Uzye Ukwiza Kwakwe Klistu Ali Cani?
Vino Baibo yalandapo
Malembelo yalandapo sana pa nsita ya ku nkoleelo lino Klistu aliza umu kupingula antu apano nsi. a Pali Mateo 25:31-33 pakati:
“Lino Mwana wa muntu [Yesu Klistu] aliiza mu lulumbi lwakwe, pamwi na angeli onsi, wene alikala pa cilimba cakwe ca wene. Antu amu nko zyonsi pano nsi yalakongana pa manso yakwe, nga nawe alapalukanya antu ndi vino kacema akapalukanya mfwele ni mbuzi. Aliika mfwele kwi kasa lilunji, nga ni mbuzi nazyo kwi mani.”
Upinguzi uwo ulaya pali vino vilacitika umu “macuzi aipisye ukuluta” atatala yacitikapo ukufuma pano antu yayelileko. Macuzi yayo yalasila kumpela yakwe alamagedoni. (Mateo 24:21; Umbwilo 16:16) Alwani yakwe Yesu alondololwa umu cilangililo ca mbuzi yalapita umu “ulovyo umalilike.” (2 Tesalonika 1:9; Umbwilo 19:11, 15) Nomba aomvi yakwe acisinka, kuli kuti imfwele yene yalaya nu “umi wape.”—Mateo 25:46.
A lilaci lino Klistu aliza?
Yesu watiile: “Kusi nanti wenga wamanya kwiza kwa wanda ulya nanti kasita.” (Mateo 24:36, 42; 25:13) Nomba walanzile pa vintu ivilacitika ivilaya i “cilangililo” icilatungulula uku kwiza kwakwe.—Mateo 24:3, 7-14; Luka 21:10, 11.
Uzye Klistu aliza nu mwili wa mupasi nanti uwa untu?
Yesu watuutulwilwe nu mwili wa mupasi, fwandi lino aliza alaya wa ciumbwa ca mupasi asi wa muntu foo. (1 Kolinto 15:45; 1 Petulo 3:18) Icalenzile na Yesu anene atumwa yakwe pa wanda lino atatala wafwa ukuti: “Pa kasita kanono antu amu nsi yatalandola.”—Yoane 14:19.
Ivya ufi ivyaseka sana pa kwiza kwakwe Klistu
Ufi: Ndi cakuti Baibo yalanda ukuti antu yalalola Yesu “Mwana wa muntu akwiza mu makumbi,” cikapiliula ukuti yalamulola na manso ntontonto.—Mateo 24:30.
Icisinka: Baibo ilingi ikakolanya makumbi uku cintu icimwi icaticifiswa icisikuloleka. (Aina Levi 16:2; Mpendwa 11:25; Malango 33:26) Leza wanenyile Mose ukuti: “Namaiza kunuli mwi kumbi linyome.” (Kufuma 19:9) Mu cumi Mose ataweni Leza. Vivyo kwene avino cilaya na kuli Klistu, ‘akaiza umu makumbi’ mu nzila yakuti antu yakamanya ukuti wataiza nanti i cakuti yasimulola.
Ufi: Amazwi yakuti “manso yonsi yalamulola” aya pa Umbwilo 1:7 pakulanda pa kwiza kwakwe Klistu, yalinzile ukumanyikwa ukuti mu cumi vilacitika vivyo kwene.
Icisinka: Amazwi ya Cigiliki amuli Baibo akaomviwa pa “manso” nanti “ukulola” insita zimwi yakapiliula ukwiluka ukucila pa kulola kwa cumi cumi. b (Mateo 13:15; Luka 19:42; Loma 15:21; Efeso 1:18) Baibo ikati Yesu wino watuutulwilwe “Aliwe wenga sile asyafwa. Wene akaikala mu luswepo luno kusi nanti umwi angapalamako . . . Kusi nanti umwi angamulola.” (1 Timoti 6:16) Fwandi “amanso yonsi yalamulola” mu nzila yakuti antu yaliluka ukuti Yesu aliwe akuleta upinguzi wakwe Leza.—Mateo 24:30.
Ufi: Amazwi aya pali 2 Yoane icikomo 7 yakalangilila ukuti Yesu aliza nu mwili wa untu.
Icisinka: Pa cikomo cii pakati: “Asomvi aingi yasalangana konsi mu nsi. Yene yasyazumila ukuti Yesu Klistu wizile avyalwa wa muntu.”—2 Yoane 7.
Umu manda ya mutumwa Yoane, yamwi yakanyile Yesu ukuti wizile pano nsi nu kwizaya umuntunze. Antu yaa yamanyikwe ukuti aasangu. Ilembelo lyakwe 2 Yoane 7 lyalembiilwe pa kukanya vino yazumilemo.
Limwi Mungatemwa Ukulolako na Vii
MASUKO KU MAUZYO AMULI BAIBO
Uzye Inkondo ya Amagedoni Ali Cani?
Izwi lyakuti Amagedoni likazanwa sile umuku onga muli Baibo, nomba ulwi uno ikalandapo walandwapo umu Malembo aingi.