1 Jon 2:1-29
2 Ajri ro nejũ, ij jejewaj ñan kom̦ men kein bwe kom̦win jab jerawiwi. Ijoke el̦aññe jabdewõt ej jerawiwi, ewõr juon ad rijjipañ* ej pãd ippãn Jemãdwõj ilañ, im rijjipañ in ej Jesus Christ, eo ej juon ri-wãnõk.
2 Im e ej juon menin katok kõn jerawiwi ko ad bwe jen maroñ aenõm̦m̦an ippãn Anij, ijoke ejjab ñan jerawiwi ko ad wõt ak bareinwõt jerawiwi ko an aolepen lal̦ in.
3 Im el̦aññe jej wõnm̦aanl̦o̦k wõt im pokake kien ko an, men in ej kam̦ool bwe jejel̦ã kõn e.
4 Juon eo ej ba, “Ijel̦ã kõn e,” ijoke ejjab pokake kien ko an, armej in ej juon ri-riab, im m̦ool ejjab pãd ilo e.
5 Bõtab jabdewõt eo ej pokake naan eo an, innem ealikkar bwe eweeppãn yokwe eo an armej in ñan Anij. Ñe jej kõm̦m̦ane men in, jej kaalikkar bwe jej juon wõt ippãn.
6 Juon eo ej ba bwe ej juon wõt ippãn, ej aikuj wõnm̦aanl̦o̦k wõt im etetal ilo ejja wãween eo wõt Jesus ear etetal.
7 Ro rejitõnbõro, ij jejewaj ñan kom̦ kõn kien eo m̦okta im ear pãd ippemi jãn jinoin, im ejjab kõn juon kien kããl. Kien in m̦okta ej naan eo kom̦ar roñ.
8 Ijoke ij bar jejewaj ñan kom̦ kõn juon kien ekããl, im eñin ej kien eo ear kũrm̦ool ilo e im bareinwõt ilo kom̦, im kiiõ ejakol̦o̦k marok eo, im meram eo em̦ool em̦õj an jino romaak.
9 Eo ej ba bwe ej pãd ilo meram, ijoke ej dike jein ak jatin, armej in ej pãdwõt ilo marok.
10 Eo ej yokwe jein ak jatin, ej pãdwõt ilo meram, im ejjel̦o̦k menin l̦õkatip ippãn armej in.*
11 Bõtab eo ej dike jein ak jatin, ej pãd ilo marok im ej etetal ilo marok, im ejaje ijo ej ilo̦k iel̦o̦k kõnke em̦õj an marok eo kõm̦m̦an an pilo.
12 Kom̦ ajri ran̦, ij jejewaj ñan kom̦ kõnke em̦õj jeorl̦o̦k jerawiwi ko ami kõn wõt etan.
13 Kom̦ em̦m̦aan ran̦ rerũtto, ij jejewaj ñan kom̦ kõnke em̦õj ami kiiõ jel̦ã kõn eo ear pãd jãn jinoin. Kom̦ likao ran̦, ij jejewaj ñan kom̦ kõnke kom̦ar anjo̦ ioon ri-nana eo. Ij jejewaj ñan kom̦ ajri ran̦, kõnke kiiõ kom̦ jel̦ã kõn Jemãdwõj ilañ.
14 Ij jejewaj ñan kom̦ em̦m̦aan ran̦ rerũtto, kõnke em̦õj ami kiiõ jel̦ã kõn eo ear pãd jãn jinoin. Ij jejewaj ñan kom̦ likao ran̦, kõnke kom̦ kajoor im kom̦ij tõmak naanin Anij im kom̦ar anjo̦ ioon ri-nana eo.
15 Kom̦win jab yokwe lal̦ ak men ko ilo lal̦ in. El̦aññe jabdewõt ej yokwe lal̦, innem yokwe Jemãdwõj ilañ ejjab pãd ilo e;
16 kõnke men otemjej ilo lal̦ in—m̦õm̦ ko an kanniõk, m̦õm̦ ko an mãj, im menin kõmjãje ko an armej*—rejjab itok jãn Jemãdwõj ilañ ak rej itok jãn lal̦.
