile uluko lumwi, lumwi foo nupya antu yonsi mu nsi yalalondela masunde yakwe.

Uwene ukasambilizya antu ivyakusakamalana ‘pa kulanga kutemwa. Pakuti yaye alemane mukwelenganya kwati limwi ukwelenganya kwa muntu wenga.’ —FILIPI 2:2.

Uzye vii vikusenula cani? Antu alateekwa yataloleka sile ukuti alemane lelo yalaya alemene “mukwelenganya kwati ukwelenganya kwa muntu wenga” pano yalaya atemwane sana.