Cipampa icatalimpa kufika ku mamita 8 caya mupipi nu mulyango wi tempele lya mpiti lya mu Eguputo lyako leza wino akaamwa ukuti Amani mu Kanaki. Kulingana na vino asambilila sana yamwi yalanda, cipampa cii cikalangilila vino Falao Syisyaki wacimvizye incende izyayelile ku katutu ka ku Eguputo kumwi ni mpanga ya Yuda alino nu wene wa ku katutu ka Izlaeli.

Cikope cico cikalangilila Amani ale akutuma afungwa 150 kuli Syisyaki nanti Syesyonki. * Mufungwa wenga na wenga akaimilila misumba nanti antu yano yacimviwe. Mazina ya misumba iiyo yalembwa pa mili ya yafungwa. Mazina aingi a misumba iiyo na ndakai kwene yacili yakawelengwa, nupya yamwi nayo yamanyikwa sana pano tukayawelenga muli Baibo. Pa mazina yayo paya na yaa, Beti Syani, Gibyoni, Megido na Syunemu.

Vino musumba wa Yuda wazingulwikwe na asilika vyalumbulwa muli Baibo. (1 Yamwene 14:25, 26) Nupya Baibo ikalanda nu mukulungatika pali vino Syisyaki wacisile pakuti acimvye. Tukawelenga ukuti: ‘Umu mwaka wakwe cisano uwa wene wakwe Leoboamu, Yeova atuma Syisyaki umwene waku Eguputo ku kuzanza umusumba wa Yelusalemu. . . . Syisyaki wakweti amaceleta 1,200. Ivita ivyaomvyanga imfwalasi navyo vyali 60,000. Alino ni vita navyuze ivitangapendwa vino vizile nawe ukufuma ku Eguputo. . . Syisyaki ali pa kupokolola imisumba iya malinga iyali umu mpanga ya Yuda ukufika nu ku Yelusalemu.’—2 Milandu 12:2-4.

Icikope ca kuleenga icikazanwa api tempele ilikaamwa ukuti Kanaki asi ali usininkizyo sile onga uno yazana ukalangilila vino Syisyaki wacimvizye ncende izyali mu Izlaeli. Pa cimpilinsya ci iwe ilyazanyilwe mu musumba wa Megido uwalumbulwa muli Baibo napo kwene palembwa izina lyakuti “Syesyonki.”

Ivyalemba vya cumi ivyaya muli Baibo ivikalanda pali vino Syisyaki wacimvizye impanga ya Yuda vikalangilila ukuti ya kalemba yakwe Baibo yali na ucisinka. Yalanzile icisinka pali vino umutundu wao wazanzilwe nu kucimviwa. Ucisinka wa musango uwo usizanwa umu mabuku yauze aalemvilwe na antu aaliko mpiti.

Cikope ca kulenga ca pi tempele lino yatangi Kanaki; cikulangilila aafungwa aanyepwe