1 Jon 5:1-21
5 Jabdewõt eo ej tõmak bwe Jesus ej Christ, armej in ej nejin Anij.* Im jabdewõt eo ej yokwe Eo ear letok mour, ej bareinwõt yokwe ro rej nejin.*
2 Jejel̦ã bwe jej yokwe ro nejin Anij el̦aññe jej yokwe Anij im pokake kien ko an.
3 Bwe eñin mel̦el̦ein yokwe Anij, bwe jen pokake kien ko an, im kien ko an rejjab eddo,
4 kõnke aolep ro* rej nejin Anij,* rej anjo̦ ioon lal̦. Im men eo ear kõm̦m̦an ad bõk anjo̦ ioon lal̦, ej tõmak eo ad.
5 Wõn eo emaroñ anjo̦ ioon lal̦? Ejjab ke eo ej tõmak bwe Jesus ej Nejin Anij?
6 Eo ear itok ikijjeen dãn im bõtõktõk ej Jesus Christ, aet ejjab kõn dãn wõt, ak ear itok kõn dãn im kõn bõtõktõk jim̦or. Im jetõb kwõjarjar* ej kam̦oole men in, kõnke jetõb kwõjarjar* ej kwal̦o̦k men ko rem̦ool.*
7 Bwe ewõr jilu ri-kam̦ool:
8 jetõb kwõjarjar,* dãn, im bõtõktõk; im men kein jilu rej kwal̦o̦k kõn juon wõt men.
9 Jej tõmak men ko armej rej kam̦ooli, bõtab men eo Anij ej kam̦oole el̦apl̦o̦k, kõnke men eo Anij ej kam̦ool im kwal̦o̦k kake ej kõn Nejin.
10 Armej eo ej likũt an tõmak ilo Nejin Anij, ej tõmak ilo men eo kar kwal̦o̦k ñane. Ak armej eo ejjel̦o̦k an tõmak ilo Anij, ej likũt Anij juon ri-riab kõn an jab likũt an tõmak ilo men ko Anij ear kam̦ool im kwal̦o̦k kaki kõn Nejin.
11 Im men eo in Anij ej kwal̦o̦k kake, eñin bwe ear letok ñan kõj mour indeeo, im jej bõk mour in ikijjeen Nejin.
12 Juon eo ej tõmak ilo Nejin, ewõr ippãn mour in; juon eo ejjab tõmak ilo Nejin Anij, ejjel̦o̦k mour in ippãn.
13 Ij jejewaj ñan kom̦ men kein bwe kom̦win maroñ jel̦ã bwe ewõr mour indeeo ippemi, kom̦ eo kom̦ij likũt ami tõmak ilo etan Nejin Anij.
14 Im men eo in jej lõke e kake,* bwe jabdewõt men eo jej kajjitõk kake im ej ekkar ñan ankilaan, ej roñjake kõj.
15 Im el̦aññe jejel̦ã bwe ej roñjake kõj kõn jabdewõt men jej kajjitõk kake, eokwe jejel̦ã bwe naaj litok men ko jej kajjitõk kaki, kõnke jaar kajjitõk ippãn.
16 El̦aññe jabdewõt ej lo an jein ak jatin kõm̦m̦ane juon jerawiwi ejjab tõll̦o̦k ñan mej, innem ej aikuj jar kõn armej in im Anij enaaj lel̦o̦k mour ñane, aet, ñan ro rejjab kõm̦m̦ane jerawiwi eo ej tõll̦o̦k ñan mej. Bõtab, ewõr juon jerawiwi ej tõll̦o̦k ñan mej, im eñin ej jerawiwi eo ijjab kajjitõk bwe jabdewõt en jar kake.
17 Men otemjej rejjab wãnõk rej jerawiwi, ijoke ewõr juon jerawiwi ejjab tõll̦o̦k ñan mej.
18 Jejel̦ã bwe jabdewõt eo ej nejin Anij* ejjab wõnm̦aanl̦o̦k ilo jerawiwi, im eo* ear l̦otaktok jãn Anij ej kõjparok armej in, im ri-nana eo ejjab maroñ kõm̦m̦an jabdewõt ñane.
19 Jejel̦ã bwe jej jãn Anij, ak aolepen lal̦ in ej pãd ium̦win pein ri-nana eo.
20 Bõtab jejel̦ã bwe Nejin Anij ear itok, im ear letok ñan kõj lol̦o̦kjen̦* bwe jen maroñ jel̦ã kõn eo em̦ool. Im ikijjeen Jesus Christ, eo ej Nejin, jej juon wõt ippãn eo em̦ool. Eñin ej Anij eo em̦ool im mour indeeo.
21 Ajri ran̦, kom̦win kõjparok kom̦ jãn ekjab.
Footnotes
^ Kajin Grik, “ear l̦otaktok jãn Anij.”
^ Kajin Grik, “rar l̦otaktok jãne.”
^ Kajin Grik, “aolep men.”
^ Kajin Grik, “rar l̦otaktok jãn Anij.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Kajin Grik, “ej m̦ool eo.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “Jemaroñ kõnono ñane ilo ad jab mijak.”
^ Kajin Grik, “l̦otaktok jãn Anij.”
^ Mel̦el̦ein, Jesus Christ, eo ej Nejin Anij.
^ Kajin Grik, “maroñ eo ñan kõjerbal l̦ol̦ãtãt.”