17 Bareinwõt, lal̦ in ej etal ñan an jako im m̦õm̦ ko an, bõtab eo ej kõm̦anm̦an ankilaan Anij enaaj pãdwõt ñan indeeo.
18 Ajri ran̦, eñin ej iien* eo ãliktata. Kom̦ar roñ bwe ri-jum̦ae Christ ej itok, im kiiõ elõñ ri-jum̦ae Christ. Eñin unin jejel̦ã bwe ej iien* eo ãliktata.
19 Rein rar ilo̦k jãn kõj, kõnke ilo m̦ool rar jab lukkuun ro uwaad, el̦aññe rar innem renaaj kar pãdwõt ippãd. Bõtab, rar ilo̦k kõnke en maroñ alikkar bwe ejjab aolep rej lukkuun ro uwaad.
20 Ak kõn kom̦, em̦õj an eo eokkwõjarjar kapit* kom̦, im kom̦ aolep ewõr jel̦ãl̦o̦kjen̦ ippemi.
21 Ij jejewaj ñan kom̦, ejjab kõnke kom̦ jaje kõn m̦ool eo, bõtab kõnke kom̦ jel̦ã kake, im kõnke ejjel̦o̦k riab ej itok jãn m̦ool eo.
22 Wõn eo ej ri-riab, ejjab ke eo ej riab im ba bwe Jesus ejjab Christ? Eñin ej ri-jum̦ae Christ, eo ej kõjekdo̦o̦n Jemãdwõj ilañ im Nejin.
23 Aolep ro rej kõjekdo̦o̦n Nejin, Jemãdwõj ilañ ejjab buñbũruon ippãer. Bõtab jabdewõt eo ej kile Nejin, Jemãdwõj ilañ ej buñbũruon ippãn.
24 Ak kõn kom̦, kom̦win l̦oori wõt men ko kom̦ar roñ jãn jinoin. El̦aññe kom̦ij l̦oori wõt men kein kom̦ar roñ jãn jinoin, kom̦ naaj bareinwõt pãdwõt ilo ami juon wõt ippãn Nejin im ippãn Jemãdwõj ilañ.
25 Bareinwõt, men eo e make ear kallim̦ur kake ñan kõj ej eñin—mour indeeo.
26 Ij jejewaj ñan kom̦ men kein kõn ro rej kajjioñ in kõjebwãbweik kom̦.
27 Ak kõn kom̦, em̦õj an kar kapit* kom̦ ikijjeen jetõb kwõjarjar* eo an, im jetõb kwõjarjar* in an ej pãdwõt ilo kom̦, eñin unin kom̦ij jab aikuji an jabdewõt katakin kom̦; ijoke an kar kapit* kom̦ ej juon men em̦ool im ejjab juon men eriab, im ej katakin kom̦ kõn men otemjej. Innem ãinwõt an kar katakin kom̦, kom̦win pãdwõt ilo ami juon wõt ippãn.
28 Innem kiiõ, ajri ran̦, kom̦win pãdwõt ilo ami juon wõt ippãn kõnke ilo iien eo naaj kõm̦m̦an bwe en wal̦o̦k, en wõr ippemi maroñ ñan kõnono ilo peran, im bwe kom̦win jab jenliklik jãne kõn ami jook ñe enaaj pãd.
29 El̦aññe kom̦ jel̦ã bwe ewãnõk, innem kom̦ jel̦ã bareinwõt bwe aolep ro rej kõm̦m̦ani men ko rewãnõk rej ro nejin.*
Footnotes
^ Ak “ri-jojomar.”
^ Ak emaroñ, “ejjab kal̦õkatip ro jet.”
^ Ak “an armej kabbil kõn men ko m̦weieer.”
^ Kajin Grik, “awa.”
^ Kajin Grik, “awa.”
^ Ak “kããlõt.”
^ Ak “kããlõt.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kããlõt.”
^ Kajin Grik, “rar l̦otaktok jãne.”
