Ukuya na kapatulula umu mwenzo kusisila zuwa. Wakwe vino cikalondekwa insita na maka pakuti tukome kazizi akakaleta ulwale, cikasenda insita nupya umuntu alinzile ukuombesya pakuti ate ukuya na kapatulula. Mungacita uli pakuti mute ukuya na kapatulula?

“Na pa vintu vii vyonsi mulundepo ukutemwa kukakundanya vintu vyonsi pamwi mukulemana kumalilike.” —KOLOSE 3:14.

Uzye icikomo cii cikutusambilizya cani? Kucitilana visuma kukalenga antu kuya alemane. Ndi cakuti mukulanga kutemwa kuli yauze, kapatulula kakaya kakucepa. Nupya ndi cakuti mwasambilila kutemwa sana antu, cilamwazwa kuta kwelenganya iviipe pali aliyo.

Mwaelenganyako pa nzila zimwi zino mungalangilamo kutemwa ukwi iumba lya antu yano mukalola ukuti yatacindama. Inzila izyakucitilamo vivyo zilinzile ukuya izyangupale. Mukezye ukuomvya inzila yonga nanti inzila zimwi izili apisika.

• Ndi cakuti mwakwela nayo motoka iliimwi mwalangizya imiyele isuma ku yantu yayo ukupitila mu kuyayulila icisasa nanti kuyasiila icilimba pakuti ikalepo.

• Mwaezya ukulanzyanya nayo panono nati icakuti mutamanya ningo ululimi luno yakavwanga.

• Mwatekela ndi cakuti yacita vimwi vino mwafilwa ukuvwikisya mulandu uno yacitila vivyo.

• Mwaya na mizu lino yakumulondwelela intazi zyao.