1 Korint 4:1-21
4 Armej rej aikuj watõk kõj bwe jej ri-jerbal* an Christ im ri-karejar ro rej bõk eddon men ko rettino im rekkwõjarjar an Anij.
2 Kõn men in, juon eo ej ri-karejar, ej aikuj tiljek.
3 Ñan ña, ijjab watõk ñe kom̦ij ekajete eõ ak ñe im̦õn ekajet ko an armej rej ekajete eõ. Ilo m̦ool, ijjab ekajete eõ make.
4 Erreo bõklõkõt e aõ, bõtab ejjab mel̦el̦ein bwe iwãnõk, kõnke Jeova* eo ej ekajete eõ.
5 Kõn men in, kom̦win jab ekajete jabdewõt m̦ae iien enaaj jejjet iien eo, ak kom̦win kõttar ñan iien eo Irooj enaaj itok. Enaaj kwal̦o̦k men ko rettino an marok bwe ren pãd ilo meram, im enaaj kwal̦o̦k men ko rej pãd ilo bũruon armej, innem kajjojo armej enaaj bõk nõbar jãn Anij.
6 Innem ro jeiũ im jatũ, ij kwal̦o̦k men kein kõn kõm̦ro Apollõs bwe kom̦win bõk tokjãn im jel̦ã men in: “Jab el̦l̦ãl̦o̦k jãn men ko em̦õj jei,” kõnke kom̦win jab oktak im utiej bũruomi ilo ami kautiej jet armej jãn ro jet.
7 Ta eo ej kõm̦m̦an am̦ kautiej eok jãn ro jet? Im ta eo ewõr ippam̦ im kar jab lewaj ñan kwe? Im el̦aññe kar lewaj juon men ñan kwe, etke kwõj kõmjãje im ãinwõt ñe ejjab menin lewaj?
8 Eju ke bũruomi? Kom̦ m̦weiie kiiõ ke? Em̦õj ami jino tõl ãinwõt kiiñ ke, meñe kõmij jañin? Ilo m̦ool, ilukkuun kõn̦aan bwe kom̦win kar jino tõl ãinwõt kiiñ, kõnke kõmin maroñ bar tõl ippemi ãinwõt kiiñ.
9 Ij l̦õmn̦ak bwe Anij ear likũt kõj rijjilõk ro bwe jen pãd ãliktata ãinwõt ro em̦õj liaakel̦o̦k er ñan mej bwe aolep ren loe, kõnke jej menin kaloojoj ñan lal̦ in, ñan enjel̦ ro, im ñan aolep armej.
10 Rej watõk kõm ri-bwebwe kõn wõt am l̦oor Christ, bõtab kom̦ kom̦ij mãlõtlõt kõn wõt Christ. Kõm m̦õjn̦o̦, bõtab kom̦ kajoor, kom̦ij bõk nõbar, bõtab kõmij jab bõk nõbar.
11 Ñan kiiõ ejjañin jako am kwõle im maro, im an nana ballim,* im aer m̦an* kõm im an ejjel̦o̦k jikin am jokwe,
12 im am kate kõm kõm̦m̦ani jerbal ko reppen kõn peim. Ñe rej kajjirere kõn kõm, kõmij ukotl̦o̦k ilo jouj, im ñe rej kaeñtaan kõm, kõmij kate kõm ñan kijenmej wõt.
13 Ñe rej ruruwe kõm, kõmij uwaake er ilo jouj.* Kõmij ãinwõt meno̦kno̦k ñan lal̦ in, im ñan kiiõ, kõmij ãinwõt kwõpej ko.
14 Ejjab unin aõ jejewaj kõn men kein ej bwe in kajook kom̦, bõtab ej bwe in kauwe kom̦ ãinwõt ro nejũ rejitõnbõro ippa.
15 Kõnke meñe emaroñ wõr 10,000 ri-lale* kom̦ ilo Christ, ak ejjab kanooj in lõñ ro jememi. Bõtab iar oktak im jememi ilo Christ Jesus ilo aõ katakin kom̦ ennaan eo em̦m̦an.
16 Kõn men in, ij rõjañ kom̦ bwe kom̦win anõke ña.
17 Eñin unin ij jilkinwaj Timote ñan ippemi kõnke ej ãinwõt juon nejũ ejitõnbõro ippa im etiljek ilo jerbal eo an Irooj. Enaaj kakeememej kom̦ kõn wãween ko* ij kõjerbali ilo aõ jerbal ñan Christ Jesus, ãinwõt aõ katakin eklejia ko ijoko otemjej.
18 Jet iaami rej kautiej bũrueer im ãinwõt ñe iban iwõj ñan ippemi.
19 Bõtab ejjabto jãn kiiõ, el̦aññe ej ankilaan Jeova,* innem inaaj iwõj ñan ippemi. Ijoke ejjab bwe in itõn lale ta kan̦e armej ran̦e eutiej bũrueer rej kõnnaan kaki, ak ej bwe in lale el̦aññe kajoor eo an Anij ej pãd ippãer.
20 Bwe Aelõñ eo an Anij* ejjab pedped ioon naan, bõtab ej pedped ioon kajoor eo an Anij.
21 Ewi wõt in kom̦ kõn̦aan? Kom̦ kõn̦aan bwe in iwõj kõn yokwe im jitũbõn ineem̦m̦an ke ak kõn al̦al̦?
Footnotes
^ Ak “ri-karejar.”
^ Lale “Jeova” ilo Kõmel̦el̦e Ko.
^ Kajin Grik, “keelwaan.”
^ Ak “baiti.”
^ Kajin Grik, “akwel̦ap ñan er.”
^ Ak “ri-katakin.”
^ Kajin Grik, “ial̦ ko aõ.”
^ Lale “Jeova” ilo Kõmel̦el̦e Ko.
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
