2 Korint 12:1-21
12 Ij aikuj in kõmjãje. Meñe ejjel̦o̦k tokjãn ak inaaj wõnm̦aanl̦o̦k im kõmjãje kõn pijen ko rekabwilõñlõñ im kõn ennaan ko jãn Irooj.
2 Ewõr juon em̦m̦aan ijel̦ã kajjien im ej ri-kal̦ooran Christ, eo im 14 iiõ ko remootl̦o̦k, kar kajju bõklõñl̦o̦k ñan lañ eo kein kajilu. Ijjab jel̦ã ñe kar bõklõñl̦o̦k e ilo ãnbwinnin ak jaab, Anij wõt ejel̦ã.
3 Aet, ijel̦ã kajjien em̦m̦aan in—ijoke ijjab jel̦ã ñe kar bõkl̦o̦ke ilo ãnbwinnin ak jaab, Anij wõt ejel̦ã—
4 im ke ear pãd ilo pedetaij, ekar roñ naan ko jejjab maroñ kõnnaan kaki im ejjab mãlim an jabdewõt armej kwal̦o̦ki.
5 Inaaj kõmjãje kõn em̦m̦aan rot in, ak iban kõmjãje kõn ña make ijello̦kun wõt m̦õjn̦o̦ ko aõ.
6 Jekdo̦o̦n ñe ikõn̦aan kõmjãje, iban kõmjãje ãinwõt juon ri-jajel̦o̦kjen̦ kõnke inaaj kwal̦o̦k m̦ool. Bõtab iban kõmjãje kõnke en ejjel̦o̦k en̦ ej kautiej eõ el̦apl̦o̦k jãn joñan eo ej loe ilo ña im roñ jãn ña.
7 Ejjel̦o̦k en kautiej ña el̦ap jãn joñan kõn wõt an lõñ ennaan iar bũki jãn Irooj.
Ñan bõbraik eõ jãn an lukkuun utiej bũruõ, kar letok juon kãlõklõk ilo kanniõk, eo im ej ãinwõt enjel̦ an Setan, bwe en jab bõjrak an jeptak* eõ kõnke en jab lukkuun utiej bũruõ.
8 Jilu alen aõ kar akwel̦ap ñan Irooj bwe en jako men in jãn ña.
9 Bõtab ear ba ñan ña: “Jouj eo aõ el̦ap ebwe ñan eok, kõnke aõ kajoor elukkuun alikkar ilo am̦ m̦õjn̦o̦.” Kõn men in, inaaj m̦õn̦õn̦õ in kõmjãje kõn m̦õjn̦o̦ ko aõ bwe kajoor eo an Christ en wõnm̦aanl̦o̦k wõt im kalbubuuk eõ ãinwõt juon em̦ nuknuk.
10 Eñin unin ij lañlõñ ilo m̦õjn̦o̦ ko aõ, ilo aer kajook eõ, ilo iien ko ij pãd ilo aikuj, ilo iien ko rej kaeñtaan eõ, im ilo iien ko reppen. Ij kõm̦m̦ane men in kõn wõt Christ. Kõnke ñe ij m̦õjn̦o̦, innem ij oktak im kajoor.
11 Em̦õj aõ erom juon eo ejajel̦o̦kjen̦. Kom̦ar kõm̦m̦an bwe in ãindein kõnke ilo m̦ool en kar ña eo kom̦ij rejetake bõtab kom̦ar jab. Ejjel̦o̦k jabdewõt men en̦ ej kam̦ool bwe ittãl̦o̦k jãn rijjilõk em̦m̦anm̦õn ran̦e ami ilo jabdewõt wãween, jekdo̦o̦n ñe ejjel̦o̦k tokja.
12 Ke iar pãd ippemi, iar kwal̦o̦k kein kam̦ool ko bwe ña ij juon rijjilõk ilo aõ kar lukkuun kijenmej, kwal̦o̦k kõkal̦l̦e ko im menin bwilõñ ko, im kõm̦m̦ani jerbal ko rel̦l̦ap.
13 Ta edikl̦o̦k ami aorõk jãn eklejia ko jet kõn aõ kar jab kajjitõk bwe kom̦win eddodo kake ña ke? Eokwe, jouj im jol̦o̦k aõ bõd kõn likjab in aõ.
14 Kiiõ ej alen eo kein kajilu in aõ pojakin iwõj ñan ippemi, im iban kõm̦m̦an bwe kom̦win eddodo kake ña. Bwe ij jibadekwaj kom̦, im ejjab men kan̦e m̦weiemi; jejjab kõtmãne an ajri ro kakkon̦ m̦weiuk ñan jineer im jemãer, kõnke eddo in ej an rũtto ro ñan ajri ro nejier.
15 Ñe baj ña eo, inaaj lukkuun m̦õn̦õn̦õ in kõjerbal men otemjej ippa ekoba aolepen mour e aõ kõn wõt kom̦. El̦aññe elukkuun l̦ap aõ yokwe kom̦, innem etke edik ami yokwe eõ?
16 Meñe iar jab kõm̦m̦an bwe kom̦win eddodo kake ña, bõtab kom̦ij ba bwe iar “etao” im iar “m̦on̦e” kom̦.
17 Ta iar m̦on̦e kom̦ ikijjeen ro iar jilkinwaj er bwe in bõk jabdewõt men jãn kom̦ ke?
18 Iar akwel̦ap ñan Taitõs bwe en iwõj, im ña eo iar jilkinwaj eo juon jeid im jatid ippãn. Ta Taitõs ear m̦on̦e kom̦ ñan bõk jabdewõt men jãn kom̦ ke? Ta kõmij jab juon wõt ilo l̦õmn̦ak* ke? Im ta kõmij jab l̦oore juon wõt ial̦ ke?
19 Ilo ammim ba men kein ñan kom̦, ta kom̦ij l̦õmn̦ak bwe kõmij kajjioñ jojomare kõm make ke? Ejjab, kõmij kwal̦o̦k m̦ool eo im̦aan mejãn Anij ãinwõt ro ri-kal̦ooran Christ. Kom̦ ro rejitõnbõro, men otemjej kõmij kõm̦m̦ani ej ñan kõkajoor kom̦.
20 Ikkõl ñe il̦ak tõparwaj ijen̦e, kom̦ naaj oktak jãn wãween eo iar kõtmãne im inaaj oktak jãn wãween eo kom̦ar kõtmãne, im enaaj oktak im wõr poktak, ebbanban, illu, aitwerõk, ruruwe, wũnojidikdik,* utiej bõro, im pok.
21 Bõlen ñe inaaj bar iwõj, Anij eo aõ emaroñ kõm̦m̦an bwe in jook im̦aan mejãmi, im inaaj bũrom̦õj kõn ro rar jerawiwi me rejjañin ukel̦o̦k jãn m̦anit ko aer rettoon, im jãn aer l̦õñ,* im jãn aer peran in kõm̦m̦ani men ko renana.*
Footnotes
^ Ak “m̦an.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Ak “ba n̦ae.”
^ Naan eo ilo kajin Grik ej por·neiʹa. Lale “L̦õñ” ilo Kõmel̦el̦e Ko.
^ Naan eo ilo kajin Grik ej a·sel′gei·a, ej jitõñl̦o̦k ñan juon eo ej lukkuun rupe kien ko an Anij im ejjab jook im kea ñan jidik.
