1 Timote 2:1-15
2 Kõn men in, m̦oktata, ij rõjañ aolep bwe ren akwel̦ap, jar, kajjitõk kõn ro jet, im kwal̦o̦k kam̦m̦oolol ñan Anij kõn jabdewõt armej,
2 im kõn irooj ro im aolep ro reutiej,* kõnke jen maroñ mour ilo aenõm̦m̦an im jokwane ilo ad kanooj tiljek ñan Anij im ilo ad lukkuun kate kõj ilo men otemjej.
3 Men in em̦m̦an im ekkar im̦aan mejãn Anij, eo ej ad ri-Lo̦mo̦o̦r,
4 im ej ankilaan bwe jabdewõt armej en bõk lo̦mo̦o̦r im bwe ren bõk jel̦ãl̦o̦kjen̦ eo ejim̦we kõn m̦ool eo.
5 Ewõr juon wõt Anij im ewõr juon wõt ri-kõllaajrak ikõtaan Anij kab armej, im armej in ej Christ Jesus,
6 eo ear lel̦o̦k mour eo an make bwe en kõl̦l̦ãik joñan on̦ããn eo kar aikuji ñan karõl̦o̦k aolep*—men in naaj kwal̦o̦k kake ilo iien eo ejejjet.
7 Ñan kwal̦o̦k kõn men in, kar jitõñ eõ bwe in juon ri-kwal̦o̦k im juon rijjilõk—ij kwal̦o̦k m̦ool, im ijjab riab—ij juon ri-katakin ñan ri-aelõñ ko kõn tõmak im kõn m̦ool eo.
8 Kõn men in, ikõn̦aan bwe ilo aolep jikin ko kom̦ij kweilo̦kl̦o̦k ie, em̦m̦aan ro ren wõnm̦aanl̦o̦k wõt im jar im kotak peier ilo kwõjarjar ilo ejjel̦o̦k illu im iakwããlãl.
9 Bareinwõt, kõrã ro rej aikuj kalõtlõt er kõn nuknuk ko rekkar,* im ilo juon wãween ettã im ren kõjerbal lol̦o̦kjen̦,* im jab kalõtlõt er kõn wãween aer pirõk kool̦an bõraer im kõn gold ak pearl ak nuknuk ko elukkuun l̦ap on̦ãer,
10 bõtab en ilo juon wãween ejim̦we im ekkar ñan kõrã ro rej kwal̦o̦k aer tiljek ñan Anij, aet, ikijjeen jerbal ko rem̦m̦an.
11 Kõrã ro ren ikõñ* im lukkuun kõttãik er ilo iien katak.
12 Ijjab kõtl̦o̦k an juon kõrã katakin ak irooj ioon juon em̦m̦aan, bõtab ej aikuj in ikõñ* wõt.
13 Bwe kar kõm̦anm̦an Adam m̦okta, innem tokãlik Iv.
14 Bareinwõt, kar jab m̦on̦e Adam, ak kar kanooj m̦on̦e kõrã eo, im ear oktak im juon eo ej rupe kien Anij.
15 Ijoke juon kõrã enaaj bõk kõjparok ñe enaaj nãje. Men in enaaj wal̦o̦k el̦aññe ej* pãdwõt ilo tõmak im yokwe im kwõjarjar im ilo an kwal̦o̦k lol̦o̦kjen̦.*
Footnotes
^ Ak “ro ewõr aer maroñ.”
^ Ak “jabdewõt armej.”
^ Ak “nuknuk ko ewõr kautiej ie.”
^ Ak “jel̦ãl̦o̦kjen̦; mãlõtlõt. ”
^ Ak “ineem̦m̦an wõt.”
^ Ak “ineem̦m̦an.”
^ Kajin Grik, “rej.”
^ Ak “jel̦ãl̦o̦kjen̦; mãlõtlõt.”
