1 Jon 4:1-21
4 Ro rejitõnbõro, kom̦win jab tõmak aolep ennaan ko* im rej ãinwõt ñe rej jãn Anij, bõtab kom̦win lale el̦aññe ennaan kein* rej lukkuun jãn Anij, kõnke em̦õj an wal̦o̦k elõñ ri-kanaan riab ilo lal̦ in.
2 Eñin wãween eo kom̦ naaj jel̦ã ñe juon ennaan ej jãn Anij: Aolep ennaan ko rej kwal̦o̦k bwe Jesus Christ ear itok ñan lal̦ in ilo kanniõk, rej jãn Anij.
3 Bõtab jabdewõt ennaan eo ejjab kwal̦o̦k kõn Jesus, ejjab jãn Anij. Ilo m̦ool, eñin ej ennaan eo an eo ej ri-jum̦ae Christ, im kom̦ar roñ bwe enaaj itok, im em̦õj an kadede wal̦o̦k ilo lal̦ in.
4 Ajri ran̦, kom̦ij jãn Anij im em̦õj ami anjo̦ ioon ri-kanaan ro reriab, kõnke eo ej juon wõt ippemi ekajoorl̦o̦k jãn eo ej juon wõt ippãn lal̦ in.
5 Rein rej jãn lal̦ in, eñin unin rej kõnono men ko rej jãn lal̦ in im lal̦ in ej roñjake er.
6 Ijoke jej jãn Anij. Innem, jabdewõt eo ej katak im jel̦ã kõn Anij, ej roñjake kõj. Bõtab, jabdewõt eo ejjab jãn Anij, ejjab roñjake kõj. Eñin ej wãween ad maroñ kile oktak eo ikõtaan ennaan eo em̦ool im ennaan eo eriab.
7 Ro rejitõnbõro, jen wõnm̦aanl̦o̦k wõt im yokwe doon kõnke yokwe ej jãn Anij, im aolep ro rej kwal̦o̦k yokwe, rej nejin Anij* im rejel̦ã kõn Anij.
8 Jabdewõt eo ejjab kwal̦o̦k yokwe, ejjab jel̦ã kõn Anij, kõnke Anij yokwe.
9 Yokwe eo an Anij ñan kõj ear alikkar ilo men in, eñin bwe Anij ear jilkintok Nejin eo ej make wõt ñan lal̦ in bwe jen maroñ bõk mour kõn e.
10 Anij ear kwal̦o̦k yokwe in, ejjab kõnke jaar yokwe e, bõtab kõnke ear yokwe kõj, im ear jilkintok Nejin ãinwõt juon menin katok kõn jerawiwi ko ad bwe jen maroñ aenõm̦m̦an ippãn.
11 Ro rejitõnbõro, el̦aññe eñin wãween an kar Anij yokwe kõj, innem ej menin aikuj bwe jen bareinwõt yokwe doon.
12 Ejjel̦o̦k juon ear lo Anij jabdewõt iien. El̦aññe jej wõnm̦aanl̦o̦k wõt im yokwe doon, Anij ej pãdwõt ilo kõj im yokwe eo an ej weeppãn ilo kõj.
13 Jejel̦ã bwe jej pãdwõt ilo ad juon wõt ippãn im bwe ej juon wõt ippãd ikijjeen men in, kõnke ear letok jetõb kwõjarjar* eo an ñan kõj.
14 Ejjab men in wõt ak kõmar lo im kam̦ool bwe Jemãdwõj ilañ ear jilkintok Nejin bwe en juon ri-lo̦mo̦o̦r ñan lal̦ in.
15 Jabdewõt eo ej kwal̦o̦k bwe Jesus ej Nejin Anij, eokwe Anij ej juon wõt ippãn armej in, im armej in ej juon wõt ippãn Anij.
16 Im em̦õj ad kiiõ jel̦ã im tõmak yokwe eo an Anij ñan kõj.
Anij yokwe, im eo ej kwal̦o̦k yokwe aolep iien, ej juon wõt ippãn Anij im Anij ej juon wõt ippãn.
17 Ilo wãween in, yokwe ej weeppãn ilo kõj bwe jen maroñ kõnono ilo peran ilo naaj raanin ekajet eo, kõnke ãinwõt Christ, ãindein bareinwõt kõj ilo lal̦ in.
18 Ejjel̦o̦k mijak ilo yokwe, bwe yokwe eo eweeppãn ej jol̦o̦k mijak kõnke mijak ej bõbraik kõj. Ilo m̦ool, yokwe eo an armej eo ej mijak ejjab weeppãn.
19 Jej yokwe, kõnke e eo m̦okta ear yokwe kõj.
20 El̦aññe jabdewõt ej ba, “Ij yokwe Anij,” ak ej dike jein ak jatin, armej in ej juon ri-riab. Bwe armej eo ejjab yokwe jein ak jatin, eo ej loe, ejjab maroñ yokwe Anij, eo im ejjañin loe.
21 Im epãd ippãd kien in jãne, eñin bwe jabdewõt eo ej yokwe Anij, ej aikuj bareinwõt yokwe jein ak jatin.
Footnotes
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Kajin Grik, “rar l̦otaktok jãn Anij.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
