Mulandu Uno Cacindamila Ukumanya Ukuti Kwaya Kaumba
U mulandu ci uno cacindamila ukumanya nga kwaya kaumba? Pano ndi cakuti mwamanya ukuti Leza wa maka yonsi akuno waya, cilalenga ukuti mwalondesya ukuzana usininkizyo ukalangilila ukuti amazwi aya muli Baibo yafuma kuli aliwe. Nupya ndi cakuti mwataila vino Baibo ikalanda, mulaipakizya ivyalondelelapo:
Mulaya ni insansa mu umi
BAIBO IKATI: ‘Leza wamucitiile ivisuma, wamupeezile imvula ni nsita ya kuzombola, alino ni vyakulya ivingi nupya walenzile imyenzo inu ukuya sana ni nsansa.’—Milimo 14:17.
VINO CIKAPILIULA:Vintu vyonsi vino mukaipakizya muno nsi u wila kufuma kuli Kaumba. Mulataizya sana pa vintu vivyo ndi cakuti mwamanya vino uwamupeela ivintu vivyo wa mwikako amano.
Mulazana ukupanda mano ukusuma ukungamwazwa ndakai
BAIBO IKATI: “Umamanyanga ivintu visuma ivilungame ivyampomvu, umamanyanga na vino uli nu kucita.”—Mapinda 2:9.
VINO CIKAPILIULA: Vino Leza aali Kaumba winu, wamanya ivingalenga muye ni nsansa. Ndi cakuti mukubelenga Baibo mulasambilila ivintu vingi ivingamwavwa mu umi winu ndakai.
Mulazana amasuko ku mauzyo yano mwakwata
BAIBO IKATI: ‘Ulazana vino ukumanya Leza kwaya.’—Mapinda 2:5.
VINO CIKAPILIULA: Ndi cakuti mwamanya ukuti Kaumba akuno waya, cilamwavwa ukuzana amasuko ku mauzyo acindamisye wakwe: U mulandu ci uno twayeelako? U mulandu ci uno tukaculila? I vyani ivikacitika uku muntu nga wafwa? Mungazana amasuko muli Baibo.
Mungataila ivilacitika uku nkoleelo
BAIBO IKATI: “‘Pano nimanya vino mpanzile ukucita pali mwemwe, i vyalanda Yeova. Napanga ukumuletela umutende asi uyi foo, nu kumupeela umi usuma uku nkoleelo alino nu upalilo.’”—Yelemiya 29:11, NWT.
VINO CIKAPILIULA: Leza walaya ukuti alafumyapo iviipe vyonsi, kucula ni imfwa kwene. Ndi cakuti mwataila amalayo yaa yano Leza walaya cilamwavwa ukulazizimizya intazi zino mukakwata ndakai.
Limwi Mungatemwa Ukulolako na Vii
ZYUKINI!
Ivingatwavwa Ukuya ni Nsansa—Vyakucita Mu Umi
Kuzana masuko ku mauzyo acindame kungalenga tuye ni nsansa.
