Uluyembu icicitwa icili consi, ukuyuvwa nanti imyelenganyizizye ikapusana na vino Leza akalonda twacita. Mwaya nu kutama masunde yakwe Leza lino umwi wacita iviipe, nanti visi vyololoke ku manso yakwe Leza. (1 Yoane 3:4; 5:17) Baibo ikalanda nu kuti ndi cakuti umuntu wacita iciipe uku mufulo sile ala wayembuka.—Yakobo 4:17.

 Mu lulimi luno Baibo yalembilwemo, amazwi akaomviwa pa luyembu yakapiliula “ukupusa umupilwa” nanti icikongwani. Asilika aina Izlaeli aliko mpiti yamanyikisye sana ivya kusumba amawe icakuti “yatapusanga.” Amazwi yayo ngu kuyasenula ukulinga na vino yali tungati “yatayembukanga.” (Yakapingula 20:16) Fwandi ukuyembuka ukupusa umupilwa wa masunde yakwe Leza amalilike yano akalonda twalondela.

 Pa mulandu wakuti Leza Akaumba witu wakwata insambu zya kutupeela masunde. (Umbwilo 4:11) Tulalondolola kuli aliwe pali vino tukacita.—Loma 14:12.

Uzye cingacitika ukukanacita uluyembu nanti panono?

 Awe. Baibo ikati “Pano antu yonsi iifya, nupya yali kutali na Leza wino akatuula.” (Loma 3:23; 1 Yamwene 8:46; Kasambilizya 7:20; 1 Yoane 1:8) U mulandu ci uno cayela vivyo?

 Antu akutandikilako Adamu na Eva yataali ayembu pa kutandika. Nupya cali vivyo pa mulandu wakuti yaumvilwe amalilike, umu cata cakwe Leza. (Utandiko 1:27) Nomba yaponzizye isyuko lya kuya amalilike pano yatuvwilile Leza. (Utandiko 3:5, 6, 17-19) Lino yakweti ana, nayo yapyanyile uluyembu lulo nu kukanamalilika. (Loma 5:12) Wakwe vino Umwene Davidi uwa mu Izlaeli walanzile ukuti, “Navyalilwe umu luyembu.”—Masamu 51:5.

Uzye amaifyo yamwi iipisya ukuluta yauze?

 Ee. Baibo ikati antu ampiti amu Sodoma yali “ankota, aifyanga Yeova wakwe cimwi” yano maifyo yao yali “ipisye.” (Utandiko 13:13; 18:20) Uvwini ivintu vitatu ivikalangilila vino uluyembu lwatilukulisya nanti lwatilufina.

1.   Ciipisye. Baibo ikatucelula ukutaluka uku maifyo ya musango uu wakwe uzelele, kupepa utuluwi, ukwiya, ukukoleka, ukupoka ivyuma vya yauze uku ucenjezi, ukukoma, nanti kutaila imipasi. (1 Kolinto 6:9-11; Umbwilo 21:8) Baibo ikapusanya maifyo yaa kuli yaya yano tukacita ukwaula ukumanya nanti ukulanda ukwaula ukwelenganyapo angasosya yauze. (Mapinda 12:18; Efeso 4:31, 32) Nomba, Baibo ikatukomelezya ukutaluka uku maifyo yonsi, pano yakalenga tutame masunde yakwe Leza.—Mateo 5:27, 28.

2.   Icaticilenga. Amaifyo yamwi yakacitwa pa mulandu wakukanamanya vino Leza akalonda. (Milimo 17:30; 1 Timoti 1:13) Nanti i cakuti Baibo isizumilizya maifyo ya musango uwo, ikapusanya maifyo yayo kuli yaya akacitwa uku mufulo sile. (Mpendwa 15:30, 31) Uluyembu lwa ku mufulo lukafuma mu ‘mwenzo uwipe.’—Yelemiya 16:12.

3.   Imiku. Baibo nupya ikapusanya maifyo akacitwa lyonga ukumaifyo akacitwa pa nsita iitali. (1 Yoane 3:4-8) Yayo ‘akaifya uku mufulo’ na pa cisila ca kumanya ivya kucita ivisuma yakapingulwa kuli Leza.—Ayebulai 10:26, 27.

 Yayo akacita maifyo akulu yangauvwa sana uyi pa mulandu nu ukulu wakwe vino yatiyaluvyanya. Umwene Davidi walemvile ukuti: “Uyi wane watiunduta, watiuntuwizya mwi ziya lya maifyo yane. Vyantivintotomezya pansi pa mulandu wakunyoma kwaviko.” (Masamu 38:4) Nomba Baibo ikapeela upalilo wakuti: “Umwipe ate imisango yakwe, ni ntalanganyi nayo amapange yakweyo. Kayale sile yasenukile kuli Yeova, ukuti ayelele uluse, kuti Leza witu nawe alayelela cuze.”—Ezaya 55:7.