Swe ya Nte Yakwe Yeova tusizevya manda ya kuvyalwa pano twamanya ukuti ukuzevya kwa musango uu kusizanzya Leza. Nanti cakuti Baibo italanda umu kulungatika ukuti tutalinzile ukuzevya manda ya kuvyalwa, ikatwazwa ukumanya vino vikacitika pa kuzevya kwene kuu alino na vino Yeova akalola ivintu vivyo. Lolini ivintu 4 ivikacitika alino na vino ivisinte vya muli Baibo vikalandapo.

1.   Ukuzevya kuu kwafuma uku mipepele ya ufi. Kulingana ni buku limwi (Funk & Wagnalls Standard Dictionary of Folklore, Mythology, and Legend) ukuzevya kuu kwizile ikuyako pa mulandu ni cizumilo cakuti pa wanda uno umuntu waviilwe, “imipasi iipe ingazanza umuntu wiyo nanti vintu vyuze iviipe vingamucitikila” nomba “ndi cakuti ya cuza ya muntu wiyo yazanwako ukukuzevya nu kumupaala angacingililwa.” Ibuku limwi (The Lore of Birthdays) lyalanda ukuti uwanda wa kuvyalwa alino ni vintu vyuze ivyacitike pa wanda uno umuntu wavilwe, vyali ali vintu “ivicindame vino aakasapola ukuomvya intanda yaviomvyanga pa kusaapola.” Ibuku lii lyalanda nu kuti “kulingana ni vizumilo vya mpiti, ma kendo yano yakaasya pa kuzevya uwanda wa kuvyalwa yalemenkana ni mipasi ikalenga ivintu vyazipila umuntu.”

    Nomba Baibo yakanya ukucita ivyamalele, kuvwana ni mipasi nanti ukucita ivintu vyuze ivya “musango uu.” (Malango 18:14; Galatiya 5:19-21) Pa vintu ivyalenzile Leza akane umusumba uwa Babiloni pali nu kusaapola ukuomvya intanda, nupya inzila kwene ii yaiomvyanga na pa kusowela ivili nu kucitika. (Ezaya 47:11-15) Swe ya Nte Yakwe Yeova tutika sana mano kuli vino intambi zyonsi zyatandike, lelo ndi cakuti Baibo yalanda pali vimwi tusisulako sile.

2.   Aina Klistu ya kutandikilako yatazevyanga manda ya kuvyalwa. Ibuku limwi (The World Book Encyclopedia) lyalanda ukuti “yalolanga ukuti ukuzevya uwanda wa kuvyalwa kwafumile uku mipepele ya ufi.” Nupya Baibo ikalangilila ukuti Aina Klistu yonsi yalinzile ukulacita vino asambi alino na yauze asambiliziwanga na Yesu umu kulungatika yacitanga.—2 Tesalonika 3:6.

3.   Aina Klistu yatalinzile ukuzevya ukuvyalwa kwakwe Yesu lelo yalinzile ukulaiusya sile imfwa yakwe. (Luka 22:17-20) Nupya cii citange cituzungusye pano Baibo ikati “Uwanda wa mfwa itu ukazipa ukuluta uwanda uno twavilwepo.” (Kasambilizya 7:1) Lino insita yakwe Yesu iyakuya pano nsi yasilanga, ale wapanga izina ilisuma na Leza, cii calenzile ukuti uwanda wakwe uwakufwa uye ucindame ukucila uwa kuvyalwa.—Aebele 1:4.

4.   Baibo italandapo pa muomvi umwi wakwe Leza uwazevizye uwanda wa kuvyalwa. Lelo yalanda pa kuzevya kwa yantu yaili aataombelanga Leza. Nomba ivyacitike pa kuzevya ku koili vitazifile.—Utandiko 40:20-22; Mako 6:21-29.

 Wakwe vino avyazi yonsi aya ningo yakacita, ya Nte yakalanga ukutemwa uku yana yao umwaka onsi, nu kuyapela ivya upe nupya yakakwata ni nsita izisuma izya kwizizya pamwi. Yakaezya ukukolanya Leza aakapeela ivisuma uku yana yakwe pa nsita ili yonsi. (Mateo 7:11) Vino yamwi yalanda vikulangilila ukuti yamwana ya Nte yasiuvwa uyi pa mulandu wakuti yasisevya manda ya kuvyalwa:

•   “Cikauvwika ningo sana ukupokelela ica upe lino usikwenekela.”—Tammy, uwa myaka 12.

•   “Nanti cakuti yasimpeela ivya upe pa wanda uno naviilwe, avyazi yane yakampela ivya upe pa manda yauze. Nkauvwa ningo pano ala ntalinkwenekela ukuti yamampeela.”—Gregory, uwa myaka 11.

•   “Uzye mukwelenganya ukuti ukwizizya pamwi pa mamineti 10, kulya utumakeke tunono alino nu kulizya ulwimbo ali kuzevya? Muce mwize ukumwitu pakuti muce mulole vino ukuzevya kwa cumi kukaya!”—Eric, ali ni myaka 6.