3 Jon 1:1-14
1 Jãn eo erũtto* ñan Geiõs, eo ejitõnbõro im eo elukkuun m̦ool aõ yokwe.
2 Aõ jitõnbõro, ij jar bwe en em̦m̦an wõt am̦ mour im bwe kwõn wõnm̦aanl̦o̦k wõt im jeraam̦m̦an ilo men otemjej, ãinwõt an em̦m̦an am̦ wõnm̦aanl̦o̦k kiiõ.
3 Bwe el̦ap aõ kar lañlõñ ke jet jeid im jatid rar itok im kwal̦o̦k kõn am̦ dãpiji wõt m̦ool eo, im em̦ool bwe kwõj wõnm̦aanl̦o̦k im etetal ilo m̦ool eo.
4 Ejjel̦o̦k bar juon men ej kõm̦m̦an bwe en l̦apl̦o̦k aõ lañlõñ* ijello̦kun wõt men in: Ñe ij roñ bwe ro nejũ rej wõnm̦aanl̦o̦k im etetal ilo m̦ool eo.
5 Aõ jitõnbõro, kwõj kwal̦o̦k am̦ tiljek ilo men ko kwõj kõm̦m̦ani ñan em̦m̦aan ro jeid im jatid, meñe kwaar jaje kajjier.
6 Em̦õj aer kar kwal̦o̦k kõn yokwe eo am̦ im̦aan eklejia eo. Ñe renaaj ilo̦k, jouj im jipañ er ekkar ñan wãween eo Anij ej buñbũruon kake.
7 Bwe kõn etan, rein rar ilo̦k im kwal̦o̦k naan, im rejjab bõk jabdewõt jãn armej in aelõñ ko.
8 Innem ej ad eddo bwe jen kwal̦o̦k karwainene ñan armej rot in kõnke kõjwõj aolep jen jim̦or jerbal ippãn doon ilo m̦ool eo.
9 Iar jejewaj kõn jet men ñan eklejia n̦e, bõtab Diotrepis, eo ekõn̦aan bwe en m̦oktata ibwiljimi, ejjab kwal̦o̦k kautiej ilo jabdewõt men kõmij ba.
10 Eñin unin ñe inaaj iwõj, inaaj kwal̦o̦k kõn jerbal ko ej kõm̦m̦ani, bwe ej kajeeded naanin ruruwe ko n̦ae kõm.* Im ejjab jubũruon kõn men in wõt, ak ebar m̦akoko in kwal̦o̦k karwainene im kautiej ñan em̦m̦aan ran̦e jeid im jatid; im ro rekõn̦aan karwainene rein, ej kajjioñ in bõbrae er im jol̦o̦k er jãn eklejia n̦e.
11 Aõ jitõnbõro, jab l̦oore men eo enana, ak kwõn l̦oore men eo em̦m̦an. Bwe eo ej kõm̦m̦an em̦m̦an ej jãn Anij, im eo ej kõm̦m̦ane men eo enana ejjañin lo Anij.
12 Im kõn Demitriõs, ekanooj em̦m̦an an aolep ro jeid im jatid kwal̦o̦k kõn e im kõn wãween an mour ekkar ñan m̦ool eo. Kõmij bareinwõt kam̦ool bwe em̦ool men in, im el̦ap am̦ jel̦ã bwe aolep iien em̦ool men eo kõmij kwal̦o̦k kake.
13 Ekanooj lõñ men ko ikõn̦aan ba ñan kwe, bõtab ijjab kõn̦aan wõnm̦aanl̦o̦k wõt im jejewaj kõn pen im ink.
14 Ijoke, ij kõjatdikdik bwe ejjabto jãn kiiõ inaaj lo eok, im jenaaj jelm̦aik doon im kõnono.
Aenõm̦m̦an ñan kwe.
Ro jeid im jatid* rej lewaj aer naanin yokyokwe. Jouj im bar lel̦o̦k aõ naanin yokyokwe ñan ro jeid im jatid* kajjojo.
Footnotes
^ Ak “eo ej lale eklejia.”
^ Ak emaroñ, “kõm̦m̦an aõ kam̦m̦oolol.”
^ Kajin Grik, “el̦ap an kwal̦o̦k naan ko renana kõn kõm.”
^ Kajin Grik, “m̦õttad.”
^ Kajin Grik, “m̦õttad.”
