Baibo italesya ukupanga icupo, lelo ikalanda ukuti ukupanga icupo uupe uno Leza wapeela aatwalane. Leza waumvile “umonsi nu mwanaci” nupya waweni ukuti vino waumvile vyali “ivisuma wakwe cimwi.” (Utandiko 1:27, 31) Lino watwalizye umonsi nu mwanaci aakutandikilapo, walanzile ukuti “iyaya umwili onga.” (Utandiko 2:24) Wayapanzile ukuti yaipakizya ukupanga icupo nu kulalondesya ukuya pamwi.

 Pa kulondolola insansa zino yaiya yakakwata umu cupo Baibo yaomvya amazwi aakuti: “Uwazangila muli mama wako uwaku ulumendo wako. Amayele yakwe antutu yamakuzanzyanga pe. Ucisotwe wakwe utalatala ufusuke manda pe, usuma wakwe umalyompelelangako wa kanyama kanone.” (Mapinda 5:18, 19) Leza akalonda na aci kwene yaipakizya ukupanga icupo. Baibo ikalanda ukuti: “Iya alinzile kufikilizya kulonda kwa muci wakwe ukwa ng’anda. Vivyo kwene muci nawe alinzile kufikilizya kulonda kwakwe iya.”—1 Kolinto 7:3, Baibo wakuti Izwi Lyakwe Leza.

Ukukwata umwakupeleela pa kupanga icupo

 Wakwe vino pa Ayebulai 13:4 pakalanda, aatwalane sile ali yano Leza wazumilizya ukupanga icupo, pakati: “Ing’anda ilinzile kucindikwa na antu onsi. Yaiya na Aci yalinzile kutailana. Leza alapingula yao akacita uzelele na yao akacita ulenzyo.” Atwalane yalinzile ukuya acisinka nu kutwalilila ukufikilizya imilapo yao. Ukucila ukwika sile amano kuli vino yakulonda, aatwalane yakaaya sana ni nsansa ndi cakuti yakulondela icisinte ca muli Baibo icikati: “Mukupeela mwaya upolelelo ukulu cuze kuluta mukupokelela!”—Milimo 20:35.