Ilingi kapatulula kakatandika pa mulandu na malyasi yaufi. Lolini vyeo ivili apisika vikulangilila cico:

• Antu yamwi aakalemba auze incito yaponga pa kuzumila ukuti anaci yatanga yaombe imilimo ikome ikalondekwa ukuomvya sana amaka, alino na mano.

• Muli ya 500 C.E. na ya 1500 C.E. ku Ulaya yapeezile Ayuda umulandu wa kwika sumu mu vifula nu kuti ayano yasalanginye indwala. Lino uteeko wa Nazi wateekanga, nupya kwene Ayuda yayabepizye. Lelo umuku uu wene yayabepizye ukuti alenganga ukuti vintu vikome sana imitengo mu Germany. Na vii vyalenzile ukuti antu yafyenga sana Ayuda, alino yamwi yene ya twalilila ukufyenga Ayuda na ndakai kwene.

• Antu aingi yakalanda ukuti wensi uwalemala asiya ni nsansa nupya akasoka zuwa.

Antu ataila mu malyasi wakwe yaa yano yalumbulwa papela yakazana ivyeo ivikatungilila kapatulula kao. Nupya yakaelenganya ukuti wensi akakanya vino yamanya ala umututu.

“Ukucincila ukwaula ukwelenganya kusi kusuma.”—MAPINDA 19:2.

Uzye icikomo cii cikutusambilizya cani? Kukanamanya ivisinka ukungalenga tutaapingula ningo. Ndi cakuti twataila ufi kucila ukutaila ivisinka cingalenga twapingula iviipe pa yantu yauze.

Ndi cakuti twamanya ivisinka pa yantu yauze, cingatwazwa ukukanataila ivyaufi vino yauze yangalanda  pali aliyo. Nupya ndi cakuti twamanya ukuti vino yamwi yalanzile api iumba limwi i vyaufi, tulaezya ukumanya ivisinka pa maumba yauze.

• Mwaiusya ukuti iviipe vino antu yangalanda api iumba limwi ala cisikupiliula ukuti avino antu yonsi aya umwi iumba lilyo yaya.

• Mwaiusya ukuti asi vyonsi vino mungamanya api iumba limwi.

• Mwaezya ukulondelezya ivisinka uku yantu atailwe.